舊城區除咗Palau仲有好多景點呢，我哋都唔知點至行得晒，向住景點更密集o既方向行去，我哋今日o既另一個「must」就係畢卡索美術館，總之關門前去到就ok了，其他嘛，就隨緣啦~

好快進入我哋眼簾o既係一間教堂，對照一下地圖，過去望一望，原來呢度就係大教堂Catedral de Barcelona了~

未埋到去之前，前方o既廣場好熱鬧，好吸引人~呢啲係咩？單車？係咪載遊客遊覽o既？又冇人兜生意bor~

西班牙處處都非常多街頭賣藝，最常見係小提琴、結他、手風琴等，但呢個都算係數一數二特別了，居然有兩個白人女子彈中國人o既揚琴乎？不過佢哋除咗一般o既敲之外，仲有用手去彈，而演繹o既歌曲係經典流行曲囉，唔能夠話佢唔好聽，但有少少別扭咁~

早於公元第三世紀已經係Barcelona有宗教性聚會o既場所，但現時呢楝大教堂係1298年開始興建，1448年完工~你睇嗰啲精細o既雕刻~

我哋過門而不入，事關我哋已經記低咗彌撒o既時間，聽日適逢係主日，打算過嚟望彌撒，諗起之前去澳門參與葡文彌撒，都係有趣o既經歷呢~(本來想放條link係度通去嗰次個trip個blog，但搵唔到…莫非我冇打blog？﹗)

行多兩步又有另一檔街頭賣藝，呢個就動態啲了，有一班南美裔小伙子表演break dance，氣氛就好，都多人圍觀，但冇話好犀利，我哋睇咗一陣就行開了~

係西班牙，街頭賣藝真係多得好誇張，舊城區呢度，你行多兩步，轉個彎，又一檔，而係地鐵嘛，要轉車的話，由一個月台行去另一條線o既月台，可以有兩至三檔，佢哋不騷擾彼此，各自各精彩，但咁多，係咪真係因為失業率高？但咁多人表演，點會真係咁多人打賞呀~

行乞o既人亦唔少，真係可以「抓爛塊面」問你攞錢，後後生生有手有腳都伸大手板，咁o既話，係咁而唱下歌都叫有啲誠意丫~

break dance小伙子後面見到有似城牆o既東東，旅遊書都冇介紹，但見個牌寫住係Aqueduct and Gate of the Roman Wall，都係啲歷史遺跡吧~

入面有呢隊出色啲o既街頭賣藝，結他伴奏唱歌，加上低音大提琴o既bass，非常有韻味，我哋好似停低聽咗三首歌，仲買埋cd添，旁邊有人set咗腳架係度拍video，搞笑o既係，因為腳架好矮放係地上，個個經過o既人都意圖大大步跨過去，但到時佢睇番啲video時其實會唔會見到啲人啲腳？？

後來返到嚟聽cd，有女聲唱歌喎，但cd只係cd，冇書仔or其他簡介呢~

雖然唔係好知典故，但呢啲咁古老o既街都好有特色~

令人忍唔住係咁影相~

行咗出嚟，係比較熱鬧o既街道，好多鋪頭，我哋第一次遇到火腿專門店，咁多隻脾掛晒係度，叫人歎為觀止，而且價錢都貴o架喎~係西班牙食餐or麵包，乜都加啲火腿落去，佢哋真係好鍾意食呢~呢啲按kg計o既火腿都唔係好敢買，難以估計幾多錢有幾多片囉~所以後來我哋都係買一pack pack嗰啲~係機場回程時，又遇番香港空手道隊，聽到教練(估)同家人講電話話佢買咗隻脾﹗﹗犀利咯~返去點樣分？？一定切到好攰﹗我哋見鋪頭啲人「片」啲火腿出嚟，好似都好有技巧咁~

好啦，我哋終於試咗我哋真正o既第一餐西班牙正餐了~叫做CheeseMe﹗大家知道嘛，西班牙人好鍾意坐戶外，而戶外o既手費會貴少少o架，有時係餐牌度寫明，要貴幾多percent之類~我哋今次坐咗入室內，唔係錢o既問題，而係外面full咗，不過嘛，我哋都冇乜太大所謂，但食食下就覺得今次坐室內好啲了~因為外面有個小空地，不停的有賣藝人表演，但表演得一陣，就問啲食客攞打賞囉，都有啲煩，最主要係佢哋不太落力嘛，就咁吹牧童笛吹一首半首歌就要打算都夠膽死~

