影到貓貓雕塑之後我決定要出番去河邊，要搵個靚位搭舢板過河喇﹗心目中要過去近觀下Astana啦、嗰個金光閃閃嘅政府部門啦、Fort Margherita啦，同埋我好想去嘅Cat Museum都係河嘅對岸，咁係咪會順路啲？陣間你咪知囉～

呢架就係我搭嘅舢板喇﹗

其實船程極短﹗個船夫撐啱個方向就開摩打，推進隻船大概半條河寛佢就會關摩打，由得啲inertia帶隻船過到對岸，再略略調整一下方向就ok了﹗我覺得個feel好似來往香港仔同鴨脷洲嗰啲街渡，不過呢啲舢板仲細隻﹗只係坐到十個人左右，而且要彎住腰先坐到入去～我知道收費好平，係岸上都有啲告示話每程馬幣$0.4，我都唔係好信平到咁，到我俾錢個船夫佢冇異議時我至相信﹗

過到河嘅對岸好似另一個世界咁了，之前仲咁熱鬧繁華，點解一落船變咗小村莊嘅？

雖然叫cat city，但佢哋先至係我嚟到之後見到嘅第一隻同第二隻貓bor～

係村子有路牌指向Fort Margherita，所以我(暫時)都好放心⋯

Fort Margherita係1879年建成，有英式風格，當時係起嚟對抗海盜，後尾輾轉變成警察博物館～我當時熱到暈暈乎，又見到有啲佬係度搞緊啲工程，肚子又開始有啲餓，我都冇乜心機走入去參觀個museum，只想快啲去到我目標想去嘅Orchid Garden咋，諗住既然係個garden，應該有啲餐廳呀、小食亭呀之類咁，可以補充下體力﹗

但係由Fort Margherita開始就冇路牌指示點行去Orchid Garden，根據google map + GPS定位，我應該沿住條路行就啱，但又見越行越荒蕪，有少少驚，行番轉頭去個村落度問個大叔，佢好有自信咁指我向一個方向，跟住佢講咁行又更偏離GPS嘅位置，已經熱到晒到爆炸，我裡面曾經盤算過，如果有陌生人offer我某啲嘢時我應唔應該接受之類⋯正係度躊躇之際，有一架經過嘅私家車停低問我去邊，我話去Orchid Garden，嗰位係包住頭巾中年女士，載住兩個放學嘅小朋友，佢話好遠㗎叫我上車，我見呢個combination好可靠咁，就相信咗我出路遇嘅今日第二位貴人﹗﹗多謝你丫﹗﹗果然好遠，原來google map顯示嘅Orchid Garden雖然同我當時嘅位置好近，但個入口係另一邊﹗唔坐佢架車可能要行多半個鐘﹗﹗佢車到我去入口，真好～

就係呢個可惡嘅Orchid Garden入口了﹗原來佢都有網址呢：

http://www.dbku.sarawak.gov.my/modules/web/page.php?id=98&menu_id=0&sub_id=119

見到啲靚靚嘅蘭花，就原諒佢冇清晰嘅指示啦﹗話晒佢都係Tripadvisor入面，古晉嘅34個景點之中排名第9㗎～我一入去Orchid Garden嘅範圍，見到裡面有個「Cool Garden」定「Cool House」(應該係greenhouse嘅相反？)嘅指示，即刻向嗰個方向行，睇下有冇得cool down下我﹗入到去，umum，應該由34度降到28度左右吧？都係熱﹗﹗﹗﹗﹗

實在太熱太晒了，我行完最密集花花嘅範圍之後就返出去出口了～嗰邊有少少展板～

原來Orchid Park係度擴充緊呢，我哋參觀嘅係phase 1，其實phase 2而家都動緊土了﹗

好似香港嘅花卉展咁，呢度都定期有插花比賽同埋園藝比賽喎～

熱熱熱熱熱熱熱⋯直到⋯有佢﹗降晒溫＋補充電解質同糖份丫﹗正～

離開Orchid Garden要搵路走，行番出河邊就應該冇錯啦，今次更近距離見到Astana呢～

一年大多數日子都唔開放俾公眾，所以我只係路過影張相咋～

跟住又到咗迷惘嘅時候了﹗因為⋯行出大路不太見有車or的士，而有個碼頭唔sure有冇舢板會靠站，好在第三個貴人出現了﹗其實都係我問佢先嘅，不過佢非常friendly同helpful，佢係個馬拉藉嘅壯年男人，英文仲好好添～原來呢度有舢板搭，佢話呢個位置係冇的士㗎喇，佢advise我坐番舢板過對岸先再截的士去cat museum～之後都吱喳咗少少，直至上舢板時佢碰到個friend～

落船見到呢個舢板浮雕～其實做呢啲船夫收入都好微薄呢，雖然幾分鐘就一轉船，但每個乘客只俾$0.4，要載幾多個至夠養家呢？

本來我已經餓到腳軟(下晝兩點幾了)，但見到郵局﹗有時呢啲嘢真係可遇不可求～我早上時又買咗postcard，梗係寄咗佢先啦，如果之後幾日都再冇郵局就要帶番香港，親手交俾佢哋啦～

見到嗰個紅毛丹郵票，發現原來馬來西亞多年來冇乜點轉過郵票嘅樣式呢，因為佢喚起我埋藏已久嘅記憶，我中學時好鍾意寫信俾筆友，雖然已經有e-mail嘅年代，但我哋有一班人係會用internet嚟搵「snail pal」嘅筆友的，我的其中一個penpal就係馬來西亞嘅華人女孩了，佢寄俾我嘅信就係同呢款差不多嘅水果郵票啦，好似係菠蘿？我都唔太sure了，返娘家時應該可以搵得到﹗﹗而家的中學生仲知唔知道咩叫做penpal㗎？好嘢嚟㗎，全靠時時寫英文信，連放緊假預備公開考試時都照寫﹗所以我公開試作文寫得好快，執筆快，構思嘅時間、proof read嘅時間咪更加鬆動囉，正﹗不過最叫我著迷嘅都係係期待係信箱來自遠方嘅信唧時刻﹗

我餓到再更腳軟一啲時就搵到食嘢嘅地方了，係個好似大排檔咁嘅地方，我俾喇沙吸引住了⋯呢度嘅感覺就好似當年夏叔叔一家係吉隆坡去過嘅嗰啲大排檔咁～(請參閱：30-12-2006：吉隆坡．遊客眼睛的另一面)

有冇搞錯？﹗馬幣$6一碗嘅laksa咁精美嘅？仲要有三款餸，有蝦有雞肉有腎，早知有腎就叫佢走腎啦，我都唔食就浪費咗了～好好味﹗湯底濃得嚟恰到好處～

食住laksa時老闆問我飲唔飲水，我見仲有少少之前Orchid Park買落嘅飲品就話唔駛了，但食兩啖抬頭望一望，再食多啖再望，另一檔嘅飲品真係幾吸引，第一二位係三色奶茶同埋蜂蜜菊花茶，我午餐先飲咗第一位，晚餐時有機會飲埋第二位，真好～

正﹗三色最頂層係牛奶，中間嗰層係茶，佢話最底嗰層係「special」，即是咩？好似係啲有少少澀味嘅糖漿，mix埋總之好夾啦～呢杯奶茶馬幣$2.5，即是呢餐只係$8.5咋﹗乘番2.5就知道港幣幾錢了﹗超抵又滿足～

大排檔就有呢個戲台係度，係咪過時過節會係度做大戲呢？

待續

前往其他馬來西亞旅遊blog

Comments

comments