17-9-2014:懷孕扎記8w4d.預約產前檢查

轉咗返part-time就冇咗HA嘅醫療福利了,彷彿多咗個option,要唔要係私家醫院生baby?仲未決定要係公立定私家生,星期一睇咗嘅私家婦產科醫生先幫我寫咗轉介信去公立醫院排期,好趁早安排12週左右嘅檢查~

我唔知道區區有唔同,原來屯門元朗天水圍嘅太太們要預約產前檢查,係去地區嘅母嬰健康院而唔係直接去屯門醫院的,我呢個HA職員反而白白去屯門醫院走咗一趟添~不過都冇話損失好多,因為最就近嘅母嬰健康院就正正係我屋企樓下﹗上次陪好朋友金金做產後檢查我就去過一次啦~IMG_4973填好資料就直接俾咗個12w4d嘅日子我去健康院做第一次產前檢查,仲即是俾咗「迎新資料包」我添~返到屋企打開,哇,原來內容好豐富噃,有一半都幾厚嘅「孕媽媽產前實用手冊」,包羅萬有,前中後期+產後資訊都有,衛生署出品,內容當然正氣啲同evidence based啲啦~仲有母乳餵哺小冊子、健康飲食小冊子、產前健康資訊視像光碟,大家知道嘛,香港居民嘅產前檢查係免費㗎﹗大家唔好乜都話政府唔好唔好啦,就呢方面福利我就覺得唔錯喇~

預約檢查仲要part 2,原來都要過去屯門醫院走多一趟,book咗母嬰健康院之後先可以過去醫院book 12週左右嘅唐氏綜合症screening,唔,搞掂了,連續兩日做檢查呢~screening對我哋嚟講都係叫做得個知字,因為我哋兩人早就有共識,無論baby狀況如何,我哋都一定會接受佢的,當然如果好唔好彩有咩殘缺,早啲知道都可以預備得好啲~

未來呢四個星期希望BB呱安安穩穩的成長,「What to Expect」app話佢而家係rasberry嘅size,期待你變大粒啲、再變大粒啲﹗健健康康的~媽咪錫錫~chu~

前往其他懷孕扎記blog

Comments

comments

在《17-9-2014:懷孕扎記8w4d.預約產前檢查》中有 2 則留言

  1. 人生就是一連串的期待,期待中可能要面對困難、乏味、艱辛,但只要有信心、信任、信靠,加上無所企求的、源於心底的愛,這期待將會甘之如飴,滿懷幸福的。孩子將來的每個成長階段,都是這樣。看來,你們都做好了心理準備。

    • 期待的話人生就充滿樂趣,但期待換成等待就永遠都唔滿足現狀了~

發表迴響

你的電子郵件位址並不會被公開。 必要欄位標記為 *