幾經辛苦去完個(錯o既)巴士站之後，又未夠鐘去睇show，可以好好打算一下去邊~正規o既大景點，即阿卡乍堡呀、鬥牛場呀嗰啲好似唔夠時間，而且都係五、六點就關門…既然我哋今晚去睇flamenco，不如就去flamenco博物館啦~我哋兩本旅遊書之中，得一本有介紹咋~其實都有少少難搵，因為佢位於Santa Cruz錯綜複雜o既小街之中，旅遊書教你點去都唔係講佢實際o既地址，而係叫你去某個plaza，再揀其中一條路行，之後自己執生﹗plaza好易搵到，但之後都兜咗兩轉至去到個museum~

flamenco museum好似係一位好熱愛flamenco o既有名舞者開o既，為o既係推廣呢種文化藝術，好多館藏都係佢自己啲珍貴收藏品~~

一入到去先係一個flamenco o既表演場地，呢度夜晚都有show開，但我哋一早買好飛去另一間，所以呢度只參觀啫~

我哋按指示先搭電梯上樓上o既展館，入面有用各種語言寫o既flamenco呢~

哇~我哋係第一個房間睇咗段短片之後，第二個房間已經有啲舞鞋display出來了~~~

呢間房我哋都停留得比較耐，因為有個大screen，輪流展示flamenco各種o既基本技巧同埋情感~

同一個房間仲有幾部電腦有得俾你睇下片，講下唔同風格o既flamenco，但時間唔多，我都冇睇晒全部呀~

靚靚的舊式flamenco poster~

另一個叫女孩子雀躍o既房間，就係經典o既flamenco舞衣﹗﹗雖然我哋唔識啲flamenco o既著名舞者，但睇個勢應該都係啲特別出名o既舞者係某個特別場合所著o既舞衣﹗﹗

果然係特別o既舞衣，同一般我哋都想像到o既波點紅黑波浪裙係唔一樣~

上多層係個gallery，展示好多同flamenco有關o既畫作~由油畫…

到小朋友o既畫…以至…

時裝設計師o既sketch都有﹗

呀，我記起啦，呢幾幅sketch都唔係特別flamenco，點解要影呢？我哋話左邊中間嗰幅好似伊麵o既古惑仔系列，哈~

有個洞窟似o既空間，我哋估計係上flamenco堂o既地方，係呀，呢個museum除咗參觀同埋睇表演之外都有得上堂學舞﹗﹗由一堂至一星期o既體驗堂以至長期o既專業訓練都有﹗

行埋紀念品店就完成﹗雖然見有啲postcard都幾可愛，但之前Barcelona買o既postcard都未寫未寄，唔好買住啦~

出番嚟已經天黑黑地，但行過咁多次，Santa Cruz，我哋唔會再驚你了﹗﹗見仲有啲時間，我哋返去酒店稍稍休息再去睇表演~

而家先帶大家參觀下我哋Sevilla住o既Petit Palace Santa Cruz，間酒店都幾好丫，係Santa Cruz入面都冇一間唔會容易令人迷路同埋冇一間會好近火車站了，新穎簡潔裝修，都幾舒服，而且自助早餐都好多選擇丫，聽日俾大家睇下，而且房間、公共地方都有免費wifi~good﹗要講呢間酒店，先記起唔記得講我哋係Barcelona住o既Princess Hotel有free mini bar o架，每日都會refill一支礦泉水、一支有氣礦泉水、一支可樂、一支檸檬汽水同埋一支啤酒，第一、三、四樣飲品我哋都有時時捧場﹗﹗過去咗，到呢度冇免費mini bar先記起之前o既好呢~

充電完畢﹗我哋出發去睇show~

其實呢張相係探路時影的，所以仲未天黑~我哋睇flamenco o既係呢間Tablao los Callos，點解要專登上網訂呢一間？明明周街都咁多flamenco show~事關我哋買兩本旅遊書之中，其中一本o既作者係住係西班牙o既台灣人，佢係西班牙o既專業flamenco舞者(切切實實o既台灣人﹗﹗)，佢介紹o既tablao點都好過周街撞入去吧﹗而另一本書都係首推los callos，話係老字號，好多有名o既flamenco舞者都曾經係度演出過~

