大家好似已經睇咗我好多篇blog，但一直都仲係Barcelona，嚟到第五日(名義上o既第五日，其實第一日係搭飛機囉~)，我哋終於出發去下一個大站—-Sevilla(塞維亞)~

先一晚明明仲有一件重要事，掛住講啲高興o既大商場美食水族館，因為冇乜損失，居然唔記得講我哋今個trip唯一一次o既被小偷睇中~一早就知道西班牙治安麻麻，勁多小偷，估唔到大家會遇到小偷o既frequency真係咁高~話說我哋離開Maremagnum已經好攰好眼瞓，歸心似箭之時，仲要係地鐵轉車先返到酒店，我半夢半醒同day一齊係地鐵度行時忽然聽到day大喝一聲，我都唔知佢喝中文定英文定咩，我即刻嚇醒咗，原來佢驚覺有人拉佢背囊條拉鍊﹗﹗好在發覺得早，嗰條拉鍊都拉開咗三分之一，而day o既銀包同身份証+我哋一半o既歐羅確實就係嗰度入面，差多幾秒就大件事~好在有今次o既經歷，之後都更提高驚覺~

雖然第一張相已經嚟到Sevilla，其實呢程火車係最長嗰程，要坐大概五個鐘﹗我哋怕時間難預，而且因為時間都幾早，我哋打從一開始就打算係火車站買早餐，唔知入閘仲有冇嘢賣，所以去到火車站大堂就有理冇理買咗先，我牛刀小試用西班牙文，簡單的買咗兩個牛角包，day o既齋啡同埋我o既奶啡，算係成功吧﹗heehee~但唔成功o既係要拎住兩大件行李再加兩杯熱飲同埋包包，於是男人管重o既，女人管食o既，一樣掂~

呢程火車我哋買唔同一齊坐o既飛，但開車時又見冇乜人坐，所以早段至中段day過咗嚟我個車卡度坐，不過都只係一齊坐，因為我今次旅行帶咗一套三本o既「步步驚心」小說嚟，而家睇到第二本，馬爾泰若曦正周旋於四爺同八爺之間，我邊度得閒理個老公住呀…哈(慘慘~)~套小說真係好好睇﹗day話帶情情塔塔，我作為女人最鍾意呢啲嘢，後來我一返嚟香港一個幾星期就煲晒三十五集o既劇啦，你話係咪好有魅力﹗﹗家姐姐夫講得啱，我係小說入面睇到，覺得最浪漫o既場景，which is四爺帶若曦係圓明園個荷花池度撐船仔個部份，果然啲電視特技好唔ok呀~而本來都不太喜歡鄭嘉穎o既我，唔知係咪偏見問題，都係覺得佢冇書中o既八爺咁charm囉~所以，如果喜愛套劇o既你，一定要睇番小說﹗﹗

好，我哋返番嚟西班牙先，唔好步步驚心住…:p

Sevilla個車站都大大地，但指示就不太清晰，最嚴重o既地方係，連個tourist information centre都唔係太顯眼，所以我叫day睇住啲行李，我去搵搵~

原來我去搵路時佢做緊啲咁o既嘢~哈~

我搵到tourist information centre，問下點樣去我哋間酒店，我記得之前係agoda.com訂房時，啲人對我哋住o既Petit Palace Santa Cruz有好好o既評價，最大原因係話好方便喎，既然咁方便，係咪可以好容易行or搭車過去呢？點知…原來好方便係指好近大教堂同埋其他重要景點，火車站去一啲都唔方便~嗱，你要行行行行去呢個巴士站，搭去呢度，再行行行行過去酒店~同day商量一下，我哋啲行李咁有份量，都係搭的士吧，反正旅遊書話大約只係HK$70，哈，結果我哋搭幾次的士都係咁上下價錢喎，雖然西班牙治安唔好賊仔多，但的士司機就幾老實﹗唔兜路，而且個錶跳幾多佢唔會收多你~讚呀~

明明返咗酒店，點解下一張已經係餐廳o既相呢？因為我哋已經太肚餓，基本上上咗房丟低啲行李就要即刻衝出街搵食﹗﹗

酒店職員好好，教咗我哋點樣行去大教堂，又俾咗張地圖我哋，show俾我哋睇啲景點o既位置~既然我哋要搵食，過去大教堂嗰邊一定多食肆啦﹗因為太餓，所以我哋都冇乜點揀，呢間好似都係進入我哋視線範圍o既頭兩三間﹗﹗

