準備進入旅程o既第二部份了﹗我哋搭十一點幾o既內陸機，由Las Vegas飛番過去San Francisco，過到去三藩市，我哋會自己玩兩日，之後康熊貓珊珊就會嚟接我哋帶我哋去玩lu~

因為唔想太趕急，所以我哋決定去到機場先食早餐﹗

今次去到Las Vegas McCarran機場可以影下相了，嚟時得自己一個人，行李又多，影相都唔方便~淨係想快啲跳上架車度返酒店~

行嚟行去都行咗好耐先至坐低食早餐，因為間間都好貴添…俾得咁多錢又唔想食啲凍冰冰o既包，但坐低食啲熱啲o既嘢，閒閒地都要US$7-8，未計飲品喎~算啦，豁出去啦~填飽肚子要緊﹗

結果揀咗呢間Ruby’s，我哋一人一款熱包，好在即叫即整都幾好味，但真係貴囉，加埋杯咖啡每人都要US$10了，又唔係咩勁早餐，唔值丫嘛~如果美國人嚟到香港o既茶餐廳，食到US$3 o既早餐仲要咁大份+飲品佢哋會唔會唔想返美國？﹗

機程都好順利，今次我冇呼呼大睡了，係機上揭下本購物目錄，唔係想買嘢呀，但裡面有好多古靈精怪o既新產品，叫人嘖嘖稱奇，不禁會諗，又會有人諗到啲咁o既嘢o既呢？又真係會有人買？

一點幾就去到San Francisco了﹗係機場就有BART搭，BART係類似火車地鐵o既系統，BART o既B同埋A就係bay area，意思就係貫通San Francisco同Oakland等一帶地方，係機場都可以直接返到去San Francisco市區﹗而我哋book咗o既酒店叫做Stratford，位置就係Union Square附近，而BART o既Powell Street站行過酒店只係三個街口咋~非常方便﹗我都推介大家，如果去San Francisco自遊行的話，住呢間Stratford都唔錯﹗地點便利、新淨又舒適、麻雀雖小五臟俱全、又有早餐喎~讚呀﹗

仲有呀，因為位於Powell Street，所以酒店大門口就係cable car o既路線lu~

我哋放低行李，未有得check-in呀，唔緊要啦，出去玩先﹗今日o既重頭戲係睇NBA球賽，係香港就買咗飛啦，興奮咗我一個月，所以今日其他o既行程都係配合去睇NBA o既~球場係Oracle Arena，係Oakland嗰邊，所以我哋決定會去Oakland嗰邊o既Oakland Museum of California同埋Lake Meritt~

繼續搭BART﹗又可以好方便咁過到去Oakland了~

因為時間尚早，不過早一個站落車，去Oakland Downtown行下啦~一落車，哦，原來Oakland o既唐人街就係度lu喎~周圍都係中文字、中國人面孔呢~

一場嚟到，見到啲餐廳o既餐牌，哇，咁抵o既？比起香港可能貴，但比起呢度食其他鬼佬嘢真係抵好多喎，大概US$7就有一碟飯，我哋叫咗咸魚雞粒炒飯同埋過橋米線，勁大份呀~~~~~~~~~~~~~我哋好努力好努力咁食都差少少先食得晒添~又係一場嚟到，順便買啲生果食下先~因為係年初三，有啲舞龍舞獅嚟逐間鋪舞一下~好熱鬧呢~

咩叫做「布斐」？哦~buffet﹗

好，下一站~嚟到Oakland Museum of California~

其實旅遊書都冇介紹o架，係上望click下click下時搵到o既，就去睇下啦~museum有三層，而家開咗歷史同埋美術嗰兩層，仲有一層好似關於科學o既？仲未開~其實逢星期日(即是我哋去之後嗰日)免費o架~冇辦法啦，我哋係今日過開嚟Oakland之嘛，俾錢都入去啦﹗睇完之後都覺得好值得o既~

California係一個好多種族共融o既州，你來自邊度呢？大家contribute呢個地圖，可以搣一粒紅色貼紙，貼一貼你來自邊個地方~原來中國沿海地區、日、韓同埋歐洲都好多呢~南中國部份實在太多紅點了，我連香港係邊都唔係好搵到添，都係大約咋~

呢度show咗啲早期印第安土著o既生活用品~你一直順住次序行個展覽就會睇住加州歷史o既進程喇﹗之後就會發現啲西班牙人好衰，同埋啲中國人好慘lu~

亦有啲有實物o既展品，大家係呢度可以感受下露宿者o既辛酸，係個石管入面，有聲音講故事o架~

我係…「strangest thing in the museum」﹗仲有好多其他牌可以揀…:p

去到美術嗰一part，好多展品都好interactive o架~

呢個都幾有趣，其實只係一幅風景油畫，啲度有啲好舒服o既椅係度，俾你戴住個headphone，跟住就有把聲教你點樣另類咁欣賞幅畫，點樣focus係幅畫o既某一part，點樣發揮你o既想像力，想像自己身處其中，點樣focus係啲顏色度等等~

呢個咁立體o既展品呢，有啲類似形狀o既東東，俾你試下跟住切番出嚟，可以更加了解展品o既設計同埋線條呢~

周圍環境好寬敞，仲可以坐低慢慢欣賞啲畫，但museum下晝五點就關門啦，我哋時間都唔係好夠，要選擇性咁睇呢~

出到嚟戶外，仲可以睇番過去San Francisco嗰邊o既景添呢~不過我哋自拍影呢張相時其實已經俾人趕緊lu，佢哋要關門啦~

早排其實有Pixar o既專題展覽o架~但已經完滿結束咗lu~

我哋逛過去Lake Meritt~

玫瑰花形o既松果？咁靚o既？

都有唔少人圍住個湖嚟跑步、運動啦，又有人帶啲狗嚟散步~環境都幾舒服﹗

有啲鴨鴨悠閒咁遊呀遊~

嚟到呢度時我哋都忍唔住哼Zarahn o既「如果感覺有顏色」呢，「雪花白色，黃昏金色…啦啦啦~」真係好黃金﹗而且仲反映咗係水面添~

待續﹗下一篇就去睇NBA啦~

前往其他美國旅遊blog

Comments

comments