呢個小舞台就係演出o既地方~

未開show，我哋坐係度落order叫complimentary o既飲品先，我叫咗…sangria，yeah﹗day就飲可樂~座位席仲未坐滿，但呢個時候已經不住傳來樓上o既練舞o既聲音，鞋踭撞擊木地板o既踢踏聲音﹗好期待呢~

開show唔准影相，係到臨尾o既謝幕環節至准再影，可能係唔想大家騷擾舞者o既演出吧~佢哋演出真係好賣力，由頭至尾都冇一刻係放鬆，包括身體同埋情感~因為冇講解吧，我哋唔係好知每一支舞o既內容，但點解舞者o既表情總係咁苦澀呢？現場o既結他伴奏同埋歌手奏o既樂曲都係好憂怨~但節拍，腳踏o既步子就非常澎湃，真係去咗一個我未體驗過o既領域，從細到大，我認識o既舞蹈，有優美高雅o既芭蕾舞，有熱鬧喜慶o既民族舞，有意境超脫o既現代舞，但就未睇過呢啲憂怨又歇斯底里o既flamenco﹗當年去唔成西班牙，記得後來爹媽帶咗我哋去咗都會海逸酒店食咗個西班牙主題自助餐，有flamenco表演，但嗰次同今次o既feel真係完全唔一樣﹗嗰次你覺得佢係表演你睇，有娛賓o既感覺，但今次你會覺得佢係沉醉係自己o既世界入面，唔會理你點睇咁去演繹角色﹗講優美嘛，其實有好多時真係唔係太優美，因為好歇斯底里、義無反顧，甚至連髮夾都fing埋出嚟﹗都會冇乜儀態~情感豐富100%，叫人印象難忘﹗恐怕我真係冇資格做一個flamenco舞者，唔係肢體技巧o既問題(呢個當然要好多功夫啦)，更甚o既係我唔識得放低自己，放低我，將另一個角色o既靈魂注入自己身體入面去演繹囉~

演出係好精彩的，但我哋兩個都無法抵擋時差o既入侵，所以睇到中後段有啲眼瞓，要靠食住糖去支持，真係唔好意思，又丟中國人o既假…

到咗最後一幕，全部舞者出晒嚟，情感一轉，變得熱鬧啲，冇咁哀怨~

同埋第一次有群舞﹗

係呀，有一位男舞者一點紅~

多謝你哋o既演出﹗我雖然有少少瞓著咗，但我都推介Tablao los Callos~

肚子餓，要去搵食，好在西班牙o既晚餐時間夜，好晏去食都唔會有阻住人收工o既問題﹗我哋去咗返酒店途中o既呢間El Cordobes~雖然晚間有啲涼意，但坐係戶外暖爐旁邊都好ok丫~

今次去西班牙o既美食check point雖然都tick咗唔少項目，但仲有一樣，就係paella(西班牙海鮮飯)，我哋今晚食到了﹗先介紹右上o既係海鮮湯，落料係好足，但唔知點解有少少「壓」味，好似上次去韓國食o既海鮮湯都有呢種味(11-4-2012：首爾濟洲櫻花遊day 4(part 1)．城山日出峰、海鮮鍋)，但中國人o既海鮮湯就唔會有喎，係海鮮品種問題定係真係差咗舊薑？﹗左下o既蜜瓜火腿真係極品，果然兩樣都係地道o既好﹗﹗蜜瓜夠甜夠蜜味，突顯到火腿o既香味，係呢餐最好食o既嘢~~西班牙海鮮飯反而冇咁突出，係有好多餸，但個飯唔夠鮮，冇之前食過o既arroz negro咁大衝擊﹗本來諗住之後要食多次paella好好為佢平反一下，身為西班牙國菜，冇理由會輸俾堆黑麻麻o既飯bor，但後來太多嘢要食要試，我哋結果有俾機會佢平反…umum…下次先啦~hee~

待續

前住其他西班牙旅遊blog

Comments

comments