今日整個高第之旅真係好充實，行到黃昏真係超攰，我哋由米拉之家行出嚟時，係路邊o既長椅坐咗一陣休息下囉~去西班牙旅行，唔知係好處定壞處，比起其他歐洲地區，商店、食肆都開得好夜，啲當地人會午休，但我哋遊客唔會嘛(雖然家姐話佢哋當年去西班牙時天氣太熱，確實會下晝返酒店瞓晏覺…)，所以結果係由朝到晚~既然係巴塞隆拿最後一晚，我哋都要好好運用時間~

之前行過Las Ramblas o既其中一段路，今次我哋行埋近海嗰一小截，呢度有馬車喎~講起西班牙o既觀光馬車，後來我哋去Sevilla時間大教堂附近都好多馬車，但奇就奇在，點解咁多馬，周圍完全冇馬便便o既呢？仔細觀察馬車結構，原來有「poo poo袋」(我哋改o既名)﹗個兜係pat pat後面，所以邊行邊疴習性o既馬就唔會周圍留低便便啦，難怪市容keep得咁好，但後來day先提醒，對於坐緊馬車o既人嚟講，佢哋係全程聞住馬o既便便﹗哈~

之前大家reply時提過o既街頭賣藝人我哋當然有遇上啦，我揀咗呢個槍手，呀唔係，我至係個槍手，佢又好配合bor~高興高興~

過去海濱商場Maremagnum一定會經過呢個景點Columbus Monument，係紀念哥倫布o既雕塑~

雄偉o既獅子，後來我哋去Cordoba、Granada係嗰啲宮殿入面，經常出現代表皇權o既獅子，但唔知點解嗰啲獅子通常好cute呢~

地中海丫~我哋要經過呢條閃閃發亮o既橋過去置於海上o既Maremagnum~

不失為散步o既好地方~

見到Maremagnum了~

點解忽然會擠塞起來o既？哦，原來有船要泊入嚟，所以橋打開了~

俾Maremagnum同條橋包圍住o既可以叫做一個遊艇碼頭or避風塘吧~

嚟到西班牙都係第一次逛大商場呢，好高興啊~

我哋知道呢度有個水族館，趁未夠鐘食晚飯趕緊去睇咗先啦~

過水族館途中路過啲油畫攤檔，有啲比較商業性質o既景點畫，亦有藝術氣息o既創作油畫~

到達﹗

其實旅遊書都冇話特別推薦話個水族館值唔值得去睇，但我係個水族館迷，知道嚟到附近，唔去好似總係差啲啲嘢咁…請參閱：

28-6-2006：我愛水族館

17-8-2007：沖繩2007第二天@萬座毛、海洋博、今歸仁、菠蘿園

25-6-2009：花蓮day 3 (part 1)．遠雄海洋公園上集

4-2-2011：USA trip day 3(part 2)．華麗酒店群@the strip, Las Vegas

25-5-2013：釜山麗水day 1(part 3)．麗水世博之Aqua Planet水族館

今次呢個水族館唔算特別出色，係鋪排上主要都係一個個四四方方o既魚缸順序咁排過去，按照唔同o既生態嚟分囉，比較特別o既係，今次大多數都係地中海o既魚類，確實以往去o既水族館冇話好focus地淨係展示地中海o既海洋生物~

右上嗰堆海馬多到叫人毛骨悚然﹗﹗

叫做比較有睇頭o既係呢個自動前進o既路軌，邊觀賞大魚缸入面o既鯊魚囉~

反而今次令我最印象深刻o既係，因為啱啱過咗Halloween，個水族館o既扮鬼扮馬佈置都未拆落嚟，你知啦，水族館好多時都比較黑嘛，係個黑麻麻o既角落頭突然出現一隻骷髏骨幾恐怖~ :p

印象深刻o既魚…非佢哋莫屬，唔知叫咩名，好巨，圓咕碌，個樣好蠢咁~

有我喜愛o既青蛙可以影相呢~

正對水族館有少許失望之際，哇，原來佢哋有企鵝o架~冇海洋公園咁多隻，但好活潑，所以都好cute呀~

行完水族館，我哋食飽飽至行街吧，正好又累了，而且我哋都唔慣好似西班牙人咁夜食飯~

餐廳嘛，我哋一嚟到個商場就決定好要食呢間了，叫做TapaTapa，因為…

有無敵靚海景﹗令人聯想起去Fiji honeymoon時係Denarau Island食過o既一間餐廳呢，嗰度都係旁邊就係海，比呢個更近呢~(唔好意思，honeymoon個trip我未打blog，但我希望會打番的那管只係看圖作文，都希望可以完成~)

非常好，有圖畫o既餐牌，而且有每道菜有number，可以refer番去英文餐牌睇番文字~

食物到咗就好開心了~好精美呢~

隆重介紹一下吧，左上calamares fritos(炸花枝)係西班牙tapas o既必食之選，但呢款好似係比較特別o既花枝品種，口感特別有嚼勁，右上o既沙律某程度上係因為係斯里蘭卡嗰次食過用呢啲娃娃菜(？係咪同香港一樣嗰啲娃娃菜)做o既沙律(12-12-2012：斯里蘭卡day 5(part 3)．Nuwara Eliya地道生活)，左下o既青口好鮮美，不過薯條唔夠脆，弱咗少少，右下o既arroz negro(黑飯，即墨魚汁飯)，唔好睇佢個樣黑麻麻一片，呢個真係超鮮美﹗﹗我o既評價比起後來食o既paella(西班牙海鮮飯)更高﹗﹗必食之選~

非常滿意o既一餐呢~ 🙂後來我哋去逛咗一陣街，冇買好多嘢咋，不過去咗旅遊書介紹o既Women’s Secrets，係一間連鎖女性內衣睡衣專門店，自己又買咗套睡衣，又買咗一套送俾家姐，佢啲款式係好sweet嗰啲年輕女性style呢，而且價錢相宜啊~

待續

前住其他西班牙旅遊blog

Comments

comments