24-5-2014:古晉學習行day 5(part 2).不一樣的Mirage Spa

食完lunch,聽埋下晝嘅最後一堂plenary session,我嘅WONCA行程就結束啦,因為決定唔去參加closing ceremony了~

的士司機準時嚟接我,非常好﹗我叫佢載我去Hills Shopping Mall~下晝有我非常期待嘅節目呢~From the very beginning今次決定一個人嚟嘅時候,就想睇下有冇機會去做個spa,上次同家姐去曼谷,做咗個非常非常正嘅spa,成個人煥然一新﹗(請參閱:19-8-2013:即興曼谷day 4.至高享受Oasis Spa)希望今次都係走之前做個spa,精精神神又靚靚咁先返香港,於是上網search下就搵到呢間Mirage Spa,係Tripadvisor都有好多人有正面comment,應該ok啦,本來係香港時就send咗e-mail想做定reservation,唔知係個e-mail荒廢咗定點,一直都冇回覆,所以我第二日買咗電話卡之後就預約好了,好期待啊~

anyway,時間未夠,我周圍逛下先啦~因為Hills Shopping Mall位置上好近Mirage Spa,諗住行商場行到夠鐘就算,點知如的士司機所講,真係冇乜嘢好行⋯

SONY DSC

啱啱商場有歌唱比賽,聽咗一陣,但馬拉話歌嘅審美同我哋唔係好同吧,感覺咦咦哦哦的,我都聽唔完一首歌就好奇有咩其他嘢睇了⋯

SONY DSC

歌唱比賽正後方有個art exhibition,但係圍住咗呢,我只係外面望望咋~

個商場完全比唔上The Spring或者City One,啲鋪頭直情吸引唔到我行入去添,所以我由商場呢個入口入,直接由嗰個出口出⋯出到去睇睇GPS,我搵到Mirage Spa嘅位置,認好路,之後夠鐘就可以快快返嚟啦~行出去waterfront⋯

SONY DSC

咦,發現咗個「華族歷史文物館」bor~免費入場﹗入去睇下啦~原本都冇安排呢個行程,而家順道睇正好了~

雖然只係間小小嘅平房,但都幾多嘢睇喎~解答咗我有啲心中嘅疑問~博物館主要講古晉本地華人嘅東東,首先介紹佢哋幾時移民過嚟啦,由邊度嚟嘅啦,係咩人,佢哋嚟到從事咩行業啦等等,又講下華人嘅傳統節慶呀、音樂呀、藝術呀咁,又有啲interactive嘅,可以聽下唔同方言,聽下啲樂器嘅聲音~以免費入場嘅博物館嚟講實在超額完成﹗可惜入面唔影得相,冇得留留記念~之前講過啦,古晉嘅華人多係客家人同福建人,day嚟到的話就如魚得水了﹗我只識得講「wa zai ya~(我知道了)」同埋「ya ba~(好飽呀)」仲有「ya luag~(好熱)」⋯哈~

SONY DSC

華族歷史文物館再行出嚟就係waterfront了,坐一陣啦~

SONY DSC

呢種雀仔香港好似冇乜點見過bor~

SONY DSC

忽然有一堆健壯嘅男士踩住單車過嚟,個個都咁大隻嘅,哦,原來係警察⋯只敢趁佢哋走咗先敢影⋯:p

SONY DSC

行返過去Mirage Spa時見好多商店都關咗門,莫非因為係星期六下晝?

SONY DSC

到咗Mirage Spa了﹗我話呢,古晉啲路有時真係好難搞,好似好多building都預你駕車出入,唔預你行路的﹗Mirage Spa就係其一了,行條小路去到附近會忽然冇咗路的,跟住就要行坑渠過去入口了,好在冇路嗰段路都好短~我上次打City One嗰篇blog時都唔記得咗講,我行完商場打算出番去大街截的士,但搵唔到路出返去囉,商場正門通去停車場,但停車場係架高咗的,你行去停車場邊緣就係車路出入口,冇行人路的,行車路好危險嘛,我又搵其他路,但都失望而回,最後返去customer service求救,原來你自己唔駕車的話嘅正答係要call的士,咁的士就會泊係正門對出了﹗噢~咁住係附近嘅居民點算呢?﹗

講番Mirage Spa啦~我坐低之後,職員先奉上杯薑茶俾我休息休息~佈置好得意呢,有啲假樹同埋毛公仔馬騮爬係樹上面,扮嘅應該係沙勞越嘅熱帶森林吧?我訂咗嘅係三個鐘嘅「Mirage Palace Tropical Spa」package,網上標嘅價錢只係RM260,如果質素好好的話,咁就仲平過上次曼谷Oasis Spa好多了﹗負責幫我做Spa嘅Lily帶我去等候室後面嘅足部按摩區,先做咗foot spa,熱水足浴、磨皮、磨砂,感覺我對腳重生了,又滑又香又輕盈呢~

