28-7-2014:加州婚禮+夏威夷day 3(part 1).Campbell小鎮百年古蹟散步

7月27日完成咗珊珊嘅大日子,28號我哋就走咯,進入我哋旅程嘅下一階段﹗今次一場嚟到美國,梗係好好玩一次至走啦,係planning嘅好初期已經諗住順道去夏威夷了,對於呢個又美麗海灘、火山等自然美景,又有特別風土人情嘅地方,早已非常嚮往了~我哋三藩市飛檀香山嘅飛機下晝三點左右起飛,前往機場嘅shuttle十二點半左右嚟Campbell Inn接我哋,所以我哋仲有一個早上可以係附近行下~SONY DSC

呢兩晚係Campbell Inn都住得幾舒服丫﹗呢度仲有泳池添呢,我哋都冇時間游下添~泳池旁啲桌椅後面就係食早餐嘅地方了~IMG_4676

我哋係度食咗兩個早餐,都冇好好介紹添~食物種類都算好標準啦,麵包、cornflakes、腸、煙肉、蛋、水果、乳酪咁,我最欣賞嘅係佢提供搽麵包嘅醬料有好多種﹗除咗一般嘅牛油呀果醬之外,我今日搽咗cream cheese呢,另外咖啡方面,有榛子口味嘅牛奶,我就整咗杯榛子朱古力,哇,勁甜~~~自助早餐嘛,照計唔可以拎食物出外面,但我哋發覺除咗中國人會好貪心之外,有部份鬼佬其實都一樣,我哋見有啲住客拎啲1.5L膠樽入嚟,裝滿咗果汁返房囉⋯我記起之前睇嘅一本實錄書,叫做「我在底層的生活」,講一個美國女作家想採訪一下低薪人士嘅生活,最切實嘅資料,莫過於自己隱藏身份、學歷、財產,親身去做一次低薪人士,佢話最辛苦嘅係住屋問題,因為冇大筆少少嘅錢嚟做按金,所以租唔到一週租or一月租嘅單位,變成好多同事都反而要租日薪嘅motel之類,成本更高,呢啲拎嘢飲入房嘅會唔會係呢啲辛苦嘅人?(陷入想像中⋯)不嬲都唔喜歡美國嘅小費文化,佢哋有「公價」小費,雖然好似好自由任你俾,但其實唔俾又唔得,睇完呢本書之後,發覺佢哋都好慘,少啲小費連生活都有困難,俾小費都覺得感覺好啲~(不過幾個鐘之後又出現我討厭嘅小費文化了﹗﹗)

其實出發前我都花唔少心思研究過我哋day 1同day 3嘅自由時間可以點用,始終Campbell係小地方,我哋又冇車唔去得遠,附近玩樂嘅地方好似唔多,做咩好?結果day 1下晝太疲倦,冇自己出去,settle down之後都係等食飯,所以我預訂嘅Campbell行程之中,就揀啲嚟day 3早上進行啦~SONY DSC

行出去Campbell Inn過去downtown方向,馬上就見到呢條緩跑徑了﹗之前諗住day 1行晒啲歷史建築,day 3就不如去做運動啦,可以去Los Gatos Creek Trail跑步﹗呢條trail由San Jose延伸好遠呢,散步又得、跑步又得、放狗又得、踩單車又得﹗係香港唔走上山的話都難啲有咁嘅地方呢~想知多少少可以click入:

http://www.sanjoseca.gov/index.aspx?NID=2872SONY DSC

影下Campbell Historic Downtown個招牌先~

後面路軌嘅閘唔係裝飾㗎,真係會有輕鐵過而關閘,我哋馬上就碰到佢關閘了~SONY DSC

冇錯﹗係同屯門元朗天水圍好似嘅輕鐵~上次去巴塞隆拿都有坐過輕鐵呢,嗰次係草地上行駛,好正~(請參閱:1-11-2013:西班牙day 2(part 2).狂熱西甲之巴塞vs愛斯賓奴打毗)SONY DSC

沿住我計劃嘅路線,會經過好多Campbell嘅歷史建築同埋市政服務單位,首先見到嘅就係Campbell Library喇﹗但今日星期一,要下晝一點至開門丫﹗香港人勤力(另一方面睇⋯係做死人)好多了~SONY DSC

佢哋有好多story time俾唔同年齡呢,你睇,最細嗰個group係baby time fore prewalkers﹗﹗我而家幫緊兒童崇拜嬰兒組嘛,同人哋講我哋啲B滿咗月就可以嚟,識得挨住坐就可以落地聽故事唱歌敬拜,人哋都覺得好神奇,咁細個邊度識㗎,nonono,佢哋識㗎﹗﹗你睇,美國都有俾prewalkers嘅小組活動啦~IMG_3181

