17-8-2007:沖繩2007第二天@萬座毛、海洋博、今歸仁、菠蘿園

DAY 2 @ OKINAWA

第二日o既行程﹗沖繩有一個必去o既景點叫做海洋博公園,入面有一個亞洲出名o既美之海水族館,但去呢個地方要搭車去名護市(Nago)再轉車,沖繩本島o既交通唔發達,冇乜高速公路,搭車又慢又貴,我o地決定參加local tour﹗起碼搭車唔駛停站丫嘛,車費方面都化算D~

旅行團係那霸公車總站附近集合,我o地好早就去到了,萬一個tour full o左都可以去其他地方玩嘛~原來唔係咁易full o既,結果全團人只有17人,基本上係旅遊巴上面每人可以坐兩個位﹗好鬆動~旅行團有導遊小姐帶住我o地,著住高貴制服o既佢儀態萬千咁同我o地講解,可惜我唔識聽日文呢,亦因為咁,我更加唔會歉疚地係車上瞓著覺…

萬座毛

萬座毛位於那霸市同埋名護市之間,所以算係「順道」去吧。之前係旅遊書睇過,知道有個出名似象鼻o既山崖,好似桂林o個個咁,不過都係家姐講我知之知道,「毛」係沖繩話o既意思係「大草原」,而以前有個皇帝o黎過,覺得呢個地方好大,可以坐一萬個人,所以就叫萬座毛了。

似象鼻o既山崖﹗

導遊小姐只俾我o黎留20分鐘,o個度有一條小徑,行完包括影相o岩o岩好15分鐘,跟住去埋洗手間,20分鐘剛好﹗真係計算準確呢~

繼續旅程上去北部o既名護市,路係沿海興建,我o地一直睇o既就係呢D靚靚景色了

原來下一站先去食午飯﹗我o地知道個團包午餐o既便當,我心目中o既便當只係四四方方o既膠盒,有D白飯、炸豬扒同埋醬菜o個D,然後一人捧住一個o黎食,點知係…點知係…嘩﹗咁豪華o既便當盒﹗仲要係一間酒店o既coffee shop度食﹗仲有湯同埋咖啡添呀~值回票價了﹗見到嗎?我講過,苦瓜係沖繩特產,所以沙律都要落﹗

海洋博公園

其實海洋博公園好大,有12個景點﹗但我o地只有三個鐘呢,所以先去睇水族館﹗

魚群呀魚群呀~

呢個就係好出名o既大魚缸了﹗好似電影院o既大銀幕﹗咦,我揀錯o左張相添,呢張好似係爸影o個張,我用o左o黎做background o個張係另一張呢,好似o個張靚D~heehee~

好得意呀﹗呢D係鱔魚o既一種,會將半個身埋係沙入面喎~

我好鍾意呢張o架~爸、媽、家姐都非常專注的各自睇魚~呢度可以抬頭望魚魚﹗

點都show下我同魚魚影o既相啦~

出到o黎呢個紀念品點可以扭蛋,我扭o左兩粒,係20-8-2007 o既diary就見到砌出o黎個樣啦~

除o左水族館之外,我o地係海洋博公園仲逛多兩個景點,一個係海龜館~

連裝飾佈置都靚過人~

仲有係園內出生o既小海龜添呀~佢o地係呢D「好急」o既水流入面學游水﹗

另一個就係海牛館了﹗我以前都唔知海牛係乜東東喎~

今歸仁城跡

旅行團就會帶你去多D地方了,第一日去o左首里城,第二日又去另一個城,呢個係今歸仁城跡,超級熱超級熱o既天氣﹗我都唔係好知發生咩事了,因為o個度只剩番城牆,冇乜建築物,而我又聽唔明導遊小姐o既講解…

好長好大o既城牆~

名護菠蘿園

對於菠蘿園有個情意結,當年同家姐去澳洲讀英文時weekend去o左一個菠蘿園參觀,飲o左一小杯世上最好味o既菠蘿汁,從此念念不忘﹗今次o黎沖繩都好想去菠蘿園,終於如願以償了﹗如果自己搭車就未必夠時間去啦~

