30-12-2022:首爾江原道冬日滑雪行day 9(part 2).米芝蓮推介黃生家刀削麵、人頭湧湧首爾廣場溜冰場

返去3355韓服店換好衫之後,我哋首先要填飽肚子,之前家姐都有提過,佢之前食過好一正嘅餃子店就喺景福宮附近,有意一齊去食下,我當時其實真係一般般,一來凍咗好耐想食啲熱辣辣嘅嘢例如熱湯之類,二來有啲怕去啲名店要等位等好耐,所以路上見到有其他餐廳都想「不如食呢間算數啦」嘅念頭~詩詩基本上由3355行出嚟時已經好唔掂,我抱佢行咗冇幾多步就瞓著咗,既然家姐佢哋咁想去食,人哋又真係米芝蓮推介,仲要喺正附近,冇理由死都唔一齊去食咁衰嘛~

就係呢間黃生家刀削麵了,見到條隊果然嚇死人,冇得攞飛,真係要排,不過店家好貼心,專登整咗個好寛敞嘅等位專區,又有透明膠布擋住啲風,喺入面好溫暖,仲要有位坐,只要按住正確方向跟指示移動個pat pat,就可以舒適等位~總算大開眼界,如果唔係有家姐一齊,我哋真係多數唔會排~

人哋咁威係有原因丫嘛~

詩詩瞓咗,俾佢瞓耐啲先食嘢都係好事嘅,瞓得太短起身又會嬲爆爆,兩個姐又自己玩得開心,呢一刻我又覺得等耐啲都ok~本來一直由我抱住詩移動個pat,但到我哋入座時,即刻要交俾爸爸抱,因為我哋要坐樓上呀,著住咁厚衫,攔腰抱住個已經變得唔太輕嘅詩,行條咁窄嘅樓梯我真係唔夠膽~

我哋一行七人安排咗有兩張四人枱嘅榻榻米包廂俾我哋呀,所謂包廂,係開放式嘅獨立房囉,幾好呀,可以除晒鞋,free啲,而且冇外人坐附近,我哋share食物又方便啲,小朋友兩邊坐下又得~

泡菜有辣有唔辣,good﹗

一定要食王餃子,超飽滿,雖然冇話感動嘅味道,總算係好味嘅韓式餃子,生意咁好,又只供應幾款食物,全部叫做新鮮即製(應該係密密不停煮,密密不停上菜)~

刀削麵超夠份量~

水煮肉yummy~加上濃厚嘅蝦仔醬汁同埋泡菜一齊食,正﹗不過青菜數目少啲,後來只可以就咁食肉,都正嘅,但就冇包住食咁好~

綜合煎餅,真係要多人先share到,太少人食會太膩,多人分就樣樣試下啱啱好~

睇咗地圖,我哋過返去景福宮搭小巴,我哋下一站去首爾廣場溜冰,決定咗冬天去韓國,去市廳對出嘅臨時戶外溜冰場已經係我plan嘅must do item﹗其實好耐冇溜冰啦,但記得以前學韓文時教科書都有講過呢個冬季限定溜冰場,喺聖誕樹底、飄雪之中、星夜之下溜冰,感覺好浪漫呀~陣間睇到現實,就知道並唔係想像中咁~

搭小巴途中有經過光化門廣場,我今個trip其實都好想抽個夜晚去參觀燈會,但每日去到夜晚時都筋疲力盡,剩低今晚最後一晚了,究竟仲有冇機會呢?

去到首爾廣場,真係有巨型聖誕樹架﹗﹗見到小朋友們同聖誕樹嘅比例,就知道棵樹有幾高~

yeah~首爾廣場溜冰場﹗

入到去,人頭湧湧,超級恐怖﹗﹗﹗從來未見過一個溜冰場入面可以同時有咁多人一齊溜冰,香港啲溜冰場肯定唔會有咁嘅畫面~因為呢個期間限定溜冰場幾乎係免費咁滯,1000 won玩一節,包埋租借裝備,仲可以喺邊度搵?

