離開珍珠港我哋都好快上咗返威基基嘅巴士，只有一個座位，我唔客氣了，呼呼大睡恢復元氣先，辛苦day要企一陣了﹗差唔多返到威基基開始塞車，可能因為星期五晚吧，大家都要出去玩～係塞緊嘅巴士上，發覺無論係中國人定鬼，中老年女人都係特別容易同陌生人搭訕嘅類型，三個唔相識嘅女人就開始吱吱喳喳，仲要撩下問路嘅後生仔添﹗

好不容易返到Aqua Skyline at Island Colony，我哋今日有重要活動，除咗標題見到嘅慶祝之外，我哋仲要搬酒店，其實嚟緊住三晚嘅Park Shore Waikiki都係威基基，如果Island Colony算係中間位置，Park Shore就係東邊嘅邊緣，Google map話兩間酒店之間步行只需要17分鐘，所以我哋拎住行李應該都係廿幾分鐘咋啩？大概ok嘅～為咗碰到少啲其他行人，我哋沿住運河，去到Paoakalani Avenue先轉番出去海邊～好容易就搵到角落頭嘅Park Shore Waikiki了﹗

之前都有講過點解要住兩間酒店，因為威基基啲酒店都幾貴，但好似點樣都應該住一次望海嘅靚靚房間，為咗降低成本，決定「先苦後甜」(幸運地苦都唔苦喎～)，所以我都好期待貴啲嘅Park Shore Waikiki，既然要住得好，索性揀咗oceanfront房型﹗睇圖片真係無敵無敵大海景㗎～

又好幸運地俾咗我哋住頂樓嘅房間，個view更好，更寧靜～講房間size梗係upgrade咗嘅Island Colony大好多啦，但Park Shore Waikiki呢間房雖然比較細，總算乾淨舒適，設備齊全，更重要嘅係⋯

我所期待嘅海呀～～～～～～完全冇令我失望﹗﹗少有地，呢個露台我哋真係好充份咁利用同享受呢，貴都值得～:)

我哋係高座嘅頂樓，其他房間嘅露台都一覽無遺(奸笑)，亦清楚望到酒店游泳池(我哋一次都冇游過呢)，同埋馬路對岸嘅Honolulu Zoo，我哋露台可以望到紅鶴池㗎﹗

呢個海灘view係我最愛，我呢幾日狂post係Facebook就係呢個view，日頭夜晚日落好似都有﹗

仲可以望到Diamond Head，左邊嗰個山頭就係了﹗我哋聽日就去行山啦～敬請期待﹗

Park Shore Waikiki嘅網站：

http://www.parkshorewaikiki.com/

好，我哋出發了～

樓下沙灘有我非常喜愛嘅雕塑﹗人類同海獅一齊游游游﹗後來返到嚟香港，又咁啱係網上見到真實版嘅video呢，非常cute﹗

http://youtu.be/97McCuWAynA

我哋結婚1000日慶祝活動嘛，先去食餐好嘅，再去海邊睇煙花﹗之前諗去邊度食有考慮過去旋轉餐廳，點解？純粹係貪佢旋轉﹗﹗似乎係較正式嘅餐廳，價錢又比較貴，要食我想試嘅夏威夷魚生要點貴嗰款餐至得，唔係好捨得，同埋又要訂位至保證到好view，都係決定揀上次去海灘時經過嘅Sheraton Kai Market餐廳，Kai食自助餐，菜單入面有poke呀﹗poke就係夏威夷醃魚生了～

朋友問，點解你哋會知道結婚1000日嘅？咪就係因為結婚前已經裝咗個倒數app囉，結咗婚之後就會順序繼續數﹗家姐見我慶祝1000日佢又學下我哋，慶祝2500日，仲話爹媽miss咗12345日添﹗day話，咁我哋唔好唔記得慶祝1234日先～哈﹗

雖然冇訂枱，我哋六點左右就到咗Kai Market了，厚面皮問有冇得坐外面，我都估到好多人訂枱都會想坐外面，好在職員都分到一張「位置不算太好，總算係外面望到海」嘅outdoor枱俾我哋﹗我都好滿足啦～

Kai Market嘅網站：

http://www.sheraton-waikiki.com/dining/kai/

點飲品先，day叫咗椰青水，我就要咗Virgin Pina Colada，係少咗啲啲酒味啫，都充份展現熱帶風情～正﹗

食物都好精美又豐富，果然係Sheraton﹗價錢同香港啲自助餐差不多啦，標價US$58一位，連埋15%小費、飲品，每人大概HK$500鬆啲啦～要特別介紹右上角嘅刺身，就係我特別想試嘅poke喇，甜甜辣辣嘅醃醬，加上鮮美嘅吞拿魚赤身，正﹗另外同係夏威夷食品嘅係左下圖類似湯渣嘅東東，好似係葉子包住嘅炖肉，我覺得⋯味道都係湯渣味，not recommended⋯:( 甜品特別嘅係有大福丫﹗可想而知有幾多日本人，確實，食自助餐嘅客人之中應該有90%係日本人﹗

滿意又高興嘅晚餐～

我哋甜品食得有啲匆忙，因為要趕及七點九去睇煙花﹗其實無論係唔係結婚1000日慶祝，星期五晚我哋都係決定睇煙花喇，事關與其話睇煙花，不如話大家都「R煙花睇」，因為逢星期五晚，Hilton Hawaiian Village Waikiki Beach Resort都有自家show，而show嘅高潮就係10分鐘左右嘅煙花匯演，網上資訊話由Hilton Hawaiian Village至Outrigger一段嘅威基基海灘都可以睇到煙花﹗﹗我哋就由Sheraton沿住海灘過去嗰邊咯～

天未黑齊嘅海邊景色非常醉人呢～

好美好美嘅天色﹗

開始了﹗我哋全部都係「R合之眾」﹗

人人人人人～到尾段煙花都好熱鬧精彩呢﹗多謝Hilton服務大眾～:D

之後我哋慢慢逛街，慢慢散步返酒店～

之前應該有介紹過威基基嘅ABC Stores，今次我哋遇到最大間嘅ABC，買咗大部份嘅手信呢，真好～

標誌夏威夷嘅滑板～

每晚返到酒店幾乎都有呢個環節﹗因為海風太舒服，海景太美妙，兩人一齊坐坐談談太浪漫～仲有不得了嘅滿月plus倒影呢，如果係勁勁相機+勁勁攝影技術就更加不得了﹗

待續

前往其他美國旅遊blog

Comments

comments