17-5-2010:東京埼玉trip day 3(part 2).長瀞宝登山.阿佐美天然刨冰

玩完長瀞激流,番去養浩亭沖好涼之後,就要出發囉~我哋係秩父o既行程仲有好幾個地方呢~朝早閒逛時發現,原來上長瀞站同埋長瀞站都好近,所以去宝登山嘛,行過去應該十幾分鐘都ok了~於是我哋拎住重重o既行李(因為係川越小江戶買咗好多東東~而大件行李其實留係東京o既~),出發咯~

沿路有好多蒲公英呢~平時都好少見~聽爹媽講,原來係加拿大呢,你自己庭園裡面有好多蒲公英係會俾人鄙視o架,因為會被視為唔打理花園,咁先至會「雜草」叢生﹗

肚子餓了,好在去到長瀞駅嗰邊比較熱鬧,搵食嘢o既地方都容易啲~

我哋去咗呢間「大黑屋」食lunch,好在有圖畫,order食物唔成問題~先嚟蒟蒻田樂燒(左下),聽過田樂燒呢個烹調方法係嚟自妙手小廚師2,講個少年整咗豆腐田樂燒,所以都好想試下,似乎係加咗味噌去烤o既意思~右上係普通o既雞肉飯啦,咁都好真材實料o既~右下又係漫畫入面o既食物,係山芋蕎麥麵,啲山芋好軟綿綿,食咗好似冇食咁呢~好有特色o既一餐﹗

好曬呀好曬呀~~~~~~~~~好熱呀~~~~~~~~~~~~

我哋兩個都忍唔住買咗頂帽帽先繼續行呢~好似每次去旅行都買咗頂帽﹗:p

下一站係宝登山神社~

呢張係自拍王嚟o架~

宝登山神社係一間有1900年歷史o既古老神社,但都打理得企企理理喎~不過旅遊書o既講解唔多,我哋主要都係周圍影下相咁啦~左上角o既view,令我諗起將太的壽司全國大賽篇o既其中一個比賽場地…

神社門口有小賣部,有啲好似「扭蛋」o既箱﹗放200yen落去就可以抽一個了,都幾靚喎~雖然唔係好值200yen…:p

睇一睇時間,哇,每半個鐘頭一班o既登山纜車,如果唔搭呢一班就會太晏lu喎,於是我哋急步行急步行咗唔知幾多百米,終於衝到去…

登山纜車站﹗(氣喘中~)

登山纜車站外o既花花~好多人都讚呢張相靚o架~

點解要上宝登山?莫非真係為咗要睇山上o既小動物公園?此其一啦~

其實更加重要o既係,上到高處,就可以俯瞰成個長瀞o既景色,同埋要補充一點,大家見到而家綠油油o既樹呢,去到秋天就會全部變成紅色了﹗所以嘛,要嚟長瀞,除咗夏天係一個好時機之外,秋天都唔錯o架~

可愛o既黃色纜車車廂~細細部,每次坐唔到好多人o架咋~

我哋睇下風景,慢慢行過去小動物公園嗰邊~

大家記住呢個係「小動物公園」,而唔係「動物園」,所以入面o既動物,都係溫馴可愛o既小動物﹗

仲可以餵佢哋添~羊咩咩、小兔子~

小鹿斑比~

我就鍾意睇啲馬騮,佢哋動作多多,都好cute o架~

宝登山上面仲有個「梅百花園」,而家冇乜睇頭,但到冬天時就會漫山開滿梅花﹗到時好似要俾錢入場?

係山上面又熱又渴都忍住唔買嘢飲…因為?

落山要去食著名o既「阿佐美刨冰」﹗呢間刨冰店真係好有格調,我第一次去一間播爵士樂o既刨冰店呢~

點解咁出名?因為全國之中得兩個地方有天然刨冰賣o架咋,呢度係其中一個﹗天然o既意思,即是係冬天時儲藏定啲冰,到夏天時拎番出嚟刨刨刨刨刨﹗係咪特別好味?唔知呀,不過夠綽頭囉~

我哋share o既係早乙女草莓刨冰,有草莓汁、牛奶,yummy~雖然環境好舒適,但刨冰其實食起嚟都係一樣比較輪盡o既東東…:p所以都要食得好急~冇儀態咯~

出番去長瀞駅,我哋要搭番車出去御花畑,即是西武鐵道站嗰邊lu~離開秩父之前,仲有一個地方要去﹗大家記唔記得係邊度呢?