之後就入去spa room,呢個完全唔能夠同Oasis Spa比了,雖然裝修都企理乾淨,但始終係密閉房間,唔似得上次Oasis Spa咁開揚舒適,呢一刻我已經決定,等泰國政局穩定番之後一定要盡快去捧下佢哋場了~body scrub同body wrap都係呢間房進行,我唔係好明白點解scrub完wrap完都要用濕布抹乾,俾我去沖個quick shower唔係更節省時間嗎?後來到浸浴部份我就明的了﹗Lily幫我包得好好的,然後帶我去浸浴嘅房間,原來好遠下﹗﹗要經過reception再穿去另一邊,跨過大雨天操場(Mirage Spa有瑜珈堂上,我估計就係呢度上了)先去到浸浴~浸浴就叫我大開眼界了,入到去浴室有個大大地嘅浴缸,有機器接駁入水,Lily一開著個機器,啲水就翻騰起來﹗﹗﹗捲起嘅「浪」有成10-20cm高﹗﹗如果平時嘅泡泡浴係「chemical泡泡浴」,呢個就係「physical泡泡浴」,day就問我,係咪好似按摩浴缸,umum,強度係5倍左右吧﹗好在我生得矮得嚟腳都唔算太短,可以撐得住浴缸尾嗰條邊,如果唔係就會係入面遇溺﹗哈~我係度諗,呢度啲水已經將我打到鬆晒,之後仲需唔需要按摩乎?係入面時間好似過得好耐咁,我後來先realize Lily應該較咗時間掣,但我係機器關掉之前就自己上咗水抹身了⋯好激動~同Oasis嘅relaxing浸浴果然係不一樣丫﹗之後嘅全身按摩就非常非常好了~我揀咗lemongrass精油,感覺最有熱帶風情,又refreshing~真係只按咗個半鐘吧?感覺上由頭到腳都冇一部份忽略呢~難怪Tripadvisor上面有啲人話嚟古晉幾日,幾乎日日都嚟按下摩了~

大家可以去Mirage Spa個網頁睇睇:

http://miragespa.com.my/

唔一早call的士嘅壞處就係好耐都冇的士了,等咗差唔多半個鐘(又)⋯因為的士太叫人困擾,原本想去埋Jalan Satok嘅Sunday Market先返去,都係決定放棄啦,去The Spring食埋晚飯就算啦~

IMG_4174

我成日都唔明點解The Spring地下啲餐廳咁少人食,上到food court就明了,原來好旺﹗﹗好full﹗﹗

IMG_4175

有十幾間鋪頭,我行一圈之後都係好冇大志咁食咗chicken rice,好似都係最吸引同最抵食,原來係高級商場呢,chicken rice依然賣得好平﹗RM5.9一碟,只係比起我之前街邊食嘅RM5貴咗少少,不過味道就冇RM5嗰個咁好啦,可能係mass production,啲雞一早炸好吧,冇咁新鮮熱辣,而配菜亦孤寒少少~(冇影碟飯係因為同人搭枱,本地人見我影碟咁普通嘅chicken rice好似會小odd⋯)

IMG_4179

飲品counter太多人了,我決定出去搵嘢飲﹗發現呢間「Easy Drink Easy Go」,係台式飲品店,有我最愛嘅烏龍奶茶丫﹗雖然貴過碟飯,但都ok啦~兩個小伙子係入面做嘢真係慢條斯理⋯「Easy」係咪講緊員工呢?定係香港人太心急?﹗我就諗,如果佢哋係誠品嗰間茶店做嘢,好快俾人炒魷,or人哋未炒佢之前佢哋就頂唔順要辭職⋯我俾好錢等飲品時,有對夫婦就見佢哋慢吞吞,納悶到變咗紅色走咗了~

飲住烏龍珍珠奶茶返酒店,返到去好好休息啦~之後嗰日就搭飛機返香港咯﹗去到呢個時候我已經歸心似箭啦~

待續

前往其他馬來西亞旅遊blog

Comments

comments

在《24-5-2014:古晉學習行day 5(part 2).不一樣的Mirage Spa》中有 4 則留言

    • 唔知道係咪個個,因為未聽完一個就決定走了⋯:p可能後面嘅參賽者驚為天人都未定﹗
      啲水真係好激動㗎~開始時都舒服嘅,但同啲水對抗耐咗就覺得有啲攰⋯

    • 泰國穩定番晒就要去探下佢了~Oasis Spa好正,即使去番同一間spa,做同一個treatment都冇所謂﹗

發表迴響

你的電子郵件位址並不會被公開。 必要欄位標記為 *