早於古晉trip同北京trip都未firm時，呢個美國trip就已經出現咗，事關，好朋友珊珊於美國加州嘅婚禮要舉行咯﹗既然我同day呢段時間都可以有假期，就去捧捧場啦﹗一場咁遠去到美國，更係唔可以去一去就返嚟啦，順便去邊度玩好呢？加洲三藩市周邊、拉斯維加斯早幾年都有去過，我哋兩個都唔識駕車，恐怕去美國其他地方都係要再轉飛機，與其係咁，閃出嚟係我腦海就出現咗－－夏威夷﹗呢個天氣好、風光如畫嘅地方，我早就想去了，聽落就覺得會好悠閒、好relax～good﹗﹗因為要去程三藩市，回程檀香山，我哋搵咗菊姨訂機標，於是今次我哋會搭韓亞航空，經首爾飛三藩市，而中間駁三藩市去檀香山嗰程就我哋自己用Priceline訂咗Delta嘅內陸機，之後就由檀香山再經首爾返香港了﹗

點解美國嘅trip個blog title會係「第一站首爾」呢，因為我哋去程會係首爾轉機，中間transit時間有11個鐘，我呢個韓迷梗係唔會乖乖地留係機場啦，何況仁川國際機場個蒸氣房我哋以前就(蠢蠢地)去過了(請參閱：14-4-2012：首爾濟州櫻花遊day 7．笨蛋的奇遇)，有11個鐘，絕對有足夠時間入境去玩丫﹗首爾嘅detail大家記得留意下一篇blog啊～

今次又係凌晨機，我哋起飛時間係凌晨一點鐘，所以先一晚十點左右就要由屋企出發啦﹗時間咁夜，day仲可以照返工，放工返嚟悠閒出街食個飯(悠閒到食咗「牛角」嘅燒肉﹗﹗)，返屋企沖個涼至再出門口﹗行李都多多地，除咗我哋自己嘅兩隻喼之外，要幫珊珊由香港帶套裙褂過去，同埋佢嘅禮物﹗怕寄行李寄失，破壞咗人哋一生人一次嘅完美婚禮，我決定hand carry套裙褂啦，所以一袋二袋的～

搭機場巴士去機場ing～

到咗機場﹗指定動作﹗

我哋班機delay丫～我係度「哎吔」嘅時候，day話都唔係delay好多啫，平時delay少少係唔怕，但我怕我哋嘅首爾trip會太匆忙嘛～

因為已經夜深，day等上機時已經呼呼大睡了～

今次第一次搭韓亞航空，我考慮嘅係，飛機餐會唔會有韓國美食？以前搭大韓航空時有拌飯食的﹗呢程比較短，只搭三個幾鐘，機艙舒適度就中等啦，我哋附近仲要有一大個吱吱喳喳嘅家族，我都怕佢哋會一直嗡嗡嗡，好在後尾settle咗之後大家都安靜了～上次去釜山搭釜山航空嘅凌晨機時，短短嘅機程係冇飛機餐食的，所以今次我都expect上機瞓覺，瞓醒落機～

未起飛時已經昏昏欲睡，起飛後當然不省人事啦，估唔到再著燈時唔係抵埗，而係食飛機餐﹗對韓亞航空飛機餐嘅第一印象唔係幾好，雖然食咗人生第一次嘅飛機粥，但個牛肉碎粥好似唔記得落調味料咁，極淡，西米布甸又得個甜字，好在後尾去美國嗰程挽回我嘅歡心啫～

個人仲係半睡不醒時，已經係首爾嘅早上了，good morning Seoul～

待續

前往其他美國旅遊blog

Comments

comments