大約在33 WEEKS 0 DAY開始，覺得BB的郁法唔同左，33 WEEKS 2 DAYS去私家產檢時照超聲波確認BB調左頭，之後一星期都覺得BB好似無之前郁得咁起勁，於是在34 WEEKS 2 DAYS政府產檢時同左醫生講，於是醫生安排左我翌日去做胎心聲檢查。
做胎心聲檢查要當入院咁做，所以要俾$50入院費及$100住院費，亦所以有一餐醫院午餐食。9AM去入院登記處排隊打排板，差不多搞到9:45AM才上到E1病房。
E1病房有6個床位用作胎心聲檢查之用，不用換衣服，脫了鞋直接躺上床就可以了。護士在我的肚子上駁了兩部機器記錄BB的心跳，另外又給我一個按鈕，如果感覺到胎動就要按一下作記錄。
整個檢查一般歷時大約30分鐘，但如果數據唔夠靚例如BB瞓左郁得少就要繼續做落去。起初護士是叫我躺在床上的，但後來可能BB郁得唔夠，叫左我坐高個人，等阿B醒一醒。在檢查期間我不時都望下個機，發現到一樣有趣的事，就是阿B的心跳一般都是每分鐘一百四十幾下，但當我感受到胎動的時候，心跳也會升至一百六十幾下，完來BB郁兩郁就已經咁刺激。
最後我在床上躺了大約45分鐘，護士終於宣佈我可以落床了。
之後就是等醫生看報告的時間，大約等到11:45AM，醫院的姐姐就過來派飯了，而吃飯的地方竟然就在等候區的中間開張台，然後五個阿太一齊坐係度食飯，真係估佢唔到。
菜單是意想不到的豐富，有上湯蒜茸冬瓜、黑椒蜜汁雞中脾、節瓜雞湯，還有一個橙。不過醫院飯出名淡而無味，雞有雞味瓜有瓜味咪就係依D囉，因為除左雞味同瓜味之外，就無其他味了，菜單上所寫的調味料，我一樣都吃不出來。
飯吃了一半姑娘就叫我名，表示醫生看過我的報告OK可以離開，於是吃完這個醫院飯之後就落樓下交錢離開了。
除了這個檢查之外，醫生還給了我一件功課，就是每天要數胎動，由起床開始數數夠10次記錄番時間就可以結束，話如果12小時內不夠10次就要立即入院。根據這幾天的數據，通常中午前就會完成任務，在這段期間，早上還是多點留在OFFICE不要走動太多了，因為一走動就較難感受到胎動，交唔到功課自己嚇自己就唔好喇。