係呢間餐廳亦試咗今個trip o既第一杯sangria，呢間餐廳整體質素都好好呀~

我哋揀咗佢o既套餐，係西班牙，咁樣食法都好常見，有primero plato(第一道菜，可以係湯、凍湯、appetizer、or可以根本係一道菜咁o既size同內容)、segundo plato(第二道菜，一般係肉類o既主菜)、多數都會包麵包、飲品同埋甜品，不過呢間就唔包飲品，所以我哋散叫咗sangria~

嚟到西班牙第一樣令我食到瞇眼o既食物就係左上角o既蕃茄芝士了，芝士口味清淡，但質感濃厚，加上清新juicy o既大肉茄，非常正~上中o既南瓜湯相對就失色少少了，因為係一般o既好味道~至於右上o既主菜係燉鴨腿，哇，咁快就出現第二樣瞇眼食物？因為鴨腿超腍同入味，點解可以咁嫰滑o既呢，中國人煮鴨好少係呢種狀態~餐牌雖然有英文，但有啲係好專門o既菜式名字，我哋都唔係好曉，見到有個beef，諗住實冇死，點知係生肉片，冇話好腥，我都食到，但肉味唔明顯，質感似sashimi，不過不失啦~甜品o既brownie都屬中上o既佳品，再以fruit salad作結就perfect了﹗我哋兩個人，一般都會有三道菜變成咗六道菜，正﹗所以話「兩個人總比一個人好」，冇錯o既~

食飽飽行出嚟見到間叫人開心o既鋪頭呢，叫做Happy Pills，其實係經過包裝o既糖果店，盛載o既容器係藥樽(？﹗)，唔同size唔同價錢，你裝得落幾多就睇下你o既策略好唔好喇~我哋見靚靚地，糖果款式又多，都買咗嚟做手信呀~

對面有間賣Tee o既鋪頭，我哋再買咗兩件FC Barcelona o既Tee呢，不過今次係cute版，價錢非常相宜呢~

旁邊就係海上聖母聖殿了，即Bacilica de Santa Maria del Mar﹗亦係非參觀不可o既宏偉建築，不過我哋再一次過門而不入，因為行多兩步就係畢卡索美術館了，我哋要趁早快啲去睇，因為可能都要參觀比較長o既時間呢~

影一影個招牌~

同埋影一影locker room+衣帽間就入場了，入面唔影得相，我哋放低晒啲裝備，輕鬆入去參觀，租咗audio guide，慢慢歎~

對畢卡索o既認識，比較多嚟自上次係香港文化博物館o既展覽，上次由巴黎借咗好多作品係香港展覽，同爹爹去咗睇~對於佢少年時已經展現出好強o既觀察力同埋技巧已經非常驚歎，我唔係藝術人，唔係好識油畫，但我係醫生，每日都接觸好多人o既身體，對於體格、筋骨肌骼都好熟悉，但佢少年時十幾歲o既畫作，已經好細緻同埋好真實咁畫出人物﹗﹗

今次館藏更多，更加睇到佢一生o既歷程~少年時o既畫比較寫實，畫o既係周遭o既人同埋事，爸爸、妹妹都係常常出現o既主角，少年時係Malaga畫風景寫生等等~但呢個畢卡索美術館嘛，唔係只收藏名畫，而係佢o既大大小小o既作品，小如佢o既草稿，隨便用鉛筆o既寫生都有~令人驚歎o既係，佢唔係隨手一揮就會出現名畫，而係作畫前你會知道佢有好好o既佈局同預備，同一幅構圖可以畫好多次至出現成品，真係好努力o既genius﹗﹗好多人focus係佢晚年比較抽象o既畫風，覺得，吓，咁o既畫我都識畫啦，但你睇佢一生o既過程，你會知道佢真係好有料到﹗﹗

行完、睇完，冇得帶走，我買咗一張postcard留念，係佢年老時係陽台上不斷重覆畫啲雀仔o既嗰輯畫o既其中一張~

好喇，可以返去Basilica de Santa Maria del Mar了~

哇，令人肅然起敬o既聖殿…

海上聖母聖殿唔係屬於花巧設計嗰種，而係好令人心境好平和、好寧靜嗰種，我哋坐係後座一陣，好好咁欣賞一下同埋感受一下氣氛，有小男孩係祭台上面輪流講話，係我留心之下，發現係不斷重覆o既對答，唔唔，八九不離十，佢哋應該係唸緊玫瑰經﹗(雖然無從確認~)

待續

前住其他西班牙旅遊blog

Comments

comments