18-8-2013:即興曼谷day 3(part 1).Running Man足跡之美食市場

今次旅行雖然只有四日,但都唔想衝行程,我哋兩個都好多年冇去泰國,當然好多地方可以去啦,但旅假都係要relax下o既,除咗去按摩同埋做spa之外,都好想好好享受下酒店o既泳池,我哋決定第三日o既早上就游下水啦~IMG_2331

酒店泳池係大廈o既中層位置,同層仲有gym room添,更衣室內有sauna同蒸氣浴室添~唔知係咪時間問題呢,我哋去時冇其他客人,可以獨霸個(不太大o既)泳池﹗雖然係長年暖和o既曼谷,但少少天陰陰都涼涼地,可以要馬上跳落水游至得啦~IMG_2334

正~去旅行住酒店好多時都好想游下人哋個泳池,呢個同想浸下佢個浴缸心態上一樣,事關我哋屋企既冇浴缸,屋苑亦冇泳池,要游水嘛,去公共泳池一到夏天就超超超多人,每年到天氣熱都會去游一次,然後就整個夏天都決定唔再去,因為游水都要左閃右避,一係要返爹媽or家姐姐夫佢哋個屋苑游囉,所以第時買樓真係好想有泳池丫~(閃亮眼睛^_^)

泳池確實唔太大,我哋游下hea下傾下計就決定沖個涼去下一個行程咯~我哋游到中途見幾個南亞裔小伙子嚟到泳池邊但遲遲唔落水,唔知點解,但我哋一上水佢哋就跳落嚟了,唔通佢哋o既宗教上有規定唔可以同陌生女子一齊游水乎?

個更衣室好靚丫,我哋直情係埋度沖身lu,又有無限暖暖毛巾供應~不過唔知點解個蒸氣浴室有強烈o既嗆鼻味道,好似係10倍薄荷味咁,但我哋唔知係故意放o既香薰(which is unpleasant o既味道)定係清潔劑o既味道,此地不宜久留,都係沖乾淨就走啦~SONY DSC

家姐話一定要試一次呢個雪糕店,晨早流流去食雪糕有點那個,但時間寶貴嘛,如果夜晚返到嚟關咗門就食唔到lu~(可況家姐夜晚係再需要食芒果糯米飯的﹗﹗﹗)SONY DSC

我哋兩份share咗呢個邪惡o既新地﹗係天下最夾o既香蕉同朱古力做主題~

我哋決定早上要去附近o既大型超市買埋啲手信,咁可以放返酒店先再出去玩嘛~SONY DSC

旅遊書都有介紹o既Big-C Supercentre就係我哋o既步行距離啫~

http://www.bigc.co.th/en/

感覺有似以前o既屯門家樂福咁,超大o既超級市場,乾貨濕貨都有,買手信買嘢食當然係去超級市場好啦,又平又多選擇~(請參閱:29-5-2013:釜山麗水day 5(part 2).買手信去.期待已久的Spaland7-11-2013:西班牙day 8(part 4).溫暖的鬧市hostel.最後tapas衝刺@Madrid)SONY DSC

經過麥當勞,哇,曼谷o既麥當勞有珍珠奶茶飲丫,正~點解香港冇o架~CAM00495

行超級市場當然冇周圍影相啦,所以只影咗免費贈飲o既乳酸飲品,好闊卓喎,全支俾你,不過我哋都係運吉,點買返去bor~今次我哋買咗啲泰國菜色o既調味包,好似冬蔭公湯呀咁,又買咗魚露,魚露真係超平囉,幾蚊雞就有一支,但係唔識點揀~Big C入面賣啲衫都ok喎,我同家姐都有收穫,買咗tee同埋裙子~ 🙂SONY DSC

出到嚟行幾步見到有個四面佛,呢個時候就諗係咪當年嚟泰國時去過嗰個呢?當年個四面佛又係係大商場旁邊o架喎,無從考究啦~呢個四面佛嘛…理應係好神聖的,但後面商場嘛,賣大廣告好似都好應份,但四面佛後面有性感o既內衣model就好似唔係幾好了…SONY DSC

