陪兩個小朋友喺遊戲室玩,我一直留意住時間同電話,睇下家姐一家幾時會到,見到佢哋send message嚟話上咗度假村shuttle bus,我就召兩個小朋友出嚟,我哋準備去lobby接姨媽佢哋啦~
第一日嚟到時見到呢隻狗仔,佢哋唔肯影相,今次就肯了~度假村係pet friendly,除咗部份客房可以俾寵物入住之外,呢度仲有寵物美容店同埋寵物cafe,呢隻狗仔就係宣傳呢啲服務,不過我哋住咗三晚好似都唔係好覺眼見啲人帶寵物嚟呢~可能冬天大家主要嚟滑雪,夏天先至帶埋小動物嚟度假吧?
因為由我哋住嘅橙楝,以至去Center Plaza嘅遊戲室,以及接姨媽嘅lobby全部都有室內通道可以貫穿,我哋著得好單薄落樓,以為佢哋會係condo lobby出面落車,所以就咁喺lobby等佢哋~點知等呀等,明明上咗車都好一段時間,又未見架車又未見佢哋,咩事呢?家姐send咗個whatsapp語音嚟,話搵唔到check in嘅地方,好在我哋嚟到呢度打滾咗24小時,就叫佢send張所在位置嘅相嚟俾我認下~
我:「呢度隔離一楝就係Phoenix Hotel,再隔離一楝就係Blue Condo~」
我:「呢度應該係hotel,入去落B1~」
加埋影咗張地圖俾佢參考~
我哋重逢啦﹗好耐冇見~有一個幾星期冇見啦﹗出發前有一日約家姐食lunch,分別時我哋話「韓國見」,就係今日啦~
排隊等check in時,三表姊妹又係久別重逢吱吱喳喳,佢哋又高興地同lobby嗰隻宣傳狗仔玩~原來隻狗仔會跟人做動作架~你睇逸逸~
逸逸飛~
狗仔飛~好專業﹗引得小朋友笑到卡卡聲~
要等成50個號碼先輪到佢哋check in,小朋友等到有少少奄悶,我提議帶佢哋上我哋房玩住等,因為訂房用家姐個名,於是留低家姐喺lobby,我同恒仔帶住三個小朋友上房玩住先~
逸逸係咪迅間愛上暖暖地熱房呢?btw,邱詩你搞乜?
話說我送咗佢哋上去之後,就落番去lobby搵家姐,因為一來check in有個識韓文嘅我喺度好啲,二來我都想request安排佢哋間房同我哋同楝同層,始終呢幾日都有好多時候要相約一齊玩,住得太遠好唔方便~我哋等嘅時候隨口up,問證件喺你度呀可?先發現原來證件喺恒仔度﹗﹗即刻call佢落嚟先check in到~小朋友喺度時啲number跳得好慢,心急時就跳得勁快,好在啱啱趕得切~
佢哋成功入住同我哋一樣嘅橙楝二樓,係隔幾間房啫~小朋友喺房玩多一陣,家姐佢哋稍稍安頓好又休息一陣,我哋相約六點鐘出去晚飯,打算一齊去烤肉~
久別重逢要開心拖手吱喳嘅三表姊妹~
去到Center Plaza見到好似小偷嘅聖誕老人~
出到去烤肉店,曉曉又要失望多一次了,尋日我哋見到六點鐘時好少人,以為因為食飯peak未到,一心諗住今日六點鐘嚟ok,點知原來已經full booking,好在我哋仲住多一晚﹗即刻book定聽晚張枱,我哋誓必要食到丫﹗
唯有入去室內食嗰間韓式餐廳啦,都要等一陣位,帶小朋友出去踩一陣雪消磨一下,好快就可以入座了~
後面就係condo嘅藍楝了~
入座了﹗餐廳雖然少少貴,但原來有得任飲馬格利酒﹗﹗
嚟咗韓國咁多日,一啖酒都未飲過,當然因為冇伴啦,家姐嚟咗,有人一齊飲,正~
唔飲酒嘅大人小朋友,都有韓式飲品,除咗詩詩大讚好味之外,其餘嘅人試過一啖都興趣不大,因為有好濃嘅肉桂味,詩詩呢?夠甜就好飲架啦~
叫食物方面,主要希望叫到小朋友啱食嘅嘢先,Bulgogi醬汁烤肉就係all time favourite,我哋叫咗二人份,明太魚湯應該都唔辣,有湯汁濕濕口送飯應該都ok,石鍋拌飯應該都唔辣可以叫,有三樣啱食,再叫一個辣嘅泡菜湯應該都唔過份吧?
開心開餐~yeah~我哋團聚啦~
每個餐都附四色小菜,其實只要有明太子,我嗰兩隻已經可以送晒成碗白飯了﹗右上嘅魚乾同右下嘅蔬菜都好味丫,左上嘅辣白菜就正常啦~
呢餐最受歡迎菜式,非Bulgogi莫屬,肉質夠嫰,湯汁濃厚,好送飯,大人小朋友都鍾意~而且份量夠晒多,正﹗
泡菜湯根本就係我喺香港都會食嘅菜式,當然好味啦,其實唔駛熱住都ok,又熱又辣唔係好搞得掂~
個石鍋拌飯原來唔係一般嘅拌飯,諗番起個餐牌,係喎,人哋寫係白色野菜拌飯喎,印象最深刻係入面有雪耳,估唔到雪耳拌飯咁好食﹗另外個湯味道似廣東人嘅菜乾湯,所以飲幾多碗都得~
明太魚湯其實我都鍾意架,喺香港都有買啲包裝叮嚟飲嗰啲明太魚湯,不過小朋友麻麻地,佢哋好似唔鍾意啲魚似柴魚嘅質感~
呢一餐食得好滿意呀﹗樣樣都幾好味~
仲有自助水果bar添,不過就只有提子同埋罐頭桃~都好丫﹗
家姐佢哋搭KTX嚟時我同佢同whatsapp傾咗之後嗰日學滑雪嘅事,佢都同意搵嗰家私人教練,我哋冇韓國電話,想聯絡對方有諗過打酒店房固網電話,又諗過試試用Skype嚟打電話,結果都係試咗send Kaokao talk message先,有回覆呀,太好了﹗﹗結果就用Kaokao talk嚟問晒啲詳情,仲約好埋pick up時間地點~咁第二朝只要準時預備個人去到就ok了~
約咗滑雪教練嗰邊8:30等,所以我哋一定要早餐7:30一開始就去食了,今晚一定要早啲瞓啦~
平昌鳯凰度假村網站:
https://phoenixhnr.co.kr/page/main
前往其他韓國旅遊blog