叫tapas要揀四五樣至夠，要諗會比較慢，我哋揀咗是日餐單，一份魷魚、一份豬扒share食，味道中規中矩啦，不過兩碟都油咗少少，麵包嘛，我哋嚟到Sevilla先開始有啲麵包會靜靜雞出現，有時會收費有時就免費，反正收得唔多我哋就冇小家地次次問收唔收錢了，總之餓就食唔餓就唔食，收錢就帶啲有包裝o既走，唔收錢o既就食剩都唔帶走啦(都係咁小家…哈哈~)~今餐o既重點反而係右上角o既西班牙凍湯gazpacho，我以為夏天至係大家favourite，原來秋涼都一樣有售，濃濃o既蔬菜凍湯，好有特色，好清新﹗如果夏天應該更加正~秋冬都係熱騰騰o既湯更有魅力~

我哋今日o既行程最重要係買咗飛睇flamenco，確實地點係邊個位置唔係太sure~其他去邊都冇fix到，因為唔係好熟架步，我哋都係了解下呢個地方先~另一樣因為我哋打算後日day trip咁去Granada，搭火車啲時間唔太理想，我哋有考慮搭巴士，之前係Barcelona上網買巴士票唔成功，所以都想趁今日親身去一去巴士總站睇下啲飛如何~既然要去呢啲地方，首先要orientate自己，去咗大教堂呢個landmark先啦~

因為唔打算今日參觀大教堂，所以我哋過門而不入，大教堂對開係呢個廣場~

接載遊客遊覽o既馬車，有見到馬o既「poo poo袋」嘛？

大教堂行冇幾多步就係阿卡乍堡，哇，原來入場要排長龍o架(令人諗起聖家堂o既恐怖長龍：3-11-2013：西班牙day 4(part 1)．建築奇才高第之聖家堂)，咁到我哋真正參觀時都要好好預算一下~

大教堂遠觀~

 

行出條大街，發現Sevilla都有類似Barcelona o既輕鐵呢(1-11-2013：西班牙day 2(part 2)．狂熱西甲之巴塞vs愛斯賓奴打毗)~

之後就犀利咯，我哋開始不停地迷路﹗唉，我自問方向感唔算差，好多時睇咗地圖行咗上條街都可以唔駛再refer番地圖直接去到目的地，但我對Sevilla Santa Cruz呢個地方真係要大叫投降，因為啲路實在太似太複雜﹗﹗

大座少少o既古典建築物，以為可以做到landmark搵番自己係地圖上面o既位置，但你唔會知呢一楝係邊一楝…究竟係地圖差、路標差定係我差呢？﹗

幾經辛苦，我哋終於搵到長途巴士總站﹗﹗不幸o既係，其實我哋一早已經知Sevilla有兩個長途巴士總站，兩個站都有車去Granada，只有一個站有早車去，但又唔知邊個站係，酒店職員都唔知，但我哋偏偏去咗一日只有一班下午車去Granada嗰個站﹗﹗唉~放棄吧，我已經迷路到好攰了，唔想再徒步去另外個車站，我哋立志搭火車去Granada吧，早上6:45就6:45啦，大不了早啲起身，大不了唔食一朝酒店早餐，安慰自己o既係，早啲去到多啲時間玩囉(殊不知去到Granada再迷路…>.<)~

狠狠地迷路一次之後我哋開始認識呢個城市，少啲憎恨(有冇咁嚴重？有o架~)，多啲欣賞~Sevilla都幾單車friendly，我哋酒店都有免費借單車服務，而附近都有唔少租單車o既鋪頭，路上就有單車徑~

為免因為再迷路，錯過咗一早上網買咗o既貴貴flamenco演出，我哋決定先去探路，搵咗個表演場地先~途中經過靚靚o既花園~

開始可以收歛心神，好好欣賞風景~ 😀

Sevilla同埋我哋之後會去o既Cordoba同埋Granada都屬於Andalucia(安達魯西亞，或譯安達路西亞/安達盧西亞)，呢區盛產橘子﹗所以四處都係橘子樹，基本上有樹o既地方都係橘子樹，雖然不停見到，但我每次見到都好興奮呢~啲橙真係多到離晒譜，冇人打理隨便一棵o既街上o既樹都有過百粒橙掛係上面﹗﹗難怪係超市賣得咁平，同埋麥當勞都有鮮榨橙汁賣啦~

非常典型o既Sevilla o既橫街窄巷﹗﹗轉一轉唔知自己去咗邊，有時啲路牌唔係太清晰，更甚o既係，好多好短好細o既街係地圖冇顯示的﹗﹗

我哋要靠呢啲大大小小o既廣場去幫助記憶認路囉~同一條路行多幾次就好熟了，不過只限「專線」，一偏離航道，or掉番轉嚟行又會唔知去咗邊…

大大間o既教堂幫你認路？sorry，咁樣o既教堂周圍都係~(苦笑)

指酒店o既路牌就都有o既，但指其他東東，好似景點呀、大o既路呀就冇乜指示咯，係咪覺得你一定識？

係渾渾沌沌之際過咗頭半個下午，之後嗰半我哋會帶大家去下參觀o架啦~

待續

前住其他西班牙旅遊blog

Comments

comments