20-6-2006:長長飛行去紐約

DAY 1 @ USA

經過好多好多個鐘o既飛行之後,終於到達七姨屋企啦~

成個六月二十日都好似冇乜做過D乜咁…但偏偏我o既六月二十日又比其他人特別長,多o左足足12個鐘﹗因為紐約同香港o既時差有12個鐘嘛~

諗番起今朝係屋企出發,先去可風「埋周」,再去機場,呢D事彷彿已經係好耐之前發生咁…哎吔吔,激死我啦,原本諗住帶本250個case去埋美國睇,但點知漏低o左係爸個office度﹗

我搭korean air,所以係首爾轉機,除o左去new york o個程delay o左之外(辛苦六姨丈等得好耐了…),整體都算暢順o既,轉機有個幾鐘o既時間,唔算太緊逼,因為好快就搵到下一班機o既閘口,所以好多時間剩,幸好有電視睇,轉播日本o既棒球賽,係巨人隊呀﹗(其實根本我就唔識D棒球隊,知道巨人隊係因為大雄個阿爸係巨人隊o既fans,巨人隊贏波佢同叮噹就會有零用錢,如果唔係就會發脾氣~)

之後o個程飛機好在旁邊o既一對韓國夫婦都唔錯,總之可以各不相干、和平共處,korean air o既食物都幾好味,每一餐都係一款韓式、一款西式任擇,我冇食韓式呀,係D拌飯呀、粥o個D,相對o黎講唔係太o岩胃口,所以冇辦法拎支辣椒醬lu(因為恒仔個媽媽鍾意食o個款醬,家姐叫我拎番o黎俾佢~)~

過關程序上都算順利o既,係人多D、打晒蛇餅o羅,只係後面有個香港大叔聲大夾無準咁發表偉論,10個煩,我好遺憾我聽得明佢講乜,打蛇餅兜幾個彎又講番相同o既o野,又大聲喎,真係想同佢講,全部人都聽到啦,明白晒啦…但唔敢…怕惹o黎殺身之禍…

七姨o既屋企好舒服呀~

我諗我打埋個diary之後都去訓覺lu~今晚同婷婷一間房﹗暫定聽日去美國自然史博物館﹗睇睇情況如何啦~

Comments

comments

在《20-6-2006:長長飛行去紐約》中有 4 則留言

  1. 實在太好喇﹗順順利利咁去到NY﹗你臨出發前個晚咪叫我抽問你…睇下你有無漏帶野既….結果尋晚我發夢你漏左帶你個新相機呀…好彩只係發夢者﹗ 玩得開心D喇﹗P.S. 不如回程試下食韓式喇…哈哈﹗

  2. Re家姐: 我諗樣樣都會帶漏,就係唔會帶漏新相機﹗我今次特登買家嘛~不過好高興你發夢都記起我~ 韓式…都可以試試o既~但要最後一餐先食﹗其實十三個鐘得兩餐,中間都會肚餓o架~

  3. Re day: yeah~你又成功賺到幾百蚊了﹗番o黎請我食飯﹗ 好o野~但你o地未用贈飲o既quota?

發表迴響

你的電子郵件位址並不會被公開。 必要欄位標記為 *