喺Lotteria食飽飽，我哋差唔多要離開住咗四日三夜嘅平昌鳳凰度假村了，下一站我哋要返首爾啦~

拎番行李準備去平昌站，因為度假村shuttle時間唔match火車班次，我哋請酒店職員幫我哋call的士過去，職員都好有責任感，聽到佢同的士嗰邊對話，都有問清楚車牌，同埋收費大約幾多錢~出去車站都係得一條路，我哋兩架的士基本上前後腳去到~出去時都有見到「平昌韓牛村」嘅路牌，話說之前夜晚我哋都有見過呢間餐廳去度假村pick up客人嘅van仔，大家有討論過，啲韓牛喺餐廳隔離moo嘅話究竟食唔食得落，我估「韓牛村」都係個名啫，斷估唔係真係自己養嚟賣嘅~

車站裡面同外面依然擺放住2018平昌冬奧嘅兩隻吉祥物公仔~

仲有少少時間剩，我哋出去玩多今個trip嘅最後一次雪，返到首爾應該唔容易有咁厚積雪了~再一次發現完美雪﹗﹗我即刻介紹大家要踩下落去，因為感覺非常暢快~

戶外影靚啲啲~

正正因為踩落啲完美雪感覺太暢快，三個小朋友特別係逸逸就踩到忘晒形~上次曉玩雪時試過啲雪跌入靴入面融咗，凍到隻腳痛，點知今次輪到同一件事發生喺逸逸身上~仲痛到喊~

入番去車站，我索性幫曉詩除晒雪靴同對濕襪，換對乾淨襪，再換番波鞋，咁就好好多~好在我哋啲鞋放喺兩喼一袋個袋入面，要拎出嚟好容易~因為取取暖，我喺商店買咗暖嘅樽裝柚子蜜大家share嚟飲，店員正正係嚟平昌嗰日幫我哋call的士、視力好好嗰位女士，佢認得我呀~

準備上車~

車上當然要兩個小朋友好好瞓一覺啦，因為夜晚仲有今個trip嘅另一重頭項目﹗﹗我哋約咗我嘅韓文老師食飯呀~仲要係好多道菜，食好耐嘅韓正食套餐，一定要夠精神啦~

返到首爾站我哋同家姐兩家人就分道揚鑣了，因為佢哋會再一次入住明洞嘅酒店，而我就book咗仁寺洞嘅Nine Tree，之前2018年一家九口嚟韓國時住過明洞嘅Nine Tree，印象好好，今次搵住宿時發現仁寺洞嘅Nine Tree都睇落幾好咁，我哋book咗一張雙人床一張單人床嘅家庭房~話說我哋返酒店搭的士都有少少緊張，因為我哋嗰一刻手上嘅won現金得番好少，三張T-money都得好少錢，當時又唔知所有的士都可以直接同信用卡俾，所以都擔心萬一少少塞車，車費比預期貴唔夠俾咁點算好~當然有驚無險啦，但我哋返酒店settle down之後要出去搵找換店快啲唱錢都好緊要丫~

好在而家啲地圖app除咗可以search指定地方之外，打「找換店」都可以搵到附近邊度有，可能地圖啲資料唔係最update吧，喺我哋步行去地圖顯示嘅找換店途中，已經遇到另一間找換店了~老闆見我哋用港幣嚟換won，即刻親切地同小朋友講「ni2 hao3」，但兩個唔係好tune到人哋對佢哋講普通話要應人囉~真係失禮晒~

換完錢我哋就直接去約咗老師嘅餐廳了~當初決定個trip時已經打算會約老師食飯，想一大夥人坐得舒服、食得自在，可以慢慢傾，有諗過食自助餐，但聖誕期間好多自助餐都book得好full，又分頭圍尾圍，收費又貴，於是放棄咗~轉用Naver search「仁寺洞+美食店」，搵咗幾間餐廳同老師一齊傾，結果揀咗呢間喺正鐘閣站旁邊嘅봉우리韓正食，套餐好吸引，老師幫手打電話去book枱，仲可以包廂添，咁就小朋友嘈啲都唔怕了~

商場外面有靚靚嘅佈置，我好鍾意嗰啲發光嘅兔仔~

我哋一家最早到봉우리韓正食，老師一早book咗枱，職員就帶我哋去包廂，隔離房嘅團體有好多人呢，後來老師話佢哋應該係教會，因為有聽到佢哋一齊唱聖詩~

入到去見到啲餐具咁靚就好興奮了，曉曉話要加埋佢個樣落去先可以放小屋喎，「時光小屋」係我哋平時幫佢哋儲起啲相嘅app~

老師嚟到了﹗感覺好神奇，我哋喺Amazing Talker用Zoom上堂，每星期一次，應該差不多有一年了，成日見，成日傾計，即使係第一次真正嘅見面，一啲都唔陌生或者尷尬，好容易就可以好似平時咁傾起上嚟~我同老師介紹緊帶俾佢嘅香港禮物，我帶咗蝦子麵、蠔油同埋兩包醬料俾佢，正係度說明俾佢聽要點煮~

