19-5-2010:東京埼玉trip day 5.築地市場.自由之丘.回家咯~

oooooooooooo~~~~~~~~~~~~~嚟到最後一日行程﹗好在,早機去晚機返,搭傍晚六點左右o既飛機,都可以玩到下午兩點幾三點先開始去機場o既~

為咗節省時間,又就番我哋o既行程,我哋一早就執好行李,check out酒店,直接去涉谷站放行李入locker,再開始今日o既行程~涉谷站o既廣播好有幹勁呢,「shi-bu-YA~shi-bu-YA~」,個「ya」特別高音同大聲,令人諗起當年去九州時o既別府都一樣,車站入面o既廣播「bep-PU~bep-PU~」咁~(用文字描述唔知大家知唔知我講乜?﹗)

雖然只係路過,但呢度旁邊就有個景點,順道影張相啦~

第一次知道「忠犬八公」o既故事,係睇電影「NANA」時,娜娜幫奈奈改咗個花名叫做「八子」,話佢好似忠心等主人回家o既小狗咁樣,八公就係一隻忠心o既狗﹗主人死咗之後,都依然風雨不改咁等主人回家﹗我哋係佢o既銅像前面影張相啦~

之後就轉搭地鐵去築地市場lu~一般香港人去東京旅行都會去築地市場,去食下啲抵食又新鮮o既壽司嗰啲~但對我嚟講,築地仲有多一重意義呢,因為成日睇「將太的壽司」漫畫,呢度就係將太學習揀選食材o既地方呢,入面有好多故事﹗所以親切感特別大~同埋去睇下現實係咪同漫畫一樣囉~

影個招牌先~

一箱箱o既魚貨~

可能因為時間已經晏晏地吧,所以都冇乜交投活躍o既情境…不過,檔口的確好多,市場的確好大o既~但見唔到好多大大條o既吞拿魚o既情況囉~

不過都有wasabi專門店、魚刀專門店~

參觀完之後我哋去食壽司咯﹗為咗留肚食壽司,所以我哋今朝買咗個細細o既飯糰食咋~

成條街都係壽司店、魚生飯店~

有間專賣煎蛋o既鋪頭,我哋試咗佢o既三色煎蛋,入面有唔同餡料呢,好似係啲小魚乾、小蝦乾同埋海帶之類咁,都幾好味~

我哋幫襯咗呢間壽司弁富~

因為貪心o既緣故,我叫咗最大份o既set呀﹗

真係食到勁飽呀﹗壽司店有兩個師傅,老司傅負責握壽司,佢個partner就負責卷壽司、軍艦卷,同埋啲鰻魚壽司,鰻魚一早就烤熟,佢主要係烘一烘表面令佢焦焦地,同埋塗上汁汁~老司傅好有幹勁o架,完成一份壽司端俾客人時就大叫「登登~~」咁﹗見佢握壽司時真係喜孜孜o既呢~非常好﹗

食飽飽我哋去下一站,自由之丘~

途中經過目黑,「坐在目黑區深宵那個摩斯漢堡店,靜靜用著雙手談情然而漢字會一點…」

自由之丘,睇旅遊書時見到似一個悠閒、色彩繽紛、充滿外國風情o既小鎮…

入面果然有好多舒適o既街道,精緻o既小店,美輪美奐o既櫥窗,靚靚cafe~可以花好多時間慢慢逛呢~係度買咗送俾mandy同阿麟o既手造陶瓷杯做結婚禮物,又係另一間鋪頭買咗啲特別o既茶俾佢哋,好開心阿麟鍾意用隻杯呢~

當然要按圖索驥,去Sweet Forest食甜品﹗

都有少少難搵呢,因為個入口係building o既二樓~

Sweet Forest就似甜品o既美食廣場,旅遊書話有幾間鋪頭係長期o既,另外有幾間會不定時轉換,等大家長期都有新鮮感~

吸引到我幫襯o係呢間全部粉紅色,專門用士多啤梨做所有甜品o既鋪頭~你睇,個凍櫃一遍粉紅﹗:)

我叫咗呢款士多啤梨撻同埋士多啤梨茶~

connie就食咗另一檔o既炒雪糕,味道都唔錯呀~

食完都差唔多時間要搭車出番去涉谷,攞番啲行李就要搭Narita Express去機場lu~去到機場仲買咗少少手信呢~:)

