31-3-2024:福建探親掃墓大食團day 3(part 2).變身簪花女子s@蟳埔民俗文化村

食完自助餐出嚟有啲落雨呢,下晝表嫂車我哋去蟳埔民俗文化村遊覽,其實最重點就係要打扮打扮影下相,day 1時係西街見到有好多女仔戴花係頭上面,下身著住啲旗袍呀、民俗服裝下咁周圍行周圍影相,當時曉已經好想試下了,今日仲好啦,時間鬆動啲~

我哋第二車出發,去到再同家姐佢哋三母女會合,雨有啲大呢,好在後來去戶外影相時停雨了,太好啦~

表嫂帶我哋去一間變裝嘅鋪頭,其實我哋都唔知頭唔知路,三個細嘅小朋友同埋我一個大人報名要變裝試下簪花,進入青春期嘅大表姐冇興趣玩呢啲了,我大概童心未泯吧,乜都想玩~yeah~整頭之前先揀衫,問咗小朋友想要嘅style,店鋪嘅大嬸職員們就幫佢哋襯幾套嚟揀,詩好快就揀到,曉最怕啲衫唔舒服,頸、腋下緊少少都接受唔到,好在最後都襯到一套佢款式又鍾意,又著得舒服嘅衫~

小朋友們先開始整頭~

到我揀衫嘛,因為減肥成功,好想挑戰連結婚時都唔太敢著嘅大紅收身旗袍~呢啲時候真係要信經驗十足嘅大嬸職員們,佢哋瞄一瞄你嘅身材,就可以係過千套嘅衫之中揀到啱你身嘅嗰一條裙出嚟~一試,嘩,fit到不得了﹗結婚時都仲要著腰封係入面,今次連托得好少少嘅bra都冇特別著就著旗袍了~

換好衫就坐櫈仔簪花,紮條辮仔之後,個大嬸/婆婆就幫你駁假髮卷一個髮髻,然後用類似筷子嘅長木簽固定,圈上幾層花,再簪上一朵朵嘅假花,就完成啦~

除咗對波鞋非常唔襯之外,我哋個個都好靚呀~哎吔,仲有個眼鏡同隻手錶都非常唔襯呀~

正打算出發去影下相之際,有自稱攝影師嘅人過嚟開始幫我哋影相,吓?﹗原來我哋個package係包埋攝影服務嘅咩?﹗搞鬼嘅係,係我冇任何心理準備之下就馬上開始了,因為要追求完美,攝影師叫我除眼鏡,我明嘅,戴眼鏡影係好怪,但眼睛睇嘢矇查查時仲要拎住道具擺pose,好似影婚紗相咁叫我望呢邊又望嗰邊,點樣笑,隻手又擺係邊,真係非常尷尬呀﹗早知係咁就戴隱形眼鏡,同埋帶定對襯啲嘅鞋嚟啦~

一邊影嘅時候一邊覺得非常尷尬,好想快啲結束,但攝影師睇落又充滿自信,又會讚賞,好似都可以期待下成品咁~anyway,既然開始咗就盡力配合啦~我同詩有一個專屬攝影師,曉同穎妍就由另一個攝影師負責~當我哋個攝影師影詩時,教佢擺啲可愛pose,雖然係我哋平時唔會識得擺嘅pose,但又真係幾cute~可能本身詩夠可愛,carry得起啦,哈哈~

我哋係攝影棚影影影,跟住又出去附近嘅街角影影影,都真係影咗好多張,影到大家都筋疲力盡~返去鋪頭時,攝影師由相機拎張memory card出嚟,直插爸爸部電話度,過晒全部相俾我哋~哇,咁即興影嘅相,冇化妝,冇執過嘅相,居然有咁嘅效果,真係勁﹗當然我有一堆相係真係尷尬表情,但亦有好一堆相係我自己非常滿意,可能啲相機靚啲、燈光又好啲,影出嚟比爸爸用iphone影嘅清晰,面色亮白啲,色彩sharp啲~睇到啲相我要多謝我嘅健身教練,冇著腰封或其他矯形內衣嘅情況下,隔住件旗袍都睇得出練過嘅背同pat,我post咗上Facebook,朋友們都話我健身教練好得,真係有血有汗換番嚟嘅成果嚟架~

扮cute pose詩carry得好好~

因為有攝影師control住,曉都冇太傻~

咁多張相我最滿意呢張﹗睇到條腰嘅曲線~

比起iphone影面色亮白好多,係全靠打燈丫,定係都有少少filter?

我都好鍾意呢張呀,因為睇得出練過嘅背同pat,平時舉啲鐵係冇白費嘅~

我見攝影師幫詩影時真係好投入~

可能因為小model好配合,影出嚟效果又咁好啦~我諗6歲應該真係啱啱好,又follow到啲指示,仲係細細粒好可愛~

我有空檔時同老公自拍下先~

姐妹合照

三表姊妹

呢張全家福我都好鍾意呀,暫時做咗我Facebook profile pic~

我哋就係幫襯呢間芊顏攝影工作室啦~

我哋個package仲有多一套衫可以換,四個女孩子即管再去揀衫~

但即使揀好換好,無奈大家已經冇晒電,換完之後再去行街影相嘅興緻已經接近零,好似影咗三幾張就收隊返去了~

我哋換番好自己衫就出去大街等架13座嚟接我哋,原來大舅父大舅母已經係車上面,我哋一齊出發去下一站—-五店市啦~

前往其他中國旅遊blog

Comments

comments

發表迴響

你的電子郵件位址並不會被公開。 必要欄位標記為 *