不過無論幾多人,環境有幾惡劣,都阻止唔到我貪玩嘅心~我即刻去了解下點樣租鞋,租鞋處唔係好見有明確嘅隊伍,排咗先算啦,排到近啲前面,先見到話要買咗門票先租鞋,咁你哋排住先,我去買飛﹗原來要係自助售票機度買,同埋有分節數,oh no,而家呢一節得番20分鐘,如果玩下一節又會趕唔切去睇五點鐘嘅show,20分鐘就20分鐘啦,反正都係每人1000 won~好在上次喺平昌打過保齡球,我哋對於自己嘅鞋碼in terms of韓國size好清楚,為咗減少溝通時間,我將大家嘅尺碼list咗係電話個note pad度,俾個職員睇住嚟執,哎吔,點知因為我哋係一節嘅中間,好多common嘅碼都俾人借走晒,一開始得三個小朋友嘅碼,後來啲大人碼先一對一對咁出,我哋分批幫小朋友著鞋~

好在有著過滑雪「硬鞋」嘅經驗,呢對溜冰鞋都硬,但都總冇滑雪嗰對咁硬~

因為人多到爸爸覺得有啲辛苦,佢話佢唔溜了,好啦好啦,我哋幾個去啦~借完鞋之後仲要喺個非常混亂嘅地方度搵頭盔,我諗好難搵到好fit了,總之笠得住個頭就算啦~

準備入場﹗哎吔,去到溜冰場搣飛嗰度,職員先至話一定要戴手套先入得場,我對手套就袋喺褸袋,但兩個小朋友唔係太鍾意戴手套,呢兩日又回暖咗好多,我哋根本冇攞手套出嚟,記住,我哋係已經每人有三對手套呀下(香港帶過去嘅淘寶oversize滑雪防水手套、東大門街邊買嘅冷手套、滑雪用品店買嘅滑雪防水手套)~冇手套入唔到去玩,曉曉嘅眼淚好快就流咗出嚟,慘,仲要逸逸一家已經順利入咗場添~既然強制要人戴手套,應該有小賣部之類會賣手套?身手靈活(冇著溜冰鞋)嘅爸爸即刻衝去搵,好快就帶來小朋友嘅第四對手套﹗係非常薄it it嘅毛線手套,質地有啲似勞工手套咁,點都好,1000 won一對,可以即刻入場,點都抵~

開始我哋掙扎之路~因為曉詩都完全冇溜冰經驗,好多年冇溜冰嘅我自己雖然唔驚,但要帶住兩個完全唔識玩嘅小朋友真係有啲難度~冇架,扶住圍欄一步一步慢慢前進啦,反正都係得20分鐘咋~

人好多,有啲人挨住圍欄休息,有啲位真係要雙手離開圍欄先可以繼續向前進,我唯有叫詩扶住圍欄,幫完曉過去再幫詩囉~

有少少溜冰經驗嘅逸逸都可以拖住表姐~

20分鐘好快過去,大家總算一嚐溜冰滋味,滿足咗個心願,下次返到香港再去溜冰啦,可以盡興啲、輕鬆啲慢慢學慢慢試~呢個係細場,只有人手剷一剷冰面啲碎碎,佢哋話大場嗰邊有機喎~場邊有啲好似碰碰車咁嘅車,可能少人嘅日子會開放其中一個場俾大家玩車?

還好鞋,我哋準備去下一個活動啦~本來首爾呢段時間冇咁厚積雪,呢啲應該係溜冰場刮出嚟嘅碎碎堆成吧?

P.S.家姐打呢篇旅遊blog時search番首爾廣場溜冰場啲資料,先知道原來要6歲以上同埋著到最細嘅溜冰鞋嘅小朋友先可以入場玩,其實詩詩未有耐夠秤,不過買飛時唔知,入場時又冇人攔阻,所以先玩咗咋~(好在啫~)

前往其他韓國旅遊blog

Comments

comments

發表迴響

你的電子郵件位址並不會被公開。 必要欄位標記為 *