之前提過，其實今次個trip出發前我好忙要考試，所以除咗book咗機票、酒店、買咗兩本旅遊書之外，另一樣最重要o既preparation就係要買西甲足球波飛~雖然我唔係時時追住要睇波嗰啲狂熱fans，但足球我不嬲都鍾意睇o既~而且難得去到西班牙，覺得應該要去感受一下嗰重氣氛~上次我同day去美國時都有去睇NBA啦(請參閱：5-2-2011：USA trip day 4(part 2)．NBA球賽呀﹗Let’s go WARRIORS~)~

至於要睇邊場都有少少苦惱，因為我哋停留西班牙嗰前後9日之中，有三場波係有機會睇的，意思即是within呢幾日係我哋會去o既城市之中舉行：分別係西甲o既巴塞隆拿vs愛斯賓奴(即西班牙人)，仲有歐聯既巴塞隆拿vs AC米蘭，同埋馬德里體育會vs奧地利維也納，苦惱o既係，前面嗰兩場啲位已經賣得好多，淨番大多係單丁位，而後面嗰場又好似冇乜睇頭，一場去到揀嚟睇好似好可惜咁…幾番掙扎之後買咗巴塞隆拿vs西班牙人，因為係個trip o既開頭，正正配合到我想去巴塞隆拿先o既行程~我開頭仲話球隊Espanyol…即西班牙人？咩嚟o架？未聽過？後來聽friend講，香港係音譯，叫愛斯賓奴，哦，聽過聽過~

球賽九點鐘開場，第一次體會到西班牙人係夜貓子o既個性，但未去過又怕唔知難唔難搵，又唔知我哋電腦print出嚟嗰張A4紙門券係咪就ok，都係早少少過到去，有時間再係附近逛穩陣啲~

行去搭車時見到超巨型回收箱，似乎西班牙都幾睇重垃圾分類~有時會令人苦惱，因為你要掉嗰樣垃圾不屬於嗰幾樣回收o既類別，咁點算？

巴塞隆拿主場Camp Nou球場有幾個地鐵站落都ok，我哋揀咗Maria Cristina站落，好嘢可以趁機搭下「輕鐵」(其實佢叫做tram)﹗站就係正我哋酒店前面，之前嚟o既時候，見到啲輕鐵，係綠油油o既草地上面寧靜地行走我已經好鍾意了~果然會穿越嗰條我哋係酒店上面望落嚟睇到充滿樹木o既路丫﹗

我火車站抵埗時已經買好咗三日任搭乘車券，所以好方便﹗不過以輕鐵嚟講都冇人check飛~三日券嘛，係咪真係抵我哋都冇認真計過，不過起碼唔駛煩啦，另外如果唔次次買單程，另一個選擇就係買10次券囉，可以幾個人share，應該都會幾抵，假如你係一日之內唔係搭好多程的話~

轉車站Marina個造型好勁~

我哋係Espanya站再轉綠色線，呢個站內部就好古典~

因為時間尚早，而火車總站Sants同球場o既Maria Cristina係同一條線只差兩個站，我哋決定去Sants睇一睇買唔買到之後o既長途火車飛~有自助機喎，不如自己篤篤篤試下啦，篤就篤到，不過唔收cash只收咭，而咭就要有密碼嗰啲至得，咁即是我哋要去排隊買啦，但邊度買，問一度又推一度，搞嚟搞去又話已經冇得賣(雖然唔係好明原因…)，哎吔，唔理了，我哋返酒店上網買啦~不過好o既係，我哋都係火車站o既Tourist Information Centre拎咗啲小冊子，最好o既係拎咗地圖~

好，出發過去Camp Nou﹗

原來出站都唔係真係太近，好在有地圖，雖然都行咗幾個block o既距離，但都冇迷路~西班牙人o既午休真係唔講得笑，我哋三點幾鐘行過啲街，真係好多鋪頭都關咗門，啲路靜英英的~

到咗Camp Nou lu~~~趁住遠遠地用自拍王o既技術影張合照先~

點解用靚相機都咁矇？因為唔好意思企定定影人哋個鋪又唔幫襯囉(面紅中)~場外有好多呢啲小攤子賣souvenir，但我哋叫佢哋做老翻，事關啲product又比官方鋪平，而且啲款多好多，但又似唔多精美bor，我都唔知佢賣真貨定假貨，真貨又點能夠平啲賣呢，而且大家點解唔去official shop買呢？我哋都冇係呢啲小攤子度買呀，怕會變水魚…:p

其他嘢唔講住，搵咗個票房先~

問過了，原來我之前香港網上買飛，自家印出嚟嗰兩張黑白嘢就可以入場o架啦~不過印時jam jam地紙，有一張皺me mung~點解咁冇信心？因為我哋買飛時場波o既日子未confirm，話either 2 or 3號，待定，點知變成1號喎，好在有check清楚啫~