回程時睇咗「複雜關係」,講離咗婚o既女人同前夫愛火重燃,都幾搞笑~

每一次去日本都滿載而歸呢,睇下幾時又再去過啦~

17-5-2010:東京埼玉trip day 3(part 3).秩父芝櫻之丘.池袋新派日菜

係宝登山都趕趕的,行完小動物公園都要拿拿聲聲落番山,要搭番秩父鐵道出去御花畑駅,即是接駁西武鐵道o既市中心區呢,因為我哋要趕係天黑之前去埋最後一個景點呀﹗

好在指示尚算清晰,我哋拎住重重o既行李趕過去…羊山公園﹗

去到羊山公園o既入口,見到夕陽了~真係要趕快啲呀,如果去到芝櫻之丘時天黑就乜都睇唔到啦~

去到羊山公園,原來要行去芝櫻之丘仲有一大段距離丫﹗但我哋已經好累了~~~~

好不容易嚟到…夕陽無限好~好~好~好~

卻是近黃昏…

其實芝櫻之丘o既最佳觀賞時間係四月上旬至五月上旬,我哋嚟到五月中,其實已經遲咗一兩個星期啦,只係hope for the best,希望仲有少少feel咁解,都唔expect會好似旅遊書咁靚~

好似已經甩咗色o既芝櫻之丘…

都可以想像到原本個樣o既…(扁嘴)

總算到此一遊啦~又點能夠時時都係最佳時份嚟到睇每一樣嘢丫~下次再嚟過囉~人生流流長~

呢一堆比較密集少少~

芝櫻o既近觀就係咁喇﹗其實都有好多種顏色呢,先至切到咁多pattern~

出番去同一個位置時,天已經黑得七七八八lu~

正好有車快要開出,我哋決定番到東京先食dinner~

池袋呢邊食肆林立,要揀一間都唔容易﹗connie唔明白(而且可能有少少躁:p),點解我話要揀呢間menu冇圖畫o既餐廳…佢話江戶前料理,價錢又唔貴,所以想試下囉~

點知「江戶前」,可能前前後後有啲我哋唔識o既日文字寫住「新派」之類…原來呢間餐廳o既氣氛係似間前衛o既pub呢,食o既係日本菜,不過有種新穎o既感覺…

點解menu o既菜式價錢唔貴?因為「未見官先打三百大板囉」,未order食物就送上呢個前菜,有一杯香檳同埋兩小碟,分別係豆腐同埋麵豉芝士?我都唔係好食得出添~味道係幾好o既,但係收咗每人五百幾yen?﹗

不過,樣樣食物其實都好好味o既~鰻魚飯、鯛魚飯、燒雞翼、豆腐~ok啦~

番到去都好累lu,又要準備之後o既行程﹗

待續

16-5-2010:東京埼玉trip day 2(part 2).i love 日式溫泉旅館@長瀞養浩亭

離開川越小江戶,我哋就搭番西武鐵道,向秩父進發,我哋訂咗o既日式溫泉旅館叫做養浩亭,為於秩父鐵道沿線o既長瀞,嗰度最出名o既就係嗰條長瀞溪,好多人專登去坐船仔o架~包括我哋﹗原來呢程車都幾遠,我哋轉咗車之後第二程好似都坐咗個幾鐘,結果?咪梗係瞓瞓瞓瞓瞓啦~

越向秩父進發,景色慢慢轉變,變得更多山同埋平房~感覺到大自然呢~

我哋要去秩父市o既御花畑駅轉搭秩父鐵道,秩父鐵道因為係地區路線,所以班次比較疏,一個鐘得兩至三班火車﹗

你睇,車站都比較簡陋,入站都係人手收飛o架咋~我哋去到時啱啱走咗班車,仲要係假日,所以等咗好耐﹗行李又重喎(因為係川越小江戶買咗勁多嘢﹗),所以又唔可以周圍行下,唯有係個站到呆等啦,又唔敢瞓著,驚瞓到miss咗班車,好在,有小iphone o既apps陪伴我awake﹗

其實最初吸引咗我選擇去埼玉,其實都好關呢個「芝櫻之丘」事,係旅遊書見到呢個漫山花海o既情景,好想去下﹗適逢今次又係五月去,雖然遲咗兩個星期…會唔會都可以睇到少少呢?大家想知o既就要繼續留意我之後o既blog blog~

好不容易…車來囉~好似要搭六個站左右,大約搭左四個字?﹗唔記得了~

但去到上長瀞駅時,天都差唔多黑齊啦~真係oh no no~好在我係google map印好咗地圖,我都事先知道車站同埋旅館o既地理關係o既~好在搵定咋﹗因為車站…同埋四周…零地圖﹗同埋零個人俾我問嘢﹗好在…都係一條路啫,雖然條路靜靜地,我哋兩個女子急急腳行,總算順利冇蕩失路地去到養浩亭﹗