四面佛附近都有攤子賣鮮花同香燭俾人供奉~

口渴了,路過買下攤子o既飲品,家姐要飲咗個啡先,聽佢講好似冇尋日跟烹飪學校出去市場嗰間咁好飲,我就趁機會飲多一兩個椰青,味道當然好啦,但呢度市區o既價錢係Amphawa o既double呢~

好,返酒店放低東東我哋就正式出發了,我哋今日行程會去搭船遊昭披耶河、遊覽大皇宮同埋夜晚去埋由貨倉改建o既Asiatique夜市,節目好豐富啊~SONY DSC

我哋搭BTS去到河邊搭船,其實對於唔同航線同埋票價都有啲糊里糊塗,我哋決定香港人最愛o既自助餐,一日套票無限搭,唔緊要啦,搭四程就抵o架啦,最後發現都冇抵到,我哋係搭咗四程,但最尾由Asiatique出返嚟其實係免費的~anyway,買咗「自助餐」都方便好多o既,唔駛次次重新買票~(安慰自己中…)SONY DSC

呢啲遊船都係遊客為主啦,船上有廣播,介紹下河o既兩岸o既特色建築,都幾好~Running Man都有係昭披耶河上坐過船呀,但佢哋係坐嗰啲細細長長o既快摩打船,嗰啲刺激得多了~繼上次我去釜山麗水要跟著Running Man遊韓國之後(請參閱:24-5-2013:釜山麗水day 0.跟著Running Man遊韓國),事關佢哋都有拍過曼谷特輯嘛,我同家姐都話要唔要試下跟著Running Man遊曼谷,最後都係只去咗陣間會去o既熟食市場咋~SONY DSC

坐船不時會見到啲酒店專船,有啲高級酒店好似Shangri-la建係河邊,有專船接住客出入,好威啊~SONY DSC

舒服的遊船河~SONY DSC

我都唔記得兩旁o既建築係啲乜了,船長有介紹o既包括呢個有中國色彩o既塔~SONY DSC

同埋有東南亞風情o既建築物~我上網search返至知呢個係鄭王廟~

大家可以去史官個blog(http://www.wufamilyblog.com/~catherine)度睇下佢有冇介紹﹗SONY DSC

仲有呢啲水上屋都好有特色,香港o既大澳都有呢啲水上屋吧?好似有個專有名稱的,一時之間諗唔起添…

我哋有考慮過要jap jap jap至去皇宮定點,因為皇宮都早早地關門,決定都係食咗先啦,應該都夠時間逛o既~SONY DSC

就係呢個熟食市場啦﹗係Tha Chang碼頭旁邊,Running Man們要用即學即用o既泰文買到正確o既三樣小食﹗combine lunch

我哋食咗pad thai(炒河粉)同埋冬蔭公湯﹗好味呀~其實我根本唔食得辣,但去到泰國,冬蔭公都真係必食的,因為真係好香好惹味,呢個湯嘛,我一邊眼淚鼻涕一齊流,一邊大讚佢好食,真係攞苦嚟辛咯~

之後呢個甜品嘛—-登登登登﹗一定要隆重介紹﹗SONY DSC

係超好味o既椰子雪糕﹗﹗﹗大家去到Tha Chang一定要試下丫~~~~CAM00509
用原始o既椰子殼嚟盛載,唔單單為咗美觀,仲可以保溫,更重要o既係可以刮入面啲椰子肉嚟食﹗椰子雪糕非常清新,好適合炎熱o既泰國,上面加埋啲花生粒更加口感同味道o既變化,我要點樣形容?我食時諗起妙手小廚師味吉陽一o既作品囉…

coconut ice cream

就係呢個椰子雪糕﹗﹗﹗雖然冇青瓜同甘筍冰冰果露,但都夠清新了,加花生更適合廣東人口味~SONY DSC

你睇家姐個樣,食到幾幸福~呵呵~SONY DSC童叟無欺﹗Running Man真係嚟過呢度o架~

待續

前往其他泰國旅遊blog

Comments

comments

在《18-8-2013:即興曼谷day 3(part 1).Running Man足跡之美食市場》中有 2 則留言

發表迴響

你的電子郵件位址並不會被公開。 必要欄位標記為 *