28-12-2022:首爾江原道冬日滑雪行day 7(part 1).七個滑雪初哥@平昌鳳凰滑雪場(上)之裝備篇

講起滑雪,其實2002年同爹媽家姐去哈爾濱旅行時滑過一次(我都完全唔記得係2002年,好在我哋偉大嘅家族史官,即使就呢個trip一篇blog都冇打,因為我哋係2007左右先開始打blog嘛,再之前嘅blog都係retrospective咁打,家姐都記錄咗個trip係2002年2月時去,係喎,講起又有印象係農歷新年假期時去喎,當年喺大連跨年嗰一剎那我哋係街上,周圍放爆仗嚇得我哋一跳,感覺好似成個城市燃燒咁~),但當時跟旅行團去,一來花喺滑雪場嘅時間短,二來旅行團幫手打點一切,唔需要自己傷腦筋要點樣借裝備之類,三來嗰次都係hea滑,基本上只係著住自己衫玩咗一陣咁大把,冇人教唔識滑,覺得凍就索性入室內飲咖啡,所以印象唔深刻,今次我哋七個—-四大三細,都可以稱得上係滑雪初哥~

連點樣租裝備都no idea,plan今次個trip,聽到我話想滑雪時我老公都好擔心會受傷,因為佢當年陪我去溜冰拗柴後,而家都仲風濕痛緊(近年好似少咗投訴腳痛喎~),加上又拖男帶女,所以跟教練都係個must啦~上回講到度假村嘅外國人滑雪體驗課程已經fully booked,所以職員介紹咗我哋一個私人教練嘅電話號碼,用Kaokao talk講好,問好咗一個教練教三個小朋友嘅價錢,就諗住,我哋係附近陪住,自己租裝備順便聽佢哋教咪ok囉~總之約好咗8:30pm嚟接我哋啦~

因為8:30就pick up,我哋喺最最最早嘅7:30去酒店楝食早餐,約咗教練嗰邊喺酒店楝lobby pick up~

我哋食早餐時見到窗外有少少落雪,其實唔係家姐恒仔發覺我都唔知呀,佢哋果然有多過我嘅睇雪經驗~

我哋出去室外時其實落雪唔算太明顯~

教練嗰邊嘅人嚟到pick up我哋,其實我哋開頭都唔太明白點解要上車,因為滑雪場入口就喺酒店楝旁邊嘅滑雪小屋之嘛~我哋照上咗車先,究竟駛去邊呢?坐咗一陣好快就落車,原來係一間滑雪用品店,我哋喺度先做好各種準備,會合教練,當然最重要係俾錢,先正式去滑雪~

入到去滑雪用品店即刻一大棚職員招呼我哋,話幫小朋友換衫先喎~

帶咗大家去成排小朋友滑雪裝嗰度,問佢哋鍾意咩顏色,其實除咗曉曉之外,細個嘅兩個小朋友基本上唔算有得揀顏色,因為要size fit的話,剩低可以揀嘅都唔多,詩詩細細個,搵到啱著已經算好彩~

我開頭都有少少疑惑,究竟滑雪係咪一定要著滑雪裝呢?係有型丫定實際上有咁嘅需要?我自己著咗上去就發現係有實際需要,因為成套衫褲防水,即使跌落地都唔會濕,而且衫褲好保暖,可以暖得嚟又輕便,而且全部袋都有拉鍊,要放滑雪pass嘅嘟嘟咭、手機、零錢等都唔怕跌出嚟~但係小朋友要著住租嘅衫,開頭都有啲唔自在~

三個終於著好衫褲,跟住就到滑雪靴、配埋滑雪板啦~小朋友一著對「硬鞋」,即刻叫晒救命,逸逸之前有去過溜冰,總算著過少少硬嘅溜冰鞋,但呢對滑雪靴比起溜冰鞋更硬,曉詩都wee wa鬼叫~

原來仲未完,仲要戴頭盔~

我心諗,我哋唔會滑好高速,都唔慌危險啦,真係要頭盔咁誇張?(事關上次去哈爾濱時都只係戴自己嘅冷帽滑雪~)後來覺得真係唔錯,護目鏡同頭盔一體,唔駛煩咁多樣配件,而且未開始運動時頭盔都幾擋風丫~

上次咪提過曉詩今個trip每人總共買咗四對手套嘅,呢度出現第三對了,本來出發前淘咗兩對滑雪手套,但因為size唔太啱,兩個小朋友都唔願戴,所以後來都冇帶出來了,但今日滑雪教練要求一定要戴,而確實去到雪地手真係會凍僵,我哋手上又只有唔防水嘅冷手襪,被逼要喺滑雪店即場買兩對滑雪手襪了(size曉還好,詩都係不停甩,始終手仔太細),而老套嘅係,day對毛毛靴買得有少少細,佢冇著襪出嚟,結果又買咗對襪嚟滑雪~

其實我哋抵達滑雪店時,老闆娘已經話小朋友太細,一個教練帶三個小朋友唔ok,最低限度都要兩個教練,一個教曉+逸,一個專注教詩,我哋唯有聽佢哋講係咁安排啦,最後deal係三個教練出動,教我哋七個人,開頭都覺得,喂,係咪焗我哋要咁貴架,後來先發現,其實係三個小朋友都真係要一對一咁教先得,仲要爸or媽做少少翻譯同埋鼓勵先ok,錢都叫做俾得心甘命抵啲~

話說三個小朋友著好晒裝備,教練們就話,反正一架車載唔晒,就帶佢哋三個先出發,其實我都叫住話佢哋可能會喊,但都阻擋唔到佢哋,總之一人夾一個先上咗車出發去滑雪場了,我哋擔心都冇計了~

既然已經踩咗落個坑度,我哋大人們都決定喺滑雪用品店度租埋裝備同埋用具,比起佢哋,我哋四個動作就快好多喇~找埋張單,車返嚟接我哋就可以出發去會合佢哋了﹗

平昌鳯凰度假村網站:

https://phoenixhnr.co.kr/page/main

前往其他韓國旅遊blog

Comments

comments

發表迴響

你的電子郵件位址並不會被公開。 必要欄位標記為 *