28 & 29-8-2017:開學前3+1高雄假期day 4(part 2) & day 5.多一天的「旅程」

去到機場,即使係病病曉,依然好想坐行李車,仲係咁鍾意玩都係好事嘅~我哋見到新東陽,先買手信,跟住就搵個舒服嘅位置坐低~

曉好快就瞓著,早啲嚟機場果然係明智嘅決定,座位闊啲,冷氣舒服,周邊又有鋪頭可以買嘢食買嘢飲,廁所又方便又乾淨~我哋趁曉曉瞓著咗,食咗day 3企圖係便利店哄曉瞓覺時買嘅薯片(請參閱:27-8-2017:開學前3+1高雄假期day 3(part 3).城市光廊、私人好味拉麵店),再一齊jap多一包啱啱買嘅豬肉紙﹗:p我哋當然各自篤篤篤手機,乜都睇下,又打下機咁啦~

瞓到五點幾差唔多要check in,弊啦, 閱讀全文

27-8-2017:開學前3+1高雄假期day 3(part 3).城市光廊、私人好味拉麵店

離開駁二時我又好攰,曉又好攰,我覺得如果曉唔瞓一覺嘅話晚飯會有啲問題,我哋決定搵個地方坐低俾佢好好瞓一覺,之後先再去晚飯~咦,有一間大大地嘅便利店喎,有得坐低食嘢嗰啲,入面仲可以涼住冷氣,最裡面嘅位啲櫈仲有靠背添,可以慢慢坐,我攬住曉哄佢瞓覺,day就去睇下買啲咩叫做幫襯下~day買完朱古力奶同埋薯片返嚟曉都未瞓著,即是我哋冇得㗩㗩㗩住~播咗好多歌又轉咗好多姿勢,搞咗好耐又差唔多到晚飯時間,佢都唔瞓覺,媽媽投降了﹗

我哋搭的士直接去到城市光廊~城市光廊我都唔係第一次去lu,應該係中學時同爸媽去高雄嗰次有去過,今次呢個trip之中打算去嘅夜晚景點,我係舊嘅城市光廊同埋新嘅愛河之心之間,揀咗去我已經去過嘅城市光廊,因為我知道曉一定會鍾意﹗

落咗車見到第一樣嘅嘢係,有人街頭表演,原來係一班後生仔女,帶晒結他、鼓、音響等出嚟夾band,仲要有班自己人fans捧佢哋場,好熱鬧咁~一向睇啲藝人、youtube channel、facebook fan page等,好似見過好多好有才氣嘅台灣音樂人,點知原來學藝未精嘅台灣小伙子,其實同香港文化中心附近嗰啲充滿熱情嘅香港小伙子都冇乜分別,都係有啲⋯難聽﹗我哋每次經過時要急急腳行過先得⋯你哋要加油呀﹗其實呢,帶埋amp出嚟同大家分享音樂之前,可以係band房夾多啲先㗎~^^”

一pat攰攰曉開頭冇乜心機影相,只係伏係爸爸身上(但又唔肯瞓覺﹗﹗)~ 閱讀全文

27-8-2017:開學前3+1高雄假期day 3(part 2).cafe大豪客、駁二藝術特區遊蕩

落咗的士,去到駁二時,曉已經瞓咗覺了,我哋首先要搵個地方坐低,等佢瞓完個覺先~其實駁二藝術特區非常之大,仲分散得好廣,之前做功課做得唔夠,都冇乜target,的士經過駁二嘅電影院,不如睇下會唔會咁啱有咩戲啱睇,可以一邊抱住佢瞓一邊睇,咁就最抵喇~睇一睇節目表,得兩套戲係差唔多時間開場,但睇落個名都有少少恐怖咁,完全唔係我哋嘅口味~算啦,永恒嘅抱瞓地點⋯梗係cafe啦﹗

