11-11-2014:懷孕扎記16w3d.兩個孕媽媽的約會

我大概懷孕8週時,Facebook上面睇到大學時代同我同住五年嘅Helen公佈好消息,原來佢已經有咗baby了﹗當時我嘅心情七上八落、患得患失,即使係咁親嘅Helen我都冇辦法好好恭喜,抱歉地只係click咗個like一下~心裡面知道,我應該打個電話恭喜佢,or at least都send個message或係個FB post度留留言啦,不過當時做唔到呢⋯

直至我都公開得嘅時候,我哋終於聯絡上了﹗所以就約好咗今次嘅約會啦--只有一個細細肚子嘅16週孕媽媽同埋一個大啲肚子嘅28週孕媽媽﹗

去到商場揀下食咩,日本菜唔食得生嘢就費事食啦,同層嘅又有兩間餐廳裝修,加上我哋去到時間尚早,有啲餐廳未開門做晚市,結果去咗中式酒樓叫餸食飯啦﹗侍應生問飲咩茶--水丫唔該~

大家好耐唔見,加上有相近嘅經歷當然雞啄唔斷啦~女人果然有啲peer support係好啲﹗由患得患失嘅心情,食嘢邊啲食邊啲唔食,身體甚麼變化甚麼不適,買孕婦裝孕婦用品BB用品心得,產前檢查點點滴滴,第時安排點樣坐月邊個湊BB,同事與工作環境嘅support⋯乜都講下﹗有個相同處境嘅好朋友一齊分享下,好高興呢~真係好多嘢係當事人至會明白,好似點解懷孕嘅女人點解咁sensitive,少少嘢又會咁擔心之類⋯老公都只能夠完全相信你、支持你,但未必可以明白你囉~

話說約會前一晚我拉肚子疴咗幾次,可能嗰日連續食咗幾樣油膩少少嘅嘢⋯明明有廿幾卅年攪肚經驗,但有個BB呱係肚子裡面嘅時候,個肚(今次which is條腸)一痛就會非常緊張,明明疴咗出嚟之後鬆晒都不期然會心慌慌~慘~所以我好期待嚟緊3至4週後嘅「第一踢」﹗到時候時時感受到BB郁動就會放心得多了~(其實而家都好咗好多㗎啦,呢一兩個星期我唔再問我呢個係肚定腩,因為已經越來越明顯了~:D)

最sweet嘅係我哋say goodbye時,Helen會同我BB呱講byebye呢~:)

前往其他懷孕扎記blog

Comments

comments

發表迴響

你的電子郵件位址並不會被公開。 必要欄位標記為 *