啱啱係明明車上呼呼大睡嘅幾位乘客，半睡半醒之際發現架車慢慢向上坡行，睇住車嘅GPS，咦，已經去到Skyline Boulevard，差唔到lu喎～一落車，就明白點解呢對couple會揀呢個地方行結婚典禮﹗周圍就好似去到郊外，展望出去都係翠綠嘅樹木，入去新娘房搵珊珊之前，入去聖殿睇下先～

wow～世界上最美最美嘅裝飾，莫過於天父創造嘅大自然﹗﹗人嘛，用方法去展現大自然美嘅一面就夠了，祭壇後面嘅落地玻璃就係藍藍嘅天、綠綠嘅山，加上今日非常晴朗嘅天氣，100分﹗不愧教堂叫做Skyline United Church of Christ，有興趣知多少少關於呢個教堂可以click入：

http://www.skylineucc.org/

吸引咗我嘅除咗有靚景之外，我仲發現教堂嘅佈置，一個個花球上面都有一對對好可愛嘅雀仔喎，影～影～影～後來同珊珊confirm，果然一隻隻都係佢自己一針一線咁縫出嚟㗎，藝術細胞+一對巧手，我真係恨都恨唔嚟⋯

未駁好音響我哋未練得歌，去新娘房探下珊珊，我哋又休息休息先～因為教堂裡面冇冷氣，新娘房嗰邊涼啲啲，而且好大，又有好舒服嘅梳化，真係差唔多瞓著咗﹗

珊珊嘅靚靚婚紗，係訂造嘅呢，所以好fit好適合佢丫﹗by the way，我結婚後成日都同要結婚嘅朋友講，敬酒記得要揀有肩帶嘅晚禮服，因為好大隊人一齊行，難免會踩到你條裙腳，low cut得嚟條裙又唔夠挺嘅話就上身容易走光，今日我見到珊珊著呢套婚紗之後，我就要俾多個advice，婚紗都係揀裡面有藤圈嘅好啲，因為禮成步出教堂之後，new couple要奔番入嚟，有藤圈先至跑得輕盈㗎～姊妹們留意一下呢啲經驗之談啊～呵呵～

我哋敬拜隊嘅陣式﹗哇，我都未試過揸住個咪唱成幾首歌呢，希望一切順利啦～揭下程序表，呢個唔駛問，呢對熊貓馬騮couple插畫一定係珊珊嘅傑作丫﹗

各就各位，準備開始咯﹗

首先係兩位媽媽點燃燭光～

花仔花女伴娘們進場，好可愛嘅小朋友當然會成為全場焦點啦，大家都笑咪咪呢～

終於到新娘子啦～:)見到珊珊非常sweet嘅笑容呢～

我哋唱詩、讀經、聽道理，終於到咗最莊嚴而隆重嘅一部份﹗

一對新人握住手，相對望，立盟誓﹗每每參加婚禮時，都會喚起我哋結婚當時嘅記憶呢～要永遠相愛啊～

恭喜一對新人﹗﹗啪啪啪啪啪～～～

珊珊一早就用我預告過，婚禮後嘅茶點，好－－好－－味－－㗎～既然我哋嘅影相次序係「其他親友」，即是有好多時間啦，呵呵，出去捧下珊珊場先～原來茶點係戶外嘅樹蔭之下，呢啲luxury真係外國至有～果然好多款式，睇得又食得﹗﹗yummy～我最愛串烤大蘑菇﹗食物就冇影相啦，因為太忙碌jap jap jap＋唔好意思影了，始終咁多其他賓客～:p

好嘢，有得同珊珊& Bill影張合照﹗我哋自己部相機跌咗個閃光燈(冇錯，係舊年8月去泰國時跌的，所以之後幾個trip我哋影啲相都係完全冇用閃光燈的了﹗﹗)，所以個人少少黑囉，珊珊，知道了嗎，記得俾番官方相機嘅相我啊～

sweet couple～～

大家自在的享用美味茶點～

原來花園地下都有佢哋嘅裝飾呢～

幫手少少收拾，我哋坐番明明架車出發去晚宴嘅酒樓～今次學到新嘢，原來要清理滴落嚟嘅蠟，用冰塊去抹一抹啲蠟會容易啲從表面刮出來，應該係因為凍凍嘅冰塊令蠟更加硬吧～

教堂落山嘅高地，正好俯瞰Bay Area，我哋望落去嘅水就係Bay Area嘅「bay」啦，即是金門大橋包圍住嘅港灣，晚宴嘅地方就係海邊，個view又係靚到嚇死人，大家記得留意我下一篇blog咯～

待續

前往其他美國旅遊blog

Comments

comments