到咗Ainsley House,如果你search Wikitravel或者Tripadvisor,基本上Campbell嘅places of interest就只有Ainsley House同埋Campbell Historical Museum,極限加埋Water Tower,可惜星期一早上係全部都唔開放的(that’s why我本身諗住星期六去囉~)~Ainsley House建於1925年,係當年一個係Campbell好有建樹嘅人嘅舊居,我哋今日只好參觀外面、影下相了﹗想知多啲可以click入:

http://campbellmuseums.org/ainsley-house

Ainsley House對我嚟講最大嘅印象係,花圃啲花好多種類,好茂盛,好靚~~SONY DSC

不愧係加州陽光養大的~flowers

款款都好嬌艷呢~SONY DSC

靚~SONY DSC

係呢度又遇到一位老太太主動話同我哋影合照呢~雖然草地有少少多,人仔又少少細,但都係難得嘅合照嘅~thanks~:)SONY DSC

City Hall嘅鐘樓﹗

話說我係度search Campbell有咩地方行嘅時候,搵到表演場地嘅網頁,呀係呀,嗰個叫做Heritage Theatre,原來珊珊上頭嗰晚係嗰度有選美嘅預選丫,仲可以網上買入場券,贏咗嘅地方佳麗應該可以入圍加州小姐?定係中間仲有一兩級?總之如果佢好勁有機會成為美國小姐甚至世界小姐㗎﹗當然我哋梗係去捧珊珊場啦~SONY DSC

Campbell Historical Museum以前係消防局,呢個博物館嘛,星期一早上--唔開門~SONY DSC

原來未熟嘅綉球花係咁嘅~SONY DSC

Campbell嘅水塔﹗Wiki嘅描述係,水塔見證咗Campbell曾經係一個小鎮嘅歷史~我只係覺得個水塔好似Sim City入面起嗰啲﹗﹗SONY DSC

影咗好多張先略算成功嘅自拍2人+水塔,之前嗰啲嘛,唔係唔見咗個水塔又唔見咗半邊面,果然我哋冇乜自拍天份,自拍王就有我份~(自拍王嘅定義係放部相機係某啲東東上面,好似垃圾桶之類再用10秒倒數~)應該一早拎個iphone出嚟影~SONY DSC

Campbell Downtown--應該係全鎮最熱鬧嘅地方了,兩旁好多食肆咖啡室,好似好多都幾好味咁,不過我哋冇機會試下啦~SONY DSC

好欣賞呢間二手書店,打點得好企理呢,書都分門別類,實用書、小說、兒童書乜都有﹗佢哋有wanted list張貼出嚟,大家有嗰啲舊書都contribute下啦~我最欣賞嘅係佢有手動「genius」功能,你知iphone嘅genius啦,你平時鍾意啲乜佢會recommend你有機會喜歡嘅俾你,呢度啲書架都有﹗「If you like…, you may also like…」大家唔駛睇嚟睇去都淨係嗰一兩個作家嘛~SONY DSC

經過埋Campbell Park就返到Campbell Inn了﹗大大嘅綠草地,可以係度做運動真好~唔係有空地就要起啲建築物係度啫,屯門市鎮公園啲嘢密密麻麻地,而家都好似冇乜幾多草地了~係度見到美國家長同香港家長嘅唔同﹗美國嘅遊樂場會有得俾啲細路玩水玩泥沙,香港家長恐怕會覺得太污糟而唔俾啲細路玩吧?SONY DSC

Campbell Park係Los Gatos Creek Trail嘅其中一個入口,前面馬上就係Campbell Inn了﹗

我哋最後執拾埋啲行李,提早少少落定lobby等車咯~係lobby又撞番契媽呢,同佢又再吱喳咗一陣﹗see you~

待續

前往其他美國旅遊blog

Comments

comments

在《28-7-2014:加州婚禮+夏威夷day 3(part 1).Campbell小鎮百年古蹟散步》中有 4 則留言

  1. 這就是旅遊業經常在談論服務費和小費的分別,服務費就有如我們的加一,小費就是加一以外的BONUS,美國最討厭的就是要你自己計服務費,張單無寫好似俾得無咁心甘情願,如果好似香港計加一咁直接計埋落張單度咪仲好,唔駛煩~

    • 我今次去發現有唔少餐廳都係6人以上會自動幫你加埋18%落去張單度,少啲人嘅party就要自己計,好啲嘅都會電腦出埋18%就幾多錢、20%就幾多錢之類~不過我覺得既然係compulsory就不如計埋落張單度啦,搞到我又要時時都預備好多散紙(有呢個苦惱可能係因為太孤寒﹗)~

  2. 好充實的一個早上!不過就算圖書倌、博物館星期一開館,也沒時間逛啦!
    我覺得美國的貼士要客人自己計,好麻煩,特別是像我這種超怕數字的人。

    • 快速逛囉~應該都唔係好大,收費都係US$2,睇下小鎮歷史都好丫嘛~
      計數我就唔怕,問題係深深不忿~

發表迴響

你的電子郵件位址並不會被公開。 必要欄位標記為 *