7-11-2011:斐濟蜜月day 1.前往浪漫之境

結婚兩週年都已經係半年前慶祝咗,我以為我呢個蜜月blog會徹徹底底地爛尾收場,適逢呢排blog blog人氣持續上升,令我對於打blog滿有幹勁,加上下一個trip又兩個星期後至出發,不如我都補打番個honeymoon blog啦,家姐之前嘅說話持續係我腦海縈繞,佢話honeymoon係一生人一次嘅重要trip,冇理由唔打,雖然而家隔咁耐,好多detail可能唔記得,但都盡量看圖作文啦﹗今朝係舊電腦炒番啲相過嚟時,重頭睇咗呢3.6GB相一次,睇見當時我哋無憂無慮嘅笑容,加上Fiji嘅良辰美景,真係仿如隔世⋯我都好耐冇試過啲頭髮咁長了,眼鏡亦換咗副新嘅,我哋兩個嘅腩肉亦各自增加咗十幾磅﹗

講番個trip啦,一生人一次嘅蜜月嘛,揀destination時其實都費過啲心思,總之想去浪漫啲悠閒啲嘅地方,我記得當時嘅候選名單中,包括過澳洲嘅Tasmania,感覺上地方好靚、好多美食,但似乎要自駕遊先比較方便,話學駕車講咗幾年到而家都未take action⋯又有諗過去意大利,又係浪漫+美食嘅目的地,但十一月嘅天氣又好似唔多適合,都係等下次夏天時先去啦~諗落都係去南半球嘅暖和天氣比較好,又上網search下top honeymoon destinations,除咗我哋最後去咗嘅Fiji之外,另一個我心儀嘅係大溪地,不過搭飛機嘅路線好唔方便呢,大多都係由美國轉機,太遠了,加上物價都幾貴﹗最後揀咗Fiji,好似樣樣都合乎心目中所想丫,風景靚、天氣好、悠閒自在,非常好~香港仲有直航飛機添啊~

By the way,我同day嚟緊八月會去嘅夏威夷都常入選top honeymoon destination啊,就當我哋去多次honeymoon吧﹗:)螢幕快照 2014-05-07 下午01.47.12

斐濟係邊度?大家睇睇上面嘅地圖,有大家熟悉嘅澳洲同埋紐西蘭,地圖嘅右上角白白地嗰個橢圓島嶼就係Fiji啲大島了,其實Fiji係群島國家,所以大島裙邊有好多零星小島都屬於Fiji的,我遲啲嘅blog再show俾大家睇個形勢吧﹗

唔知大家熟唔熟悉Fiji呢?其實我人生第一次接觸呢個地方,就係來自張小嫻嘅麵包樹系列,講男主角嘅其中一個歌手女朋友就係來自斐濟,張小嫻帶俾我對Fiji嘅印象就係,啲人純真熱情又好客啦、喜歡唱歌又唱得好好啦,同我哋真正接觸到嘅都好類近bor~

我哋11月6號結婚,7號就出發,其實先一晚都冇乜點瞓,事關大婚日子adrenaline爆燈,返到新居(點解話仿如隔世呢,結婚兩年半,我哋都搬咗一次屋添了⋯)仲好熱烈咁拆禮物同埋上facebook睇下人哋post我哋嘅相相之類,好似成四五點至瞓~同埋出發honeymoon嗰日有重大任務,我哋本身諗住好順咁搭車去九龍站係市區check in,跟住去尖沙咀還婚紗,再過旺角還褂同埋頭飾,再去機場上機⋯人算不如天算(與其咁講,其實係冇做足功課⋯:p),去到九龍站時,職員同我哋講,雖然Air Pacific同Cathay聯營呢條航線,但唔可以市區check in,oops,如意算盤破壞了,於是變成我一人拎住兩件大行李先過機場,由day完成嗰幾項市區任務咯~DSC03065

我哋再次會合時已經係機場見了﹗食個late lunch再上飛機啦~DSC03072

指定動作﹗

今次我哋去兩個星期,其實係搵菊姨幫我哋book package再加自己book餘下的酒店~呢個要講番再之前嘅事情,我哋去影pre-wedding原本係去日本輕井澤嘛,後來因為日本地震海嘯輻射嗰件事改變咗行程,去咗上海影pre-wedding(請參閱:26-4-2011:上海pre-wedding+杭州day 2.婚紗相by Picasso Wedding),原本book晒日本機票嗰啲錢唔可以退,但可以留番啲credit再係東瀛遊消費,所以非常好丫,我哋啲錢可以用番嚟去honeymoon了,都算係同一件事丫﹗DSC03068

我哋搭嘅Air Pacific班機~對於呢個航空公司非常陌生,第一次認識同乘搭,印象嘛,對於今次長途機嚟講算係中規中矩啦,座位唔算特別窄or闊,餐飲份量都夠,味道就正常啦,冇話出現Fiji地道美食:p,有得由香港直航飛都算好好咯,好似搭十個鐘左右(我都唔係好記得了⋯)~DSC03074DSC03075經過兩個飛機餐嘅時間之後,我哋抵達呢個浪漫+歡樂嘅世外桃源啦~

待續

前往其他斐濟旅遊blog

Comments

comments

在《7-11-2011:斐濟蜜月day 1.前往浪漫之境》中有 4 則留言

  1. 終於寫FIJI HONEYMOON,加油~
    其實唔睇你個地圖都唔知道FIJI係邊度,印象中AIR PACIFIC好似成日DELAY,你地準時起飛真係好幸運~

    • 13日行程,恐怕出發馬來西亞之前完成唔到呢,不過盡力啦﹗
      我估計可能大家唔熟悉所以post地圖出來囉~
      我哋回程時唔知算唔算delay呢?提早一日通知改時間晏幾個鐘~

  2. 出發當日的確狼狽,不過沒有困難是沒法決解的。回想起來,婚姻生活雖然是兩人的事,但有時也得彼此配合,各自面對。

發表迴響

你的電子郵件位址並不會被公開。 必要欄位標記為 *