Camp Nou好大o架，因為除咗為人所熟悉o既足球隊之外，仲有籃球隊、handball、roller hockey、futsal(五人足球)，所以球場都多~

因為今晚有球場，所以參觀球場活動—-即Camp Nou Experience暫停，我哋嘛，起碼去咗souvenir shop血拼一番吧~心大心細之下，最後我買咗件外套，day買咗件polo tee，仲有買咗兩隻mug做記念，其中一隻送俾家姐姐夫~啲波衫真係賣得好貴，莫非外面啲小攤子係賣水貨？例如帶啲香港買o既波衫過去賣都仲有賺？

official紀念品店對面指示話係cafe，時間尚早，我哋睇下要唔要去食嘢，原來係溜冰場旁o既cafe，cafe就毫無睇頭o架喇，冇乜熱食，得啲唔吸引o既包，但溜冰場反而吸引咗我哋睇一陣，特別係場中間有一男一女練花式呢~係香港o既溜冰場，玩花式o既多數係小朋友or少女，雙人花式真係好少見~

溜冰場o既自動販賣機仲有…巴塞隆拿隊指定薯片？﹗

既然都係食包，我出番去大間啲o既餐廳啦，叫咗一個硬包同埋一份沙律share，諗住要食西班牙美食，第一餐就…少少失望囉~不過附近真係唔係好覺有其他餐廳，冇法啦，之後再去搵食啦~

我哋經過小攤子買咗睇波o既零食，入場去也~

好不容易左逛右逛，磨到入場o既時間﹗開始人頭湧湧了~啲街道仲有警察駐守﹗乜睇波都咁危險？要出動警察？

我哋由gate 32入場~

呢個就係我哋個位o既view喇，大家估下我哋張飛幾$$？即使係第二層，角落位，盛惠每位88歐羅，唔到你揀想買貴啲飛or平啲飛，因為基本上都好full，我哋上網買時只有呢兩個位係比較近(而唔係一齊囉)，位又唔算差，所以揀咗~我哋都奇怪o架啦，明明係3、4號位，但點解係網上個平面圖顯示又唔係一齊坐o既呢？原來佢哋興咁o架，單數一邊雙數一邊，所以3、4號係隔著條走廊﹗﹗唔理了，趁未係好多人，坐住一齊先啦~

一掃全景~~~

我著上球迷外套+頸巾﹗yeah~本來應該打開條頸巾影番張，但係有少少怕醜呢~

暫時人仲未好多~

睇到day件tee嘛？

我哋睇o既就係呢場Barca vs Espanyol~

開始前球場仲有好多預備功夫呢，要淋水啦~又要舖啲贊助商o既banner係地~

大家突然歡呼，因為球員入咗場熱身呀~佢哋拉下筋之後，練下長傳、短傳，果然好準，勁﹗

小朋友帶隊入場拍照留念~

我哋呢個位其實有樣好o既係好近啦啦隊，起動唱歌、叫口號打氣就係佢哋喇，平時睇電視睇波，有啲好雄壯o既男聲係度唱歌就係佢哋喇﹗所以氣氛好好呀~

結果我哋旁邊兩個佬個位又係分開咗，隔條走廊o既小兄弟又係分開，大家自動自覺，同自己一齊o既人合體，重新編排座位自動完成﹗開咗波之後冇再有人入嚟坐我就好安樂了~

全體起立，唱(？)國歌時，嘩，超大Barca旗幟垂落嚟，一開波就收番上去唔阻擋視線了~

開場時都有八九成入坐，以一個容納九萬八千幾人o既球場嚟講，真係好多人嚟睇~其實你會覺得睇波o既population同香港好唔同，香港睇波o既大多係後生仔or佬，但係呢度，有啲好老o既阿伯兄弟們，有family天倫之樂，有情侶拍住拖睇，而且你會見有好多disabled的、坐輪椅的，都無阻佢哋支持球隊囉，真好~

場波其實都幾一面倒，冇睇過正式統計，但我感覺Barca o既控球時間可能真係有7:3，Espanyol冇乜得幾多進攻又俾人搶番個波，但Barca雖然控球時間長，好多時推得好前，但偏偏冇話入好多球~

我哋呢個位o既好處係，角球好近﹗

哇，前面個人有做功課？佢都係遊客嚟o架，好似係法國人？

我之前都冇prep過就嚟，只知道美斯好勁一定要留意，不過呢場波佢冇話特別出色，反而見到個11號踢得好好，返到嚟香港問番朋友至知，原來佢叫尼馬，聽講係巴西o既超新星，我哋都有(少少)眼光~哈~最後完場Barca贏1-0，睇現場唔同睇電視，入波只係一剎那，冇重播再重播，所以全場都要好專心，錯過咗就睇唔到啦~雖然全場波冇話非常刺激，但感受到歐洲足球氣氛，滿足咗我今次個trip o既第一個願望咯~

散場時我哋都認唔番過嚟時嗰條路，所以決定「跟現場觀眾」，果然好正確，去o個個地鐵站唔係先前嗰個，但上咗車，去到下一個站時見到好多球迷等車，我哋就知道我哋跟人跟啱咗了~

已經被時差折磨得不得了，企係度都瞓得著，我哋要返酒店休息啦~

待續

前住其他西班牙旅遊blog

Comments

comments