15-10-2014:懷孕扎記12w4d.第一次產前檢查

一個月前拎住referral letter去健康院預約,覺得呢個日子好遠好遠,時間一直過去,終於嚟到呢個日子了﹗既然係正式第一次檢查,叫老公請埋假一齊去啦~

首先係小便問題,預約時已經講咗自己帶早餐前小便去,我諗咗好耐用咩容器好⋯^^”想問下有經驗嘅媽媽用咩載去?有諗過用party紙杯,用完就丟掉乾手淨腳,但冇蓋喎,雖然只係過一條馬路嘅距離,好似有啲論盡⋯最後決定用一個舊嘅調味玻璃樽,呢段日子每次用完都洗啦,最後一次就掉咗佢啦~>.<記起之前冇乜幾多次驗小便嘅經驗,嗰陣係HKU做research subject次次去要驗小便,佢會俾個一次使用樽你係嗰度留specimen,乾手淨腳,而職員亦會好謹慎地戴手套至幫你驗尿~至於健康院?姑娘們更乾淨﹗哈,原來係全自助,你去到自己拎兩張試紙自己點落啲尿度再自己計時,夠鐘俾姑娘遠遠用眼尾望一望就ok了﹗

去到健康院除咗驗小便之外,第一件事就係度高磅重同量血壓,原來真係vasodilatation,血壓比平時好似仲低咗呢~我做完呢幾件事時啱啱有個簡短人奶講座要開始,姑娘就叫我聽埋先了~

之後就係漫長又漫長嘅等待啦~見姑娘,問好詳細嘅病歷同埋資料,又介紹下之前派嗰本健康資訊書仔~waiting area位又唔係好夠坐,入去見姑娘又冇位俾老公坐,我叫day去返工算了⋯等醫生等好耐丫,好在帶咗書去睇﹗終於見了,原來只係簡短嘅摸肚同聽doptone,每次聽到BB呱嘅心跳聽都好開心呢~原本好似就此結束,因為如果唔問就之後follow up都唔會再見醫生,追住佢講番之前手術嘅complication事宜,佢諗咗好耐先load到咩意思,最後決定我下一次檢查去咗屯門醫院先,都好嘅,去見下啦~DSCN0203

成個過程我覺得最impressive就係離開嘅一剎那﹗落到樓下就有個大嬸衝過嚟問,你係咪大肚媽媽?二話不說就話要同我填表加入媽媽會s,好快速咁問我哋個人資料,當你有少少猶疑時佢就會強調,有禮物㗎有禮物㗎,最搞鬼嘅係,你一心諗住填完簽完名完成,佢會叫埋附近啲「同僚」過來,其他媽媽會嘅大嬸並唔係競爭者,而係朋友,佢會大叫「喂,仲爭美素佳兒呀,美素佳兒過嚟呀~」務求六大奶粉商都全部簽齊,最重要係「唔好蝕俾佢」,我估計佢哋係按人頭計佣吧~結果1分鐘之內我就拎咗一大堆禮物係手囉﹗呵呵~反正今時今日啲資料都唔值錢㗎啦,我自己唔賣俾你都有其他人賣俾你~DSCN0204

最後一站係去藥房,原來有得免費拎Materna﹗﹗原本一樽100粒嘅Materna係藥房買要二百幾蚊,而家免費嘅產前檢查仲可以免費拎到補品,咪話香港嘅醫療福利唔好﹗﹗

下一次聽到BB呱心跳聽係10日後,屯門醫院見~

前往其他懷孕扎記blog

Comments

comments

在《15-10-2014:懷孕扎記12w4d.第一次產前檢查》中有 2 則留言

  1. 香港醫療(包括福利)一向都很好,所以香港人無論男女,壽命長都是享譽國際的。

    • 係呀,不過好多人唔了解就覺得「等到死咗都未有得睇啦」,卻不知道分流其實幫到好多急切需要嘅人,如果認真急嘅話,公立都會好快處理到﹗我覺得要保障健康,要有好有能力+有心嘅家庭醫生,再平時儲多個錢,等家庭醫生幫你諗,幾時可以等公立,幾時要俾啲錢係私家做,咁就好了~

發表迴響

你的電子郵件位址並不會被公開。 必要欄位標記為 *