哇,去到就覺得,噢,好值得呀~因為實在太靚了﹗今次係我今大個女以來最豪氣咁book o既旅館嚟o架~

先帶大家參觀一下我哋o既房間~

呢度係玄關位置,左手邊布簾入面係廁所同埋浴室,不過我哋一次都冇用過呢個浴室呢,沖咗兩次涼,兩次都係大浴場嗰度沖﹗hee,環境又靚,又有得浸浴嘛~

入屋要脫鞋子,但係旅館走動嘛,可以著上…膠屐﹗哈,表面上個樣係木屐,但其實係膠拖鞋,都幾舒服喎~

房間好大,即使之後鋪咗床鋪,張小几附近依然可以坐~外面仲有坐椅呢,第二朝至知道佢o既好處﹗不過呢,間房咁大間,個電視就細咗少少,我記得嗰晚電視有播「神奇四俠」﹗

好咯,安頓一下,我哋出發食dinner咯,你睇,因為係我預約o既房間,所以房門口貼咗「胡樣」呢~後來發覺原來旅館大門口都有o架~

今次book o既旅館包埋朝夕食,其實我都專登揀的,因為好喜歡呢啲日式大大份o既set,係香港真係一般價錢食唔到,上次同day去白濱時,即使係好平o既民宿,晚餐都好大份呢,真高興~點解我同connie要對角咁坐?

因為實在太多食物了~呵呵~真高興﹗

介紹一下先,右上係刺身啦,有魷魚、吞拿魚、白肉魚(品種唔識分啦~),中上o既天婦羅睇個樣真係估唔到佢係乜,原來白白色o既係腐皮蝦卷、黑色o既係菇菇、綠色o既係大家估得中o既青椒,左上o既係凍o既炸魚,骨比較多啫,左二左三都係啲醬醃菜啦,如果冇乜餸,呢啲濃味o既東東都可以配白飯食﹗左下o既係烤豬肉,味道有少少似德國咸豬手呢,中間o既係海鮮鍋,其實啲蔬菜仲好味過啲海鮮呢,因為吸收晒海鮮o既精華呀~

以下呢個要特別介紹﹗我哋一人有一個飯煲﹗服務員指手劃腳地同我哋講解,終於明白佢同我哋講,話,個火熄咗o既時候,飯就煲好了~

我小心奕奕地準備打開個飯蓋,影張相留念先,第三格o既我絕對係真情流露o架﹗忍唔住「哇」咗出嚟,原來唔係白飯,係野菜炊飯呀~~~~~~~~~~~oooooooooo~~~~~~~yummy~

呢碗飯嘛,唔駛有枱上任可o既菜式,都可以就咁食兩三碗丫﹗有野菜、飯亦用上湯嚟煲成,太好味了,可以當選枱上o既第一名﹗

晚飯o既餐廳~可能因為我哋比較晏吧,都唔見其他客人,第二朝早就有其他人都食早餐了~

真係食到勁飽呀~要休息一陣先可以去沖涼~

養浩亭o既浴場有內湯同外湯,外湯其實係半室外吧,因為就有蓋遮頭o既,不過就有個無敵大大大窗,可以望到外面o既樹同埋少少長瀞溪,亦可以呼吸到室外o既空氣,晚間涼涼的,浸起嚟都好舒服,外湯又有兩個池,兩度輪流浸下~爽呀~

浸時冇得影相,唯有copy佢個網o既圖片俾大家睇下啦,右下o既係內湯,因為外湯太吸引了,所以內湯都得唔到我哋垂青呀~呵呵~

日本人o既服務真係好體貼﹗我哋沖好涼之後,係換衫嗰度咁connie吹頭嘛,咁我其實prefer自然風乾啲頭髮,於是我坐係旁邊等佢,咁旅館o既職員到佢自己嚟沖涼喎,見到我冇風筒用咁,佢就令令林林跑咗出去,搵咗一個風筒俾我呀,實在太令人感動了~你話丫,日本令人想去完又再去,真係有理由o架~