待續

17-5-2010:東京埼玉trip day 3(part 1).長瀞激流

第三日係今次埼玉trip o既另一個重點呢,我哋會去玩長瀞激流﹗主要都係俾旅遊書吸引到先至揀嚟呢度呢~我哋book o既酒店套餐除咗一泊二食之外,仲包埋個激流tour喎,因為成個網網都係日文,都唔係太sure會點,所以都有少少緊張呢~

夜晚時只覺得個窗好大,啲風吹入嚟好涼快…到第二朝…

WOW~原來置身於大自然呢~間房大大隻窗就係對住樹樹樹樹樹~~~~~~~~~仔細睇一下,呢啲樹都係楓樹嚟o架,所以,如果秋天嚟的話,成個窗戶都係紅葉,一定靚到好感動呢~我相信長瀞係一個賞紅葉o既好地方﹗

早餐當然同晚餐一樣大堆頭大製作啦~食得飽飽的﹗真好﹗旅行的確要多啲體力~

好多年前第一次試食納豆,同一般外國人一樣都覺得—-難食﹗多年後再試試放入口,結果都一樣,都係頂唔順呀~幾有營養都冇用啦,放唔到入口~

我哋預約咗o既激流trip係十點半,仲有啲時間,我哋咪隨便係旅館附近逛逛影下相囉~

旅館o既餐廳可以推開落地玻璃門出去陽台位置,嗰度有好多燒烤爐,網上book旅館住宿都有啲係包BBQ o既企劃案o架~如果一家大細嚟,一齊係咁靚靚o既環境BBQ都錯﹗

養浩亭o既counter~

外觀~

出去逛逛,附近全部都係楓樹呢,腦海係度想像秋天o既紅葉景色…

行出少少…

嘩,見到條溪了,清澈見底呢~

我哋book o既就係呢個企劃呢,旅館住宿+玩激流~

時間差不多,我哋參加o既激流tour o既戶外活動公司就正正係養浩亭對面,去到有一男一女笑咪咪非常有善o既年輕日本人招呼我哋囉~佢哋平時實在太少招呼外國人了,所以英文非常生疏呢,我哋不住用body language加簡單o既英文嚟溝通﹗

先換衫﹗佢借咗啲類似潛水衣o既衫俾我哋,原來仲要著埋落水o既專用鞋呢~

套衫好緊呀﹗anyway,準備妥當,出發﹗

原來十點半呢一團得我哋兩個客人﹗就由佢哋兩個招呼我哋~

工具都要由公司搬落去溪邊呀﹗我哋要拎橡皮艇啦,四隻槳,仲有救生用o既繩呀之類…隻橡皮艇好重呀~未開始玩先嚟勞動﹗

係落水之前,好多準備工夫呢,因為我哋從來未玩過呢啲,都要先教一教我哋基本方法,點樣握隻槳啦,點樣follow instruction啦,因為小小橡皮艇航行時,我哋都要聽leader o既說話,合力去控制隻船o既移動、方向、穩定性,所以我哋要識啲command,同埋知道要點做囉~

乜都未開始做,就先被倒頭淋水丫﹗啲水真係勁冰涼﹗始終只係五月中呢~

好喇﹗

實踐一下,有人落咗水時要點樣扶番佢上隻艇度呢?原來唔好拉佢對手,要拉住救生衣,而且拉咗上嚟之後,就反轉嗰個人o既身,有趴係度反成臥係度,即面朝天~呢個之後都幾有用﹗

ULne9XiSs7yuTI6TDI1E1w

呢度講解我哋要點樣「all to the right」,呢個應該係穩定艇仔時要用的…

好,出發,我哋係水流慢o既地方,就跟住指示「划~~~划~~~」,而水流急少少呢,艇仔都會自己前進,我哋又可以休息一下,用別扭o既英文簡單地交談,講下大家o既生活啦,呢度四周o既環境啦,參觀o既地方啦,轉變啦,有趣o既東東啦等等~

