29-11-2014:懷孕扎記19w0d.屯門醫院產前講座(7).產前及產後運動

S醫生幫我同BB呱定時檢查之餘,佢都提醒我哋可以去聽醫院定時舉辦嘅產前講座﹗上望睇一睇個schedule,原來一系列嘅產前講座總共有七講,每三個月一個cycle咁進行,而呢個時間點就正正係cycle嘅尾端,只剩下第七講產前及產後運動咋喎,都好丫,反正呢啲早啲聽有用,其他甚麼生產止痛呀、育兒知識呀就遲啲至學啦﹗

IMG_5274

原來全部講座都係星期六,大多數係下晝,good,即是day都可以一齊參加,只有第七講係上晝,今日day要返工,我自己去再如數家珍咁講番俾佢聽啦﹗heehee~

講座係日間中心嘅演講廳舉行,都好多準爸媽+其他親人參加喎,我諗都坐滿咗三分之一~講者係物理治療師,內容方面都好多樣化,講解懷孕時肌肉骨骼嘅變化(好似啲荷爾蒙影響韌帶變鬆呀、因為大肚子而影響身體重心受力位置呀之類)、常出現嘅痛症徵狀啦(最常見嘅腰背痛呀、韌帶拉伸時嘅痛楚呀、因為懷孕多水腫而產生嘅腕管綜合症呀、生產後照顧baby常出現嘅媽媽手呀等等)、產前產後運動、日常姿勢方面要留意嘅東東、生產過程嘅非藥物止痛法等等⋯

其中我印象最深刻嘅有幾樣啦,通常講產前運動大家都會只記得甚麼預防腰背痛呀、預防生產後滲尿嘅會陰肌訓練呀嗰啲,治療師特別係講呢啲之前強調孕婦都應該好似一般人咁繼續進行帶氧運動﹗﹗都係一星期150分鐘中等強度,步行、健身單車、游水都係非常好嘅選擇﹗呢個都提醒我要勤力番啲呀~

另外一部份最學到新嘢嘅就係生產時嘅呼吸法,原來生產唔同階段時各種呼吸法都可以幫助減少痛楚(實際運作情況究竟work唔work我四月後再話俾大家知),我而家打呢篇blog都當抄埋notes啦,到時唔記得都可以click番出嚟溫習﹗1st stage of labour--即陣痛開始、子宮頸開始張開時,小痛就用平時練瑜伽都會練習嘅腹式呼吸,鼻吸鼻呼,慢慢吸氣到肚子輕輕脹起,呼氣時肚子變平(應該係back to baseline);中痛時就用胸式呼吸,吸氣時胸腔脹起,呼氣時返回原狀;大痛時就用肺尖呼吸,雙手交叉輕輕搭係鎖骨上面,吸氣時感覺肺尖輕輕脹起~至於差不多開到10度,超級大痛時就要用「哈哈呼」呼吸,輕輕吸兩下,然後長長的輕輕的好似吹蠟蠋咁用口吹氣出來﹗不過以上呼吸都係痛緊時先用,陣痛之間唔痛時正常呼吸就ok了~至於進入2nd stage of labour,有子宮收縮要push時就吸大大啖氣然後忍實,push--push--push--直至冇氣,馬上再吸大啖氣繼續,repeat直至呢一波嘅子宮收縮結束為至,睇下彩數呢個過程要重覆幾耐啦,到BB出咗嚟之後就進入3rd stage of labour,即是疴番個胎盤出嚟,呢個時候只要放鬆等助產士or醫生幫你就好了﹗呢個係我憑聽書之後記得嘅寫低,大家切勿當秘笈丫﹗﹗

其實產前運動嘅個別動作治療師反而冇詳細講,因為我哋嚟緊有兩堂實習班﹗雖然要請假減少收入(換句話講呢兩堂好貴﹗﹗),但聽個大綱似乎好有用,所以都報咗名參加~第一堂只需要太太們自己去,學啲產前運動,第二堂就要陪產嘅老公們or家人們一齊出席,因為會講生產時嘅東東,好似用生產球呀、止痛器呀、丈夫幫太太按摩嘅方法呀等等⋯到時我再打blog blog同大家分享丫﹗

屯門醫院婦產科產前講座:

http://www3.ha.org.hk/tmh/ch/services/02_01_obs.asp#s6

前往其他懷孕扎記blog

Comments

comments

發表迴響

你的電子郵件位址並不會被公開。 必要欄位標記為 *