21-8-2017:我的韓語學習.邁向第七個學期

轉眼間學韓文已經學咗三年,由最初啱啱轉返part time時開始嘅韓語入門(1),坐住月嚟返學嘅韓語入門(2),到之後嘅基礎韓語(1)、基礎韓語(2)、中級韓語(1),去到啱啱完成嘅中級韓語(2)~

收到考試成績單,就可以報名下一個學期嘅課程啦﹗咁就嚟到高級韓語(1)lu~其實每個學期尾都有唔少人「到此為止」,所以班嘅數目會隨住級別呈金字塔咁上,越來越少~嚟緊呢個新學期,韓語入門(1)有20班,而高級韓語(1)就只剩番6班lu~希望星期四嘅班夠人開得成啦~

今日有曉曉陪我去九龍西分校報名﹗其實我由基礎韓語(2)開始已經要過海去銅鑼灣上堂lu,因為美孚、九龍灣都冇晒星期四嘅堂,最初覺得浪費多好多時間係交通上面,而家唔係唔浪費,只係習慣咗啫~不過第時bb出世後,可能因為路程遠咗,來回共兩個幾鐘車程+上堂3個鐘,我可能真係要帶定奶泵回程搭巴士時泵奶﹗希望到時曉曉好合作,等婆婆都仲可以湊住兩個support到我去返學啦~

雖然話要升「高級」,其實唔係真係咁流利㗎咋~當然,最基本嘅文法大多都學咗,唔同場合,對住唔同人要用咩語法,寫文章又要用咩語法等等都知道~不過實戰太少,我諗去到韓國都未必好得心應手~另一方面,我又覺得每過一個學期,睇劇時都會聽得到多咗嘅,最近睇嘅兩套都係古裝劇,本來睇古裝劇聽到嘅韓文比起時裝劇少好多,全靠啱啱嗰個學期其中一篇listening係講金斧頭銀斧頭嘅故事,入面嘅神仙同埋樵夫都係講古裝劇入面咁嘅對白,而家聽古裝對白又多少少~下次如果再睇時裝劇或者綜藝,可能會突然間發現自己聽到好多都未定﹗有一日day開咗Dave嘅youtube channel嚟睇,Dave係一個住係韓國嘅鬼佬,講好流利嘅韓文,佢嘅channel最多嘅片就係比對唔同語言嘅差異,韓文、英文、日文、中文等等,都幾有趣,可以開嚟睇下,我嗰日先發現原來我唔睇住畫面都聽到九成喎﹗

比較遺憾嘅係,學咗三年韓文,竟然呢三年間我都冇去過韓國旅行~有同學仔第一個學期時一學咗點樣order食物,就飛過去韓國同阿豬媽order烤肉了,太令人羨慕﹗明明學韓文之前連續兩年都有去韓國旅行⋯(請參閱:韓國旅遊blog)2014年開學時肚入面已經有咗曉,babymoon揀咗飛行時間短啲嘅台北,曉出世後頭兩個trip都因為參加婚禮而自動去咗馬來西亞同埋台灣,到2016年9月個trip我哋自己決定目的地時喇,係日本同韓國之間因為餓得日本溫泉太耐+怕曉唔啱食韓國嘢(因為當時仲未識得講「唔該走辣/少辣」,而家識啦~),揀咗去日本,2017年1月個trip嘛,因為北半球天氣太凍揀咗去新加坡,一直都未去,原本諗住曉返學前可以去到,一來肚入面有咗fufu,二來day公司太忙又請唔到假,結果都係未去到韓國,我諗我去到韓國時應該讀完高級韓語(2)了,到時會唔會一開口就好犀利?﹗^^”

九月曉就開學啦,係fufu出世之前,我每日多咗三個鐘嘅自由活動時間,而家計劃想用嗰啲時間嚟做運動、睇電影,仲有讀韓文﹗﹗希望今個學期可以讀得更好~yeah~

HKU SPACE韓語學習:

http://hkuspace.hku.hk/interest/languages/korean

14-11-2014:學習真好.한국어之進度

今日見到好耐冇見嘅大佬同事,吱喳一番,講到而家返part-time咁多時間有乜搞,我同佢講起學緊韓文~我好多blog都係「第一次xx」,似乎都應該寫下啲後續,如果唔係就顯得好似有頭威唔知有冇尾陣咁﹗其實由9月11日開學至而家已經學咗兩個月了(大家可以參閱番「有頭威」嘅blog:11-9-2014:韓文班開學咯~),冇做學生咁耐,原來學習真係好開心﹗特別係自己鍾意嘅東東同埋冇壓力嘅時候~考試測驗默書都唔會驚﹗IMG_5170

我嘅Quiz 1成績係--滿分﹗heehee~ 閱讀全文

11-9-2014:韓文班開學咯~

期待已久嘅韓文課終於開學lu~~~~好開心丫﹗

不嬲我都喜愛學語文,英文屬於正規課程入面,又冇乜特別花工夫,當年比起同齡嘅朋友仔做多嘅嘢相信係寫信俾我啲筆友吧,即使到F.5準備會考時,放學去到自修室,第一件事都係回咗信先,練得我(當年)寫英文文章特別快,除咗識咗啲外國朋友之外(有德國啦、韓國啦、馬來西亞啦、仲有拉脫維亞﹗),相信對我考試時作文都好有幫助﹗

普通話嘛,學校只有F.1正式讀咗一年,我主要嘅普通話訓練係細個時同爸讀書,我非常喜歡金庸嘅小說,我諗應該係高小定初中時?每晚食完晚飯後都拉住爸爸同我一齊讀「射鵰英雄傳」,每人用普通話讀一節,每日讀幾頁咁,慢慢越嚟越暢順了﹗近年令我普通話維持水準嘅應該係用手機打text,我估計打中文嚟講漢語拼音應該都差不多係最快嘅輸入法吧?smartphone點解咁smart,佢哋連詞語都認得,仲有學習能力添~最愛用頭一字母打晒成個詞語,你想打「劉德華」,打「l-d-h」就出來了,當然同時都會出現「李登輝」啦,你揀就ok了~點都快過倉頡or筆劃吧?(我又離題了⋯>_<“)

後來學嘅外語係西班牙文﹗F.3暑假嗰年去多倫多讀summer school,識咗啲南美朋友,墨西哥啦、委內瑞拉啦,返嚟就想學西班牙文﹗爸爸有位NET teacher同事識得有個大過我嘅姐姐學過西班牙文,最初就以私人補習方式學過一排,嗰陣都好用心㗎,個個星期要過去火炭度學,後尾好似個姐姐唔得閒定要去外國讀書,唔記得了,就中斷咗了~直至到大學時再正正式式係HKU嘅Language Centre學西班牙文學咗兩年幾,係year 3時太忙所以中途放棄咗~

近年超迷韓劇、Running Man、K-pop、韓食,早已蠢蠢欲動想學韓文,適逢今年年中轉返part-time,人冇咁忙可以學啦~其實早於七月時已經報咗名﹗九月正式開學﹗係CU同HKU嘅持續進修學院之中我揀咗HKU SPACE,主要係每星期一堂而已,每堂三個鐘,唔駛一星期出去兩次,而且我揀咗嘅上課地點係美孚,交通比較方便~如果認真學上去,可以讀三年,到時去韓國旅行應該可以講得非常自在,而睇節目分分鐘可以唔駛睇字幕添~

開學之前要預備一下,要買課本:

204122126

課程採用嘅Active Korean係英文教學嘅韓語學習課本,可以係「尋韓者」買到, 閱讀全文