我9個月大了﹗
媽媽話我獨立左好多，係熟悉的地方可以自己玩一陣，有一次塞車我自己一個係後排坐係CAR SEAT半個鐘都無扭計，梗係喇，我大個女喇嘛~雖然係咁，但係始終我都係好ENJOY黏住爸爸同媽媽。
今個月我開始同大家一樣一日食三餐(固體)了，早餐主要食包包，都試過食螺絲粉，午餐同晚餐就食粥仔，當然仲有食水果、乳酪、餅餅同埋奶奶奶奶奶…..我最鐘意食包包，不論方包、多士、叉燒包個包、IKEA熱狗個包、發發魚柳包個包都咁鐘意，如果一日三餐都食包包都無問題，爸爸仲話不如試下自己整包包俾我食喎，暐姨姨應承左借部麵包機俾我地，但係爸爸咪真係會整？今個月都試左新食物，包括奇異果、車厘子、豆腐等等，我依家都學緊用餐具，不過好似手仔方便D，更方便的是大人可以將食物放埋入我個口度，嘻嘻﹗
我依家動作越來越靈活了，翻身動作做得非常流暢，不過媽媽話8個幾月先識翻身唔好咁大聲同人講喎。經過兩個月黎觀察住BEAR BEAR爬行，今個月我都識自己爬了，依家想去邊就去邊，真係自由自在(如果無俾爸爸媽媽捉番轉頭的話)。依家我最討厭瞓低，所以一要我換片我就會翻身爬走，如果爸爸媽媽夾硬按住我的身的話我就會大哭，問你地怕未﹗
爸爸媽媽話我係危險份子，除左成日爬出地席範圍越界之外，見到前面有咩可以扶住都會爬上去，包括圍欄、枕頭、甚至係爸爸媽媽的身軀，亦都鐘意爬去床邊望下下面有D乜，不過我唔覺得依個係危險，只是對未知的前路充滿好奇者。其實我都有靜的一面，依家都有睇下書書架，見到蘋果同蕉蕉個頁仲會特別開心添﹗
等我靜靜雞話樣嘢你地知，我學識左拍手喇﹗上次暐姨姨播歌俾曉曉表姐聽，音樂一起我就放低玩具跟著音樂同表姐一齊拍起手來，個次真係一鳴驚人，哈哈﹗
爸爸媽媽話我依家好多野講，發音的聲調多左，而且長篇大論，可惜暫時除左”媽媽媽媽媽…..”、”爹爹爹爹爹…..”、”奶奶奶奶奶…..”同埋”叻叻叻叻叻…..”之後，佢地都唔太明我講乜。
今個月爸爸媽媽第一次帶我去PLAYROOM，同曉曉表姐同埋愷揚哥哥一齊去，地方太大我都唔太敢周圍爬，只是圍著爸爸媽媽轉，我係PLAYROOM第一次玩滑梯，好刺激呀﹗不過佢地話PLAYROOM細菌多，個次去完PLAYROOM爸爸媽媽都病左，之後仲傳染埋我添，爸爸媽媽身體咁弱點算呀？最近鐘意玩咩玩具？樣樣都有D興趣咁，不過我真係好鐘意曉曉表姐，所以表姐鐘意玩乜我都鐘意一齊玩，媽媽仲話我係曉曉表姐向日葵添﹗不過點解有時曉曉表姐好似驚左我咁既？
另外，今個月因為褓姆姨姨病左，有一星期係由爸爸照顧我，爸爸成日俾包包我食，所以我地兩個相處都好愉快。不過夜晚我都係要見到媽媽先至安樂，尋晚媽媽去夜街，我喊得好悽涼，爸爸都話頂我唔順，媽媽一番黎我即刻要黏到佢實一實呢﹗
