今日又係要超早起身嘅一日﹗我哋今日遊珍珠港～點解要咁早起身？因為上網睇資料話，搭船出去Arizona Memorial每日限2000免費門票，每日早上7:00am開始派發，先到先得～睇啲人嘅experience真係有機會會拎唔到飛﹗﹗我哋都有少少緊張～雖然話有少量門票可以網上預約，但講緊係好早好早就已經俾人reserve晒囉～要7:00am去到好似有啲困難，我哋就6:00am起身，幾點去到就幾點啦～

輕便早餐之選﹗﹗見我哋食完又食，可想而知呢個睇落單純嘅musubi其實幾好味～:p今次試咗加雞蛋口味～

我哋尋日去Polynesian Cultural Center係Waikiki Trade Center等shuttle時，見到有巴士直接到珍珠港，所以我哋就係嗰度等車，非常lucky，等唔夠三兩分鐘就有車了﹗(大家要知道，車嘅密度一般係半個鐘以上一班，所以我哋真的好好彩﹗﹗)珍珠港位置比機場再遠少少，所以起碼要搭大半個鐘，day對抗巴士睡魔不嬲比較薄弱，冇義氣丫，我又要睇住幾時落車唔敢瞓，你又zzz﹗﹗﹗

到了﹗原來有好多人落車呢～而且呢架車直情有個站係Arizona Memorial，即是會兜個彎入到去裡面落車～之前睇旅遊書都知道唔准帶袋入去memorial，一定要寄存，估唔到收US$3一個咁貴﹗﹗我哋二合為一節省50%，yeah～後尾都好慶幸佢強制寄存，行得耐咗拎少啲嘢都冇咁攰～

第一件事，拎飛先﹗﹗我哋到時好似都只係八點幾，但我哋拎到嘅門票係⋯

十一點半﹗﹗其實呢個時間都理想嘅～因為門票包廿幾分鐘嘅紀錄片同埋搭船來回去Arizona Memorial，而要maximize個trip嘅價值就係要了解背景歷史多啲先，我哋正好用之前嘅時間逛咗兩個博物館先～租用咗audioguide，出發﹗今次好好呀，有得聽中文(當然係普通話啦)，我哋有時覺得自己學咗英文咁多年，同鬼溝通都好自在，無數個考試、無數工作上用嘅東東全部都係英文，英文應該好ok丫，但每次去到聽audioguide時，偏偏就係聽普通話會得到多好多資訊，我諗係因為參觀呢啲歷史文物時，太多專有名詞吧，都係中文會方便啲，而且冇咁容易聽到攰～

Tree of Life

我哋去睇博物館了﹗

如果睇過珍珠港電影or熟讀歷史，大概就會知道珍珠港事件，其實係1941年12月7日，日軍係無預警之下襲擊美軍駐守嘅珍珠港，准確啲講，日軍其實除咗襲擊停泊珍珠港嘅戰艦之外，仲有歐胡島嘅其他軍事建築～係意義上，因為係偷襲，所以傷亡慘重啦，其中仲有平民遇害，另外亦逼使美國正式加入第二次世界大戰，而係軍事歷史上，亦見證咗航空母艦嘅崛起，戰艦嘅沒落～

專心睇展板中⋯

原來日本攻打珍珠港，主要係為咗攻打東南亞而鋪路，東南亞有大量天然資源：礦物啦、橡膠啦、石油啦等等，係日本本土非常缺乏嘅物資，但如果日本攻打當時係歐洲各國殖民地嘅東南亞地區，太平洋嘅美軍勢力就會阻止，要損耗美軍勢力嘅唯一方法就係要攻打珍珠港，而要成功就一定要突襲﹗

不過原來美軍唔係完全detect唔到日軍來襲㗎，當年無綫電技術尚未成熟，要人手繪圖，將唔同時間detect到嘅target plot係地圖上面，當時無綫電detect到有東西接近緊珍珠港，操作員報告上級，事關確實當日有自己友飛機會由美國大陸運送物資到歐胡島，所以上級冇進一步verify嗰啲飛行物體就回覆，嗰啲係自己人，唔駛驚，點知就出事了～