我哋去食飯其間,旅館o既職員已經為我哋鋪好床lu~真體貼呢~

因為夜晚天氣夠晒涼,房間又有紗窗,所以我哋都冇開冷氣就瞓呢,溫度正適中﹗good呀~goodnight~

呢間好好o既旅館叫做養浩亭,大家如果會去秩父,一定要住呢度呀:
http://www7.ocn.ne.jp/~youkotei/top/top.htm

係網上就可以book+馬上confirm了~

待續

16-5-2010:東京埼玉trip day 2(part 1).踏足埼玉縣之川越小江戶

第二日我哋都好早就起身lu,因為要搭早啲o既火車出發﹗川越小江戶嗰邊應該都好多嘢行呢,而且黃昏時份仲要趕過去位於長瀞o既溫泉旅館喎,時間都係預鬆少少好啲~

我哋間酒店唔包早餐呢,所以提早出發去食早餐~見到呢間cafe樓下o既牌寫住,買任何飲品+百幾yen就可以有一份早餐,咁抵?好啦,就食呢間啦﹗

中咗計添,原來每杯飲品要六百幾yen呀﹗oh no no~我都未食過要六七十蚊港幣o既早餐丫﹗好在味道都好好~我哋叫咗兩款三文治,仲附上yoghurt同埋洋葱湯添~我此愛上咗抹茶鮮奶﹗環境都幾舒服…不過最遺憾o既係,唔好睇我哋好似好悠閒咁影相,其實,啲食物一到,我哋就狼吞虎嚥係咁塞入口了,因為要趕火車呀~

我哋搭o既火車,就係呢班特急小江戶,中間都冇乜停幾多個站,唔駛一個鐘就去到川越小江戶了~

呀,by the way,介紹一下,我戴住嗰條圍巾係先一晚係東京買o架,因為低估咗呢段時間係關東地區o既清涼程度呢,只帶咗件薄薄長袖外套,夜晚唔夠暖添,所以買咗呢條圍巾,除咗保暖之外,襯下衫都好丫~

係預備今次個trip時先發現呢件事呢~

話說同爸媽追劇集,睇過一套叫做「夫婦道」o既日劇,入面講一個家庭,佢哋開個茶園,賣手搓茶,有三個女一個仔,故事講呢一家人o既生活﹗佢哋就係賣狹山茶了,果然係狹山市附近,真係見到同劇集入面一樣o既茶田呢~原來夫婦道o既背景就係埼玉o既狹山市﹗所以二家姐八夜子可以每日去東京返工呢,都唔係太遠~

落車﹗

川越市係一個悠閒、寧靜o既小鎮呢~好乾淨、好清新~

街道都好舒服﹗因為地方唔大,雖然有旅遊巴士路線,但我哋都決定用一對腳﹗走向目的地之餘都觀賞賣沿途o既風景嘛~

上晝先去仙波東照宮同埋喜多院~因為唔熟悉日本歷史吧,所以背後o既故事都唔太理解,總之同德川家康嗰啲人有關o既地方啦~係入面住過乎?唔記得了~:p

對我哋嚟講呢度就係一個充滿住古老日式建築o既地方,都好有風味o既~

許願~

呢度有祈福o既地方,呢班大叔大嬸興致勃勃地敲響個鐘呢~

可以入裡面參觀,但裡面又唔准影相喎~所以…

哈,佢哋做咗狗仔隊﹗

入面仲有五百羅漢~各有各o既神態﹗右上角嗰個笑咪咪的,左下角嗰個:「吓?我唔知喎~」

試下食呢個大名燒~最初以為係蕃薯餡料…因為有個圖畫嘛,但個老闆嘰呢咕嚕問我
嘢,唔識答嘛,結果俾我哋嗰個係custard味呢,都好味o既,不過蕃薯係川越o既特產囉~

係招牌影番張相先﹗

我哋行出去川越o既「小江戶」嗰邊o既一番街~川越小江戶最出名o既係,嗰度充滿住江戶時期o既建築物~

連郵政局(右上)都係古代建築嚟o架~因為係遊客景點,所以有好多特產,美味o既小食,靚靚精品~人力車仲增加古舊feel呢~

鐘樓係川越小江戶o既landmark~呢張相係自拍王嚟o架~

我哋係呢間鋪頭食lunch~

冷烏冬同埋冷麵﹗好清涼呀~而且勁大份﹗食到肚滿腸肥﹗:p

逛逛菓子屋橫丁,呢度成條街都係賣糖果糕點餅乾零食o架~

其中有勁大碌o既黑糖棒棒﹗不過好似冇影到添~右下角o既可愛小妹係專登影俾day的~

最後參觀埋講祭典museum~

除咗展示祭典時要用o既巨型花車之外,仲有現場表演呢,似乎呢啲唔係專門嚟表演o既工作人員,而係真正o既村民﹗有音樂啦,又有著住戲服o既演出﹗不過啲音樂比較單調,環境又暗暗地,我哋又攰攰地…所以嘛…

打算逛多一陣~咦~

似乎有特別o既活動喎,promote川越小江戶o既function乎?有得平價試下地道美食,又有得玩,又有得影相喎~好熱鬧﹗我哋「唔識字」,冇走去排隊呀~

兩個人都累累地,我哋決定出發過去旅館lu~拿拿聲跳上一部巴士,返火車站去也~

待續~