除o左睇菠蘿田同埋其他熱帶水果之外,o黎呢度參觀o既一大目的就係俾機會團友們買紀念品,以幫補下旅行社~呢度都好闊綽喎,俾勁多o野人試食,新鮮菠蘿、菠蘿酒、菠蘿汁、菠蘿蛋糕、菠蘿果凍、菠蘿撻…任食﹗我o地狂食一番之後都有買o野o既~

回程lu~番去那霸市解散,我o地再去國際通搵地方食晚飯~

見到呢隻可愛o既熱狗~

去o左一間家庭式o既鋪頭,食到美味o既定食,不過我唔知頭唔知路咁揀o左一個有「魚」字o既定食,原來係冇乜沖繩特色o既炸魚呢,爸o既苦瓜同埋家姐o既豆腐更有特色呢~可惜﹗不過都好好味o既~而且個餐好抵o架,仲有刺身食添呀~

番到酒店,享用我o地係supermarket買o既甜甜菠蘿

Comments

comments

在《17-8-2007:沖繩2007第二天@萬座毛、海洋博、今歸仁、菠蘿園》中有 13 則留言

  1. oh i love the BIG aquarium!! feel that one is so small in the world……. and can be so close with the fish 😛

  2. 都不太似象鼻~  不過有大大大大大大海景~ 一定很舒服吧! 個六角盒很大~可以用來做全盒~ d鱔係唔係有人吹笛佢都會跳舞ga? 今次有得怒飲~但想信那一小杯的更叫人懷念吧!! 你是腸腸??!? 食完甜野,有沒有刷牙?!?!?

  3. 沖繩的風景果然靚wor~ 唔怪得有日本夏威夷之稱啦~ 果然明不虚傳! 個水族館真係好大好靚,去到一定覺得人類好渺小…  連個扭蛋機都大過人,勁! 仲有呀~ 你條裙都好靚呀~ 同沖繩都好襯啊!  

  4. Re sandy: 行入去時真係好自然的「嘩~」一聲﹗ 如果識得潛水更可以同佢o地更close呢,其實沖繩都有好多潛水熱點o架~不過我o地唔識…又冇時間…

  5. Re day: 是啊,好大風,不過,唔係涼風﹗因為天氣實在太熱了… 我一見到時都有咁諗﹗而且睇見就開心了﹗ hee,佢o地又唔係蛇~ 講得o岩啊~依然係o個杯最好飲~不過今次o既新鮮菠蘿真係好好食﹗ umum…我好似…um…退出o左o個個獎勵計劃了…你要唔要邀請我join番呀?呵呵~

  6. Re墨西: 靚~其實名護o個邊仲有好多靚resort添o架,我都好想第時再去﹗ 好似個水族館有入健力士世界大傳,不過唔sure係佢邊一樣o野,唔知係咪個大型玻璃幕牆呢?day話「五個撲水的少年」好似係o個度拍喎,你知唔知道係咪呀? thank you~我都好鍾意呢條裙﹗ 早排係赤柱買o架~

  7. 個海洋博公園好正咁喎! 好靚呀!仲好大tim,如果有機會去沖繩,我一定要去大開眼界

  8. hihi~~~ 我知你等緊我黎留言加啦~~~ haha~~ 好好玩呀~~~ 好多魚魚~~~~好想去睇吓呢~~ 努力趁假期休息吓~~~

  9. "名護o個邊仲有好多靚resort添o架,我都好想第時再去﹗" 咁就留番第時同day去啦~!

  10. 個 local tour 幾好咁喎!! 個導遊全程都講日文呀?咁佢有冇用英文講返俾你地聽呀? 苦瓜沙律d苦瓜係咪生架?? 生食咪好苦囉

  11. Re uHnsUi: 冇o架~冇用英文講番o架~所以零聽得明﹗ 沙律入面o既苦瓜生定熟o既?我又冇為意添~ 呵呵~苦就一定o架啦~不過我本身都好鍾意食苦瓜﹗

發表迴響

你的電子郵件位址並不會被公開。 必要欄位標記為 *