27-12-2022：首爾江原道冬日滑雪行day 6(part 1)．平昌鳳凰度假村走透透、發現完美雪

最初plan呢個trip時，只打算住兩晚滑雪場，諗住，我哋又唔係咩滑雪愛好者，唔駛留咁耐啦，大把人首爾出發day trip咁去一嚐滑雪滋味~後來睇咗一個blog，講一家四口留咗喺滑雪場度假村四五日，正正就係我哋去呢個鳳凰度假村喎~原來可以滑完又滑，而且仲好多其他嘢玩，為免行程太趕，我最後決定住三晚，叫做有兩個full day可以玩~嚟到先發覺，完全冇滑雪經驗(近乎零，廿年前跟團去哈爾濱時叫做滑過，但冇人教，旅行團幫你安排好晒租用具嗰啲，然後柴娃娃自己玩下咁，玩咗一陣就入番室內飲咖啡~)，要帶住幾個小朋友去滑雪真係唔係簡單嘅事，結論都係—-我哋要跟教練上堂，我哋連工具都唔識搞嘛~

睇滑雪場個網頁，早上上堂時間開始得好早，連喺度早餐都未食過嘅情況下，應該冇可能一早報course再即刻上堂咁高效率，所以計劃都係上晝去了解下狀況就算~點都好，先食早餐吧﹗講到住酒店，小朋友就好期待食酒店嘅自助早餐，但之前住嘅兩間酒店我都冇訂早餐，今次終於有喇，我都好期待呀~

早餐喺酒店楝嗰邊食，人好多，要排隊入座，好在等得唔算太耐~

食物好多選擇，西式、韓式都有~雖然個心覺得應該趁機會食下韓式早餐(白飯、海帶湯、小菜之類)，但吸引我眼球嘅，偏偏就係平時成日有得食嘅西式早餐，沙律、即烘麵包、雞蛋嗰啲~留三晚嘛，今日唔食，下次仲有機會嘅~

曉曉夠大個，可以自己出去拎嘢食lu~叻女~

食完早餐，我哋過去滑雪場嗰邊~

即係地圖5號位置，啲韓文本來就係英文嘅Ski House，所以我哋之間溝通時我一直叫佢做「滑雪小屋」~

滑雪小屋入面非常熱鬧，好多一早去滑雪嘅人來來往往，個個著晒成副裝備，大家都好期待去滑雪咁嘅樣，周圍都好有活力~戶外就有少少玩雪嘅位置，我交帶三父女喺外面玩住先，我就入去室內問下資料~

後面就係滑雪場啦~時間仲係早，未係好多人入場~

有個小小雪滑梯，佢哋係度玩咗一陣，如果有個小雪橇一定更好玩~度假村有個Snow Village好似係專俾小小朋友玩雪橇，不過我哋冇入去玩呀，反而有諗過喺商店買個25000 won嘅雪橇自己玩，不過最後都係得個講字~

只係坐咗假雪橇~

望番過去酒店楝嗰邊~

我入番室內搵到有個滑雪板course嘅counter，佢指我哋for外國人嘅雙板滑雪course要去另一邊…

呢度冇人招呼，寫住Members Only又唔敢入去(其實行咗入去幾步，見冇人就走番出嚟…)，記起藍楝有條旋轉樓梯有指住滑雪學校等候室，我就過去嗰邊問問~職員話外國人course已經爆滿至十二月底，不過佢俾咗我私人教練嘅contact~我冇本地電話可以打，佢就用自己手機幫我call埋，我問咗少少基本資料，因為會同埋家姐佢哋一齊玩，而個價錢唔係我可以自己一個人即時決定嘅，就暫時收咗線先~

出番去搵三父女~

掛住媽媽嘅三個人等咗我好耐啦，好想一齊玩一陣，我哋行下行下，見到有啲小朋友喺滑雪場外跟教練學緊啲基本動作，莫非爆滿嘅就係呢啲班？我哋扮係路過咁樣邊行邊睇，就係咁，條路帶咗我哋去咗充滿「完美雪」嘅秘境~

我講嘅「完美雪」就係未有人踩過嘅粉雪，平時睇東野圭吾啲書，講啲真正鍾意滑雪嘅人，最希望就係搵到未經壓雪嘅粉雪，咁就滑得最痛快，完全唔識滑雪嘅我，睇書時只能靠想像，但今次發現「完美雪」，原來真係好好踩﹗著住雪靴踩落去鬆軟嘅雪中間感覺好暢快，而且原本好平嘅雪地留低自己嘅第一對腳印亦好有成功感~點解嗰一小片地方可以冇人踩過？因為正正係綠楝後面、villa旁邊少人經過嘅地方，唔係禁止區域嚟架，仲有長櫈喺度，不過近長櫈位置有少少煙味，睇嚟呢個位置只係有人靜靜地食完煙就即刻走嘅地方~

我哋喺度玩咗好耐，跑跑跳跳、打雪戰、拋雪上天空，啲童真出晒嚟~原來喺雪地度玩都好花體力，跑跑跑要提高腳，跑到個人都熱晒~見差唔多到中午，就同小朋友講要返入去，順便睇下食咩午餐~返到入室內，曉曉就係咁叫隻腳痛，我哋都係第一次有咁嘅經驗，原來玩嘅時候啲雪走咗入靴入面，本來都冇嘢，但入到室內暖番，啲雪融咗就會變成冰水，整濕對襪，凍到叫救命~我哋喺室內坐低，俾佢即刻除咗對鞋同襪，用暖包暖番隻腳先慢慢好啲~咁我哋返房啦~

爸爸食早餐時有少少不在狀態，到喺外面返入嚟就感覺更明顯，原來輪到佢有啲病病豬…安頓三父女返房，幫小朋友換走啲俾雪整濕咗嘅褲，爸爸就瞓下休息下，我哋三個就再出去便利店買午餐~