之前的開場白用咗一篇blog o既時間，而家終於嚟到Cordoba o既戲肉，其實嚟Cordoba最重要o既就係參觀清真寺同埋阿卡乍堡，我哋先去清真寺，因為更特別+重要呢，而我睇到旅遊書o既圖片就俾佢吸引住了~

先買票，其實呢個位置已經可以話開始參觀了，因為我哋企緊o既位置就係清真寺o既橘子庭園啦~

我哋租埋audioguide，未入去已經開始對個audioguide唔滿意，因為佢係第一度要收passport的﹗﹗真係唔夠聖家堂咁大方，聖家堂不但唔駛收passport，而且還機仲冇人check你添，你掛番個機係收集處就可以拍拍屁股~今次拎咗上手更唔滿意，吓？﹗原來入面唔會一站站咁話你聽按幾多號o架？要手拎住地圖，對番自己個位置先再按，咁如果你orientate唔到自己咁咪即是唔駛聽？乜唔係等你話我知我係邊度咩？

就係呢個view了﹗睇旅遊書已經令人印象難忘，又高又醒目o既紅白拱門，綿延不絕o既柱子，非常大~

開始用audioguide我哋就發現好大問題喇﹗真係唔知自己係邊，都唔知聽邊個number o既講解好~哎吔吔~

監倉乎？唔係，係一個個小聖堂，不過用鐵門鎖起咗啫~

經過鐵枝影入去就係各有各特色o既小聖堂，好似每一個都有dedicate to某啲聖人or紀念某啲事情的~

高樓底，好宏偉~

明明話係清真寺o架？點解好似入咗教堂咁o既？冇錯，呢個就係精妙之處，因為歷史o既緣故，本來真係清真寺，但後來天主教政權take over之後就將佢改建，直情將成間教堂起係入面，真係幾過份o既破壞，好聽叫做fusion，唔好聽叫不倫不類囉~

呢個view就可以一次過睇到清真寺同埋大教堂了~

清真寺中的十字架~

講到清真寺部份，其實擴建過幾次，雖然驟眼睇落都係紅白紅白拱門，但聽咗介紹，你就會知道幾個時期o既擴建，建築上同埋用料上都有唔同，好似話顏色係用油漆油上去定係用唔同顏色o既磚砌上去之類，但而家睇番相又分唔出了~:p

非常華麗o既圓頂~

呢個好似係清真寺之中最神聖o既地方，就好似教堂o既聖壇咁，因為對回教唔太認識，聽講解對我哋嚟講太多專有o既term，都唔太明白添~

搵番關於清真寺o既wiki，大家可以睇下條link：

http://zh.wikipedia.org/wiki/%E6%B8%85%E7%9C%9F%E5%AF%BA

似乎個洞洞就係入面講o既「米哈拉布」，向呢幅牆o既方向朝拜就係向麥加朝拜了﹗

之後我哋入去教堂部份參觀~

除咗大教堂本身，仲收藏咗好多連我呢個天主教徒都唔認識o既聖物~係咪明供聖體用？

唔用宗教角度去睇，只用文化藝術角度去睇，好金澄澄，雕刻好精緻，可以知道當時o既天主教政權好有錢同好show off~

入到去教堂中間要坐低慢慢聽慢慢睇~

因為目不暇給~超大風琴﹗﹗我哋後來係Sevilla o既教堂第一次親耳聽到呢啲巨型風琴現場發出o既聲響，真係有懾人o既氣氛﹗同我哋平時用o既電風琴真係完全唔同﹗﹗

合唱團席係好花心思的，要逐個慢慢欣賞，因為每一張椅都刻有唔同o既聖經故事﹗大家睇得出係咩嘛？

椅子都好靚~

聖壇與歌詠團o既全貌~出番去橘子庭園參觀埋噴泉，Muslim入清真寺參拜之前一定要係度淨手臉至入得去o架~

待續

前住其他西班牙旅遊blog

Comments

comments