去到風平浪靜o既地方,佢哋就叫我哋落水玩lu~

zc8vEKqJu572xAqqUQM1kg

yo~~~~~~~~~~~ho~~~~~~~~~~~~~~~~我明點解要著呢啲潛水衫了,因為啲水真係好凍丫﹗著咗呢啲厚厚衫,落到水都唔凍了,唯一最凍o既就係對手﹗冇嘢保護住丫嘛~

ecQWTjovtnuZjIHCpk0nSw

爽~

cxgSUism46XdTZCWki01zw

係水度掙扎耐咗,我哋兩個都冇力爬番上艇仔…:p要被抽番上來,呵呵~

LShJ_nruQ7UOZ.Kezkni0w

整理一下儀容,影番張靚相先~

xKLScg_2Ul.ZZ_3AOw1TFA

玩各種balance game,game o既end-point?當然係跌落水啦~

6EbsBwLEHCet2UsSvEJMFA

休息一下先~

因為唔係雨季,所以話刺激又唔算刺激,而係好痛快囉~坐住艇仔咁前進,又有風,又涼涼地,又可以欣賞下沿途o既風景,真係幾舒服﹗推薦﹗有別於一般o既觀光木船,有船夫撐船,呢啲自己撐,更有趣吧﹗

去到下遊,我哋幫手拎番啲嘢上岸,原來佢哋有架車泊咗係岸邊呢,我哋就濕漉漉咁坐番過去養浩亭嗰邊喇﹗

佢哋真係好好丫,帶埋相機幫我哋影相,仲免費馬上燒番隻碟俾我哋,送埋去我哋旅館呢~可以留個記念真好~

呢個就係戶外活動公司o既網網:

http://www.outdoornagatoro.com/index.html

佢哋都有其他活動呢~

再享用多一次旅館o既大浴場,沖乾淨就要check-out,繼續行程lu~

待續

16-5-2010:東京埼玉trip day 2(part 2).i love 日式溫泉旅館@長瀞養浩亭

離開川越小江戶,我哋就搭番西武鐵道,向秩父進發,我哋訂咗o既日式溫泉旅館叫做養浩亭,為於秩父鐵道沿線o既長瀞,嗰度最出名o既就係嗰條長瀞溪,好多人專登去坐船仔o架~包括我哋﹗原來呢程車都幾遠,我哋轉咗車之後第二程好似都坐咗個幾鐘,結果?咪梗係瞓瞓瞓瞓瞓啦~

越向秩父進發,景色慢慢轉變,變得更多山同埋平房~感覺到大自然呢~

我哋要去秩父市o既御花畑駅轉搭秩父鐵道,秩父鐵道因為係地區路線,所以班次比較疏,一個鐘得兩至三班火車﹗

你睇,車站都比較簡陋,入站都係人手收飛o架咋~我哋去到時啱啱走咗班車,仲要係假日,所以等咗好耐﹗行李又重喎(因為係川越小江戶買咗勁多嘢﹗),所以又唔可以周圍行下,唯有係個站到呆等啦,又唔敢瞓著,驚瞓到miss咗班車,好在,有小iphone o既apps陪伴我awake﹗

其實最初吸引咗我選擇去埼玉,其實都好關呢個「芝櫻之丘」事,係旅遊書見到呢個漫山花海o既情景,好想去下﹗適逢今次又係五月去,雖然遲咗兩個星期…會唔會都可以睇到少少呢?大家想知o既就要繼續留意我之後o既blog blog~

好不容易…車來囉~好似要搭六個站左右,大約搭左四個字?﹗唔記得了~

但去到上長瀞駅時,天都差唔多黑齊啦~真係oh no no~好在我係google map印好咗地圖,我都事先知道車站同埋旅館o既地理關係o既~好在搵定咋﹗因為車站…同埋四周…零地圖﹗同埋零個人俾我問嘢﹗好在…都係一條路啫,雖然條路靜靜地,我哋兩個女子急急腳行,總算順利冇蕩失路地去到養浩亭﹗

