28-6-2014:美麗香港@熱辣辣的浪茄灣

難得有星期六放假,一早約好day一齊去行山,我哋都好耐冇去過行得長啲嘅山,平時星期六、日都好多其他事情,有時得閒又撞正天氣唔好,所以今次叫day搵條長少少嘅路線,佢就揀咗由西貢西灣亭出發,倒轉行麥理浩徑第二段至第一段,跨過西灣山落去浪茄灣,再兜番過萬宜水庫東壩完成﹗想行長少少可以沿住東壩條路出返去北潭涌,但我哋已經熱到攰到郁唔到,結果係東壩上咗的士出番西貢咯~其實出發前我都唔係好知佢講嘅係邊條路線,到咗時描述得仔細啲至知,哦,咪我同爸媽幾年前行過嗰條路倒轉囉,嗰次仲有打過blog添~請參閱:30-10-2006:重陽登高之北潭涌、萬宜水庫、浪茄、西灣亭,原來已經係八年前嘅事呢~

a087c789d533a9515703e31e985121aa

我哋行嘅就係最最最東邊最尾尾嗰截喇﹗ 閱讀全文

30-10-2006:重陽登高之北潭涌、萬宜水庫、浪茄、西灣亭

重陽節梗係要登下高啦,今日同爸、媽、姐去行山呀~原本諗住今日去昂平360 o架,但而家仲係好繁忙呢,買唔到飛,後來我o地睇o左雜誌附送o既行山特刊,就決定o左今日o既路線,由西貢北潭涌沿住萬宜水庫行去浪茄,全程4小時﹗咁應該長度、難度都適中啦~

因為車程都幾遠,係北潭涌出發時都11點lu,果然,去浪茄o既路程一D都唔辛苦,大致上都係平路同輕微o既斜路,雖然行o左三個幾鐘,但都好輕鬆,而且萬宜水庫沿途o既風景都靚~我o地都認為最唔好o既係條路有好多的士經過o羅,因為入到去浪茄冇車家嘛,一係行路,一係坐的士o羅,所以好多的士入去接客o羅~

我o地o既起點遊客中心外面,有防火隊伍派o野宣傳防止山火呀~係環保袋同埋水﹗真係要特別鳴謝佢o地呀~冇o左多出o黎o既呢五支水,我o地真係唔夠水飲呢~因為比原定行長o左好多時間嘛~

出發去浪茄lu~

知唔知係咩花?係怕醜草o既花o黎o架~媽都話佢係第一次見﹗

坐係路邊,食個柑,休息一下﹗又有樹蔭,good﹗

險要o既地理位置﹗呢度叫做「破邊洲」呀~有隻小船載D人去近D參觀呢~我o地就企係個水壩上面睇﹗

行到浪茄了,要番去西貢,究竟跟原路出去好丫,定係行第二邊呢?

結果我o地決定行去第二邊,去西灣亭o個度搭小巴出去西貢﹗原來條路好辛苦o架~~~~~好在後來攀過314m o個個山之後就遇到其他遊人了,雖然逐漸天黑,但都放心好多~

呢個就係浪茄灣了﹗得我同家姐跑o左落海度浸腳咋~day都話浪茄係出名靚o既一個海灘,其實應該帶套泳衣去,但既然冇帶咯,唯有點都要落水浸浸腳啦~哇,D大浪沖過o黎,雙腳o既疲勞盡消﹗好可惜唔可以全個人浸落去呢~最後條褲都整濕o左呀,又黐o左D沙,後來行得好唔舒服添~但唔理了﹗乾o左就舒服D o架啦~

大大啖咁咬一下個布冧,哇,做咩影我?

好靚呀~~~~~大自然真美﹗竟然係香港都有層層疊疊o既山峰﹗

好o野好o野,落山lu落山lu~呢個位置見到山下面有三大個海灘﹗但我o地結果落去o既位置都唔係o個一邊呢~無緣近距離感受一下﹗

張相有咩特別?見唔見到對面個山有個尖尖呀?o個個係涼亭o黎o架~我o地就係係o個邊行過呢一刻身處o既位置﹗行上去o個個山都幾辛苦﹗有314m,雖然唔係特別高,但樓梯都好斜、上得好急呢~

落山時天都差唔多黑得七七八八了,終於去到西灣亭﹗o個度已經有好多人等緊架小巴呢~好在有人指點我o地排隊,所以第一班小巴都上到車了,哇,架小巴超載o左5個人呀~

番到去西貢市中心已經六點幾,極度肚餓呀~~~~~梗係要慰勞一下自己啦,我o地去o左食海鮮呀~因為day就只係科大﹗所以誠意邀請埋佢出o黎一齊食﹗好高興啊~哇,呢張相我o地兩個勁似樣﹗晚餐o既食物全部都幾好,我尤其鍾意個豆腐海鮮湯﹗好鮮美,連煲湯o既蝦、蜆都好食﹗飲o左三大碗﹗

結果今日行o左七個鐘呀﹗我都未試過行咁長時間,不過呢,行完又冇環島行咁累,又冇行青山咁累,o個兩次行完之後真係覺得對腳out of control o羅~但今日行完之後狀態仍然ok~但都想早D瞓呢~

好在聽日唔駛番學o者﹗撻皮o既block c來了﹗好高興可以好好的休息一下~