原來的士司機放低我哋嘅係大勇區,我哋入咗去駁二誠品入面嘅twotwotogo,坐低就買咗兩杯飲品,好好休息一陣,坐下、飲下嘢、篤下電話,輕鬆地過咗一個幾鐘~

day飲咗好瘦嘅凍綠茶,我飲咗甜蜜蜜嘅果茶,有啲新鮮水果係裡面真係可以篤出嚟食㗎~ 閱讀全文

27-8-2017:開學前3+1高雄假期day 3(part 1).免費玩壽山動物園

day 3嘅早上,我哋去壽山動物園,本來動物園都唔係我心目中個list嘅「必去」,呢個動物園唔算特別出名,上次去嘅北海道旭山動物園同新加坡動物園都咁正,好難唔比較~不過我編排行程時偶然發現27/8適逢七夕,原來做緊promotion,著住情侶裝或者親子裝入園嘅話,免費入場﹗﹗(雖然本來入場費只係成人每位40台幣⋯:p)咁抵,明明冇話特別想去,而家都忽然間特別想去了,我執行李時先拿拿臨加套親子裝落去,去得動物園,梗係著下上次去北海道旭山動物園嗰件大猩猩tee啦~

我哋食好早餐就出發啦~因為瞓得晏,去到酒店餐廳時要坐到去好遠,因為食得慢,所以差唔多十點時職員好殷勤地服務,甚至幫我哋斟埋咖啡同茶,曉呀,快啲啦,人哋開始預備緊午市啦﹗

之前一早search咗,我哋住嘅酒店好近嘅鹽埕埔捷運站就有得搭巴士去動物園,我哋係捷運站見到指示牌,架巴士要係離酒店遠少少另一個出口嗰邊搭,我手多多又search下google路線,原來嗰架巴士停捷運站之前,有一個站正正係我哋酒店門口幾步丫﹗太好了~唔駛行咁遠~嚟到原來係架小巴,但係可以企位嘅小巴,我哋上車時已經好full,明明周圍都係老人家,但其中一個婆婆讓座俾抱住曉嘅day,盛情難卻,我坐低咗抱住曉~真係好多長者,後來仲有一個用住walking frame行得好論盡嘅老人家上車~我哋估,老人家應該唔似去動物園丫,大概佢哋會好快落車吧?謎底解開了,原來佢哋去山腳嘅佛寺,好似好勁咁,因為仲有好靚嘅建築物有甚麼研修中心~跟住架車即刻好吉~

到咗壽山動物園啦~ 閱讀全文

26-8-2017:開學前3+1高雄假期day 2(part 3).六合夜市食食食

每次去台灣,都覺得要去過夜市先似去咗台灣咁,今次都唔例外,點都要去夜市掃下街~出發前我媽有講過,睇下夜市有冇嘢啱曉曉食啦,而事實上,曉曉食得嘅嘢比我更多,起碼佢食得蚵仔煎我就唔食得喇~我比佢叻嘅地方只係我食得比佢辣少少同埋我比佢相對肯試新嘢咋~

話說我地離開夢時代,諗住搭番輕軌出去捷運站,呢個時候我哋先發現原來輕軌運行咗冇耐,暫時未有得賣單程飛,我哋得一張悠遊卡,所以搭唔到輕軌,呢個時候只可以選擇搭巴士或者的士,雖然只係七點幾,但有好幾條巴士路線已經開走咗尾班車,剩低有運行嘅路線嘛,我哋對於啲地標同捷運之間嘅位置唔太熟,而家又冇得上網搵路線,day不停話「嗰架的士好似同我哋招手喎」之下,我哋就揀咗快靚正嘅選擇,直接搭的士去到六合夜市了﹗

六合夜市其實以前都去過,不過對上一次去⋯check番blog嘅紀錄,原來已經係2009年lu(請參閱:6-2-2009:第一站高雄.六合夜市),其間去過其他台灣夜市,我都唔係好記得六合夜市有咩特別~而家睇番2009嘅blog,原來我哋食咗嘅嘢同嗰次冇一樣相同呢,不過今次我依然有同day講過,飲果汁的話要睇清楚係咪新鮮果汁﹗

到咗六合夜市啦~ 閱讀全文