哇,去到就覺得,噢,好值得呀~因為實在太靚了﹗今次係我今大個女以來最豪氣咁book o既旅館嚟o架~

先帶大家參觀一下我哋o既房間~

呢度係玄關位置,左手邊布簾入面係廁所同埋浴室,不過我哋一次都冇用過呢個浴室呢,沖咗兩次涼,兩次都係大浴場嗰度沖﹗hee,環境又靚,又有得浸浴嘛~

入屋要脫鞋子,但係旅館走動嘛,可以著上…膠屐﹗哈,表面上個樣係木屐,但其實係膠拖鞋,都幾舒服喎~

房間好大,即使之後鋪咗床鋪,張小几附近依然可以坐~外面仲有坐椅呢,第二朝至知道佢o既好處﹗不過呢,間房咁大間,個電視就細咗少少,我記得嗰晚電視有播「神奇四俠」﹗

好咯,安頓一下,我哋出發食dinner咯,你睇,因為係我預約o既房間,所以房門口貼咗「胡樣」呢~後來發覺原來旅館大門口都有o架~

今次book o既旅館包埋朝夕食,其實我都專登揀的,因為好喜歡呢啲日式大大份o既set,係香港真係一般價錢食唔到,上次同day去白濱時,即使係好平o既民宿,晚餐都好大份呢,真高興~點解我同connie要對角咁坐?

因為實在太多食物了~呵呵~真高興﹗

介紹一下先,右上係刺身啦,有魷魚、吞拿魚、白肉魚(品種唔識分啦~),中上o既天婦羅睇個樣真係估唔到佢係乜,原來白白色o既係腐皮蝦卷、黑色o既係菇菇、綠色o既係大家估得中o既青椒,左上o既係凍o既炸魚,骨比較多啫,左二左三都係啲醬醃菜啦,如果冇乜餸,呢啲濃味o既東東都可以配白飯食﹗左下o既係烤豬肉,味道有少少似德國咸豬手呢,中間o既係海鮮鍋,其實啲蔬菜仲好味過啲海鮮呢,因為吸收晒海鮮o既精華呀~

以下呢個要特別介紹﹗我哋一人有一個飯煲﹗服務員指手劃腳地同我哋講解,終於明白佢同我哋講,話,個火熄咗o既時候,飯就煲好了~

我小心奕奕地準備打開個飯蓋,影張相留念先,第三格o既我絕對係真情流露o架﹗忍唔住「哇」咗出嚟,原來唔係白飯,係野菜炊飯呀~~~~~~~~~~~oooooooooo~~~~~~~yummy~

呢碗飯嘛,唔駛有枱上任可o既菜式,都可以就咁食兩三碗丫﹗有野菜、飯亦用上湯嚟煲成,太好味了,可以當選枱上o既第一名﹗

晚飯o既餐廳~可能因為我哋比較晏吧,都唔見其他客人,第二朝早就有其他人都食早餐了~

真係食到勁飽呀~要休息一陣先可以去沖涼~

養浩亭o既浴場有內湯同外湯,外湯其實係半室外吧,因為就有蓋遮頭o既,不過就有個無敵大大大窗,可以望到外面o既樹同埋少少長瀞溪,亦可以呼吸到室外o既空氣,晚間涼涼的,浸起嚟都好舒服,外湯又有兩個池,兩度輪流浸下~爽呀~

浸時冇得影相,唯有copy佢個網o既圖片俾大家睇下啦,右下o既係內湯,因為外湯太吸引了,所以內湯都得唔到我哋垂青呀~呵呵~

日本人o既服務真係好體貼﹗我哋沖好涼之後,係換衫嗰度咁connie吹頭嘛,咁我其實prefer自然風乾啲頭髮,於是我坐係旁邊等佢,咁旅館o既職員到佢自己嚟沖涼喎,見到我冇風筒用咁,佢就令令林林跑咗出去,搵咗一個風筒俾我呀,實在太令人感動了~你話丫,日本令人想去完又再去,真係有理由o架~

我哋去食飯其間,旅館o既職員已經為我哋鋪好床lu~真體貼呢~

因為夜晚天氣夠晒涼,房間又有紗窗,所以我哋都冇開冷氣就瞓呢,溫度正適中﹗good呀~goodnight~

呢間好好o既旅館叫做養浩亭,大家如果會去秩父,一定要住呢度呀:
http://www7.ocn.ne.jp/~youkotei/top/top.htm

係網上就可以book+馬上confirm了~

待續

16-5-2010:東京埼玉trip day 2(part 1).踏足埼玉縣之川越小江戶

第二日我哋都好早就起身lu,因為要搭早啲o既火車出發﹗川越小江戶嗰邊應該都好多嘢行呢,而且黃昏時份仲要趕過去位於長瀞o既溫泉旅館喎,時間都係預鬆少少好啲~

我哋間酒店唔包早餐呢,所以提早出發去食早餐~見到呢間cafe樓下o既牌寫住,買任何飲品+百幾yen就可以有一份早餐,咁抵?好啦,就食呢間啦﹗

中咗計添,原來每杯飲品要六百幾yen呀﹗oh no no~我都未食過要六七十蚊港幣o既早餐丫﹗好在味道都好好~我哋叫咗兩款三文治,仲附上yoghurt同埋洋葱湯添~我此愛上咗抹茶鮮奶﹗環境都幾舒服…不過最遺憾o既係,唔好睇我哋好似好悠閒咁影相,其實,啲食物一到,我哋就狼吞虎嚥係咁塞入口了,因為要趕火車呀~

