如果以Galle嚟講最重要嘅景點都係Galle Fort了﹗我哋由巴士總站嗰度就咁行到過去啦～

Galle Fort外圍嘅城牆～

所謂嘅Fort，好容易以為係一個完整嘅古堡，然後要買門票入場，逐個城樓參觀咁，但其實Galle Fort已經係過去，而家係一個範圍，周圍都仲有啲古蹟，好似城牆呀、塔樓呀、教堂呀咁～而有部份建築物就活化作為其他用途，有啲變咗博物館，有啲就變成旅館，啲旅館仲要好高級下㗎～

雖然我冇住，但都可以去人哋酒店個website睇下嘅：http://www.galleforthotel.com/

入去fort area嘅入口﹗人同車都可以自由出入～Galle Fort唔算細，所以一入到去就有勁多tuk tuk問你要唔要帶你遊覽，冇呀，我哋用對腳就ok了﹗

雖然有地圖，但係裡面唔係太易orientate自己，所以我哋都有迷下路～:p

入到去就似個小鎮咁～

一間小教堂～

仲有間大嘅～充滿殖民地風情呢～原來Galle Fort最初係十六世紀末時由葡萄牙人建成，但到十七世紀中就俾荷蘭人入主，所以成個範圍都好有歐洲風情～

我哋參觀咗個航海考古博物館，航海已經唔太熟悉，仲要係航海考古，所以對我哋嚟講都幾新穎同埋困難～展出咗啲海底發掘出來嘅文物，從而了解下航海嘅歷史～我印象比較深刻嘅⋯I’m sorry⋯係收費問題，又係嗰啲1比100嘅收費，外國人嘅入場費遠遠比本地人貴好多，要係好多倍嗰隻﹗係我哋入場時佢冇得找錢囉，因為手頭上全部都係散子，係咪唔應該濫收外國人費用呢？

我哋去咗呢間好有style嘅餐館食lunch，有好多遊客係度食呢，仲要係悠閒地歎下嗰隻～

好好呀，除咗西式仲有東南亞口味，我哋叫咗蝦米粉同埋個魚，魚我記得係濃味咗啲嘅，但呢餐最正嘅莫過於凍檸茶﹗﹗久違了嘅口味～雖然話嚟斯里蘭卡之前見過Travel Health Clinic，都講過啲腸胃健康嘅注意事項，唔好飲啲加冰嘅飲品之類，但我哋嚟到發現衛生情況同印度真係大大不同，好快就破晒戒啦，係咁食凍嘢，哈～個甜品都好好味，配啲新鮮熱情果醬，酸酸甜甜咁幾好～

大家去開Galle Fort可以嚟下呢間cafe～

我哋經過時唔知來頭，原來係一間清真寺～

行到海邊，有個浪漫嘅白色燈塔呢～

哇，海灘呀，雖然天氣麻麻，但都有唔少人落水玩呢～

去印度同埋馬來西亞時都有見過咁嘅景象，女人要包住晒點游水？ok，唔著我哋所認識嘅泳衣，而係繼續由頭包到落腳咁落水囉，以前係馬來西亞見過啲長袖衫長袖褲泳裝添～

見到day嘛？

大家係城牆邊嘅無敵海景都有各種活動，有賣嘢嘅、有一家大細玩嘅、有食嘢嘅、有休憩嘅～

因為太熱了，又行到累累地，我哋又要坐下啦，坐低就⋯heehee，飲下(肥)嘢啦～2012年嘅我仲要飲呢杯充滿cream嘅咖啡，2014年今日嘅我既戒咗咖啡，亦忍到口唔食cream了﹗身子要緊⋯哈哈⋯差唔多到30就開始有變化了～呢間cafe好嘅係有wifi上網，正好俾沉迷嘅香港人post下相、打下咭～

就係呢間The Heritage Cafe了﹗

我哋行完fort就返酒店啦，唔想天黑至返去，如果唔係又好難睇啲路了～我都唔記得我哋搭巴士定tuk tuk返去了～

返到酒店望出去，哇，有人滑浪呀﹗其實酒店個website都有講可以安排上滑浪堂，好似好難咁，同埋呢啲咁型嘅活動好似唔係好襯我咁～

夜晚都冇乜特別活動呀，都係jap jap jap啦～詳情我都唔係好記得啦，但我哋繼續叫亞洲餐單囉～食到白飯(冇鄉土味的)同埋小棠菜就似返到屋企了～

我哋之後嗰日就出發去Yala啦，進入旅程尾聲之餘，亦係另一個我所期待嘅高峰﹗

待續

前往其他斯里蘭卡旅遊blog

Comments

comments