到齊了﹗家姐同老師坐，我坐老師對面，可以傾下計﹗家姐唔識韓文架，不過老師識中文，仲講好流利嘅普通話添~佢幫好多電視節目做翻譯架~

點解呢篇blog題目叫做同老師正式「相見」呢，因為我哋叫咗右二嗰款套餐，直譯就係「相見禮正食」，其實「相見」，係指男女打算結婚時相方家長見面食飯嘅嗰種相見，唔係我哋呢啲相見~點解揀呢個套餐係因為想食啲內容者，呵呵~訂枱時餐廳知道我哋有小朋友已經問定小朋友年齡，餐廳有提供兒童餐，睇下我哋點樣order~我哋5大3小，結果叫做6份相見禮正食，另外一份兒童餐，開頭職員覺得好奇怪，小朋友應該會更鍾意食兒童餐喎，而且唔駛浪費丫~因為想佢哋都試下大家一齊食嘅嘢嘛，我嗰兩隻除咗太辣之外，好多嘢都食到，所以一齊食都無妨~

隔咗成個月先寫blog，老實講啲味道已經唔係好記得，但總之呢一餐所有食物都係好味嘅，冇一樣嘢唔好食囉~

我知道，右邊嗰碗係南瓜湯，唔會好似西湯咁重奶味，但好甜，兩個小朋友都鐘意~oops，睇番menu，應該係seasonal porridge嘅南瓜粥，唔怪得知咁杰啦~

生魚片要配搭紫菜同醃菜食，對我嚟講都係新食法呢~

呢個類似雞絲粉皮啲粉皮好好味，可以食完再添~

呢份就係烤漢堡兒童餐喇，其實大人個套餐後來都有相同嘅漢堡，不過兒童餐嘅飯糰就用紫菜碎包住，韓國小朋友應該更鐘意吧？我估比起兒童餐，曉詩都應該更鍾意大人餐~

酸酸甜甜嘅炸魚塊~

辣辣嘅炒花枝~

蒸肉片另加辣醬同明太子醬，詩詩唔食得辣，但食咗勁多肉片~

詩詩都食咗勁多鮑魚﹗證明佢真係病好了~原來食物唔係一人細細份咁上，而係大碟放喺中間俾大家share，因為係長枱，所以我哋係兩大碟每邊放一碟~

呢個就係同小朋友一樣嘅烤漢堡了~雖然肉質硬咗少少，但我鍾意佢偏甜嘅韓式甜味~

食餸食到勁飽先至上飯、大醬湯同配飯食嘅小菜﹗﹗如果只係要填飽肚子，其實淨係食呢一份都夠晒飽了~雖然已經飽飽地，因為飯、湯、小菜樣樣都好味，結果我又全部成功消滅﹗﹗

最後甜品係新鮮菠蘿同埋羊羹，仲有杯清茶，為豐富嘅一餐畫上完美嘅句點~

同老師傾下旅行嘅所見所聞，又傾下香港同韓國嘅各種文化特色，呢餐食得又開心又滿足~

我哋可以暢談甚歡，全靠有個萬能爸爸，可以長時間娛樂幾個小朋友，佢哋要唔悶，媽媽們先有得傾下計嘛~

老師太客氣啦，佢送咗三個小朋友一人一個Kaokao friends公仔，兩個女暫時改名都冇乜咩心得，所以詩詩嗰隻桃叫做星星，曉曉嗰隻貓叫做橙小星~小朋友好開心呀，多謝老師~

之後唔知幾時先再真真正正見面啦，再見啦﹗下次Zoom好快又再見﹗

我哋離開餐廳時落雪呀﹗我哋一堆南方人都非常興奮~其實滑雪嗰陣都有落過相當程度嘅雪，但當時忙住同塊滑雪板喺個斜坡度掙扎，根本唔得閒理啲雪住，今次先可以好好咁欣賞落雪~

興奮selfie~

跟住大家就分道揚鑣啦，家姐佢哋搭車返明洞嘅酒店，我哋就步行返酒店~

一路上享受住微微嘅雪，去到酒店明口都唔捨得入去呢~啲雪好細好薄，一捉上手就馬上融化~一個月後嘅一月尾，日韓正好遇著寒流，聽講首爾都凍到-19度呢，真係難以置信~

沖完涼乾乾淨淨，當然要攬住新寵橙小星瞓覺啦，goodnight~

봉우리韓正食網站：

http://www.bongwoorin.com/xe/main

前往其他韓國旅遊blog

Comments

comments