我10個月大了！

今個月我第一次去游水，真係超級好玩，用左水泡之後唔駛爸爸媽媽扶住我都唔驚。爸爸媽媽見我鐘意，連續兩個禮拜都有帶我去，可惜之後天氣都唔好，早兩日經過泳池時我望完又望呀，希望之後天氣會好d喇。

我行動力強左好多，除左自由自在周屋爬之外，好鐘意爸爸媽媽拖住我行路，最近爸爸媽媽仲捉住我雙手跑步步，好刺激架！另外，我又好鐘意爬梳化，如果有野墊腳（例如媽媽）我可以自己爬上梳化坐係度。仲有呀，最近發現窗台上面好多好野玩，我可以自己扶住窗台企起身同坐低，不過唔知點解第二日再去窗台突然少左好多野。

除左拍手之外，我依家學識左請請，如果你同我請請的話我會回應你架，其實我都識hello同bye bye，不過媽媽話我成日慢半拍。

我今個月同婆婆friend番，會主動爬去婆婆度搵佢玩，因為婆婆實在太funny了，又同我睇光光燈，仲有魚魚、揮春同窿窿，曉曉表姐都好鐘意玩，媽媽同暐姨姨成日話我同曉曉表姐搞到婆婆好辛苦。

食野方面，今個月試食左荔枝、水蜜桃、蝦、腸粉、烏冬、饅頭、同埋熱香餅，仲有今日新鮮滾熱辣試食左豆腐花，好好味呀！爸爸媽媽同保姆姨姨成日要我拎住d野自己食，但係我真係好唔鐘意，要我拎住我寧願唔食lu。嫲嫲之前聽爸爸講話我鐘意食西瓜，結果每次見面都帶個大西瓜俾我拎番屋企。

媽媽話我今個月脾氣比較暴躁，梗係喇，出牙仔好辛苦架！我一向唔鐘意食手手都忍唔住要放隻手指入口舒緩下，依家明顯睇到的牙仔有4隻，另外有4隻已經冒出來喇。

講野方面同上個月差不多喇，近排都會講爹爹爹爹爹爹，爸爸當我叫緊佢架喇。我依家聽得明no no no，摺枱no no no，轉轉凳no no no，廚房no no no，拖鞋no no no，電腦no no no，電線no no no，電話no no no，但係點解屋企咁多野no no no？我都識得表達no no no，除左喊用得最多之外，如果食野時用雙手推開就表示我唔想要喇！

我真係好鐘意黏住媽媽，尋晚媽媽去飲，我等佢門等到11點幾番到屋企先瞓呀。

Comments

comments