日軍嘅航空母艦模型

睇咗「永遠的零」小說之後，對於海軍戰機嘅戰鬥方式知多咗好多，而對飛行員嘅辛酸亦多咗另一層次嘅了解，以前接收嘅資訊就係：日軍=殘酷=為完成上級指令/奉獻國家可以捨棄自己，係「永遠的零」入面，當然故事都係有參考啲真嘅資料搜集，有啲係作者虛構㗎啦，多咗描述飛行員嘅心理狀況，日軍變得更人性化了(而我亦覺得講得合理嘅)，多咗一份同情⋯

偷襲珍珠港嘅攻略係，航空母艦靜悄悄盛載大量戰機到歐胡島附近，戰機再靜悄悄飛緊target，襲擊﹗

專登影一下航空母艦模型上戰機嘅升降，係「永遠的零」入面，外公係一個飛行員，有人話佢係膽小鬼，有人話佢係最佳嘅飛行員，技術嘛，大家都話佢一流～係航空母艦升降同係機場升降係兩回事，因為航空母艦會不斷移動，又會晃下晃下，而且跑道短好多，要多啲技術，其中有啲飛行員係練習之中就係技術唔夠都可以意外身亡(唔係英勇戰死喎，而係自己操控飛機唔掂⋯)，而外公就技術好好，降落時飛機嘅轆要鈎住地上嘅鐵鍊，外公就可以降落係最近嗰條鐵鍊度，維修人員就更多空間更方便去處理戰機了～我影嘅就係鐵鍊&戰機了﹗

呢度講咗日軍想到手嘅東南亞天然資源～

睇完一個展館出嚟透透氣先～哇，有兩架大戰艦停泊係岸邊呢，可以另外購買門票參觀㗎～

嗰張自拍王睇得冇咁清楚，再影多一張啦﹗

日軍係戰機上帶嘅武器其中有空中投放嘅魚雷，一戰機帶一魚雷，轟炸淺水區停泊嘅戰艦～

呢個唔知係日軍定美軍嘅魚雷了～ 

到咗我哋出發去Arizona Memorial啦～

首先睇咗紀錄片先，因為係由舊影片剪輯而成再配上旁白，氣氛比較灰暗，加上熱熱天氣之中有得涼下冷氣，成個人放鬆晒，我估我都睇咗80-90%嘅～:p

船程我諗都係十分鐘左右，到咗飄浮於亞里桑拿號上面嘅紀念碑了～

為保持莊嚴嘅氣氛，大家都寧靜地參觀～

亞里桑拿號嘅遺骸～

仲隱約見到水底嘅框架～

聽著叫人心碎難過嘅解說～

巨大嘅戰艦冇辦法全部打撈上來，戰艦遺骸，仲有當年嘅軍人都埋葬海底了～

入面有個紀念小禮堂，牆上刻咗亞里桑拿號上嘅軍人名字，而倖存的，當時放假唔係船上的隊員，佢哋過身後，名字都可以光榮地刻係上面，最近期嘅好似係兩三年前㗎咋～數一數年齡，當時係1941年，如果18歲從軍的話，存活到而家都好老了，應該都仙遊得七七八八了～

Arizona Memorial優美嘅外型～

返到嚟visitor center呢邊仲有啲戶外嘅展品～呢個模型講嘅係，當時除咗珍珠港受襲之外，仲有歐胡島嘅其他受襲位置～

呢度寫上當日遇害嘅人嘅名字，除咗軍人之外，亦包括後勤人員同埋平民百姓～

睇咗展館其中一樣最深刻嘅事就係襲擊以後百姓嘅生活，係1941年嚟講，夏威夷已經係一個多種族匯聚嘅社區，佢哋唔係中國人，而係American of Chinese ancestry，佢哋唔係日本人，而係American of Japanese ancestry，但問題係，一發生咗事，嗰啲美藉日本人即刻受到排斥，本身嘅軍人被解除職務，而平民百姓亦遭受懷疑，究竟你哋係咪賣國賊？﹗真係好慘囉，佢哋可能根本就係忠心嘅「美國人」，腦中不住響起許冠傑嘅「移民外國做二等公民⋯」，希望今日移居外國嘅人受到嘅待遇會好啲啦～

我哋參觀嘅珍珠港正名係World War II Valor in the Pacific，可以去官方網頁參觀，有多啲資料：

http://www.nps.gov/valr/index.htm

待續

前往其他美國旅遊blog

Comments

comments