我哋搭o既火車,就係呢班特急小江戶,中間都冇乜停幾多個站,唔駛一個鐘就去到川越小江戶了~

呀,by the way,介紹一下,我戴住嗰條圍巾係先一晚係東京買o架,因為低估咗呢段時間係關東地區o既清涼程度呢,只帶咗件薄薄長袖外套,夜晚唔夠暖添,所以買咗呢條圍巾,除咗保暖之外,襯下衫都好丫~

係預備今次個trip時先發現呢件事呢~

話說同爸媽追劇集,睇過一套叫做「夫婦道」o既日劇,入面講一個家庭,佢哋開個茶園,賣手搓茶,有三個女一個仔,故事講呢一家人o既生活﹗佢哋就係賣狹山茶了,果然係狹山市附近,真係見到同劇集入面一樣o既茶田呢~原來夫婦道o既背景就係埼玉o既狹山市﹗所以二家姐八夜子可以每日去東京返工呢,都唔係太遠~

落車﹗

川越市係一個悠閒、寧靜o既小鎮呢~好乾淨、好清新~

街道都好舒服﹗因為地方唔大,雖然有旅遊巴士路線,但我哋都決定用一對腳﹗走向目的地之餘都觀賞賣沿途o既風景嘛~

上晝先去仙波東照宮同埋喜多院~因為唔熟悉日本歷史吧,所以背後o既故事都唔太理解,總之同德川家康嗰啲人有關o既地方啦~係入面住過乎?唔記得了~:p

對我哋嚟講呢度就係一個充滿住古老日式建築o既地方,都好有風味o既~

許願~

呢度有祈福o既地方,呢班大叔大嬸興致勃勃地敲響個鐘呢~

可以入裡面參觀,但裡面又唔准影相喎~所以…

哈,佢哋做咗狗仔隊﹗

入面仲有五百羅漢~各有各o既神態﹗右上角嗰個笑咪咪的,左下角嗰個:「吓?我唔知喎~」

試下食呢個大名燒~最初以為係蕃薯餡料…因為有個圖畫嘛,但個老闆嘰呢咕嚕問我
嘢,唔識答嘛,結果俾我哋嗰個係custard味呢,都好味o既,不過蕃薯係川越o既特產囉~

係招牌影番張相先﹗

我哋行出去川越o既「小江戶」嗰邊o既一番街~川越小江戶最出名o既係,嗰度充滿住江戶時期o既建築物~

連郵政局(右上)都係古代建築嚟o架~因為係遊客景點,所以有好多特產,美味o既小食,靚靚精品~人力車仲增加古舊feel呢~

鐘樓係川越小江戶o既landmark~呢張相係自拍王嚟o架~

我哋係呢間鋪頭食lunch~

冷烏冬同埋冷麵﹗好清涼呀~而且勁大份﹗食到肚滿腸肥﹗:p

逛逛菓子屋橫丁,呢度成條街都係賣糖果糕點餅乾零食o架~

其中有勁大碌o既黑糖棒棒﹗不過好似冇影到添~右下角o既可愛小妹係專登影俾day的~

最後參觀埋講祭典museum~

除咗展示祭典時要用o既巨型花車之外,仲有現場表演呢,似乎呢啲唔係專門嚟表演o既工作人員,而係真正o既村民﹗有音樂啦,又有著住戲服o既演出﹗不過啲音樂比較單調,環境又暗暗地,我哋又攰攰地…所以嘛…

打算逛多一陣~咦~

似乎有特別o既活動喎,promote川越小江戶o既function乎?有得平價試下地道美食,又有得玩,又有得影相喎~好熱鬧﹗我哋「唔識字」,冇走去排隊呀~

兩個人都累累地,我哋決定出發過去旅館lu~拿拿聲跳上一部巴士,返火車站去也~

待續~