離開江陵站，我哋直接搭的士去今晚嘅住宿—-Dabiang Spa，發覺韓國都好多司機要用GPS搵路，可能韓國地方大，司機冇可能識晒所有地方吧﹗所以去啲唔係有名地標嘅目的地時，都係搵定完整嘅韓文地址穩陣啲~司機跟住GPS行，我一邊睇住自己手機嘅地圖，見到鏡浦湖出現喺我哋右手邊，就知道差唔多到，最後反而我比司機更快搵到旅館嘅招牌~

2018平昌奧運有部份賽事都喺江陵舉行，所以而家依然喺江陵周邊見到呢兩隻吉祥物﹗

Dabiang Spa係一間小旅館，只有三層樓總共七間房，係Agoda訂房時已經直接揀埋book邊一間房，我就係俾佢嘅閣樓設計同埋大大個按摩浴缸吸引咗先book呢間旅館~小朋友聽見有「兩層」，有得「上落樓梯」同埋有「大浴缸」就好期待了~

落咗的士，見旅館冇reception counter都有啲納悶，跟住唔知係邊度有個男人走咗過嚟幫我哋拎行李，仲好主動咁幫我哋撳lift，我忍唔住問：「사장님이세요?」(請問你係咪老闆呀？)佢嘅表情好似係「仲駛講嘅？﹗」咁答我~佢直接帶我哋上去我哋間房，打開手機睇一睇，好困難咁讀我個名(港式英文拼音)，咁就check in完成了，完全冇睇過證件或者訂房e-mail之類，然後示意廚房枱面張房咭俾我哋見到，佢就走了~呀，仲有重要溫馨提示，記得浸浴浸一次好啦，一晚唔好浸兩次呀，第二朝臨走之前再浸多一次都得嘅~(打blog呢一刻我問day，個老闆同我哋講嘢究竟係講韓文定英文，我完全冇印象，感覺佢唔係講英文，可能係韓文+少少body language吧？)

講起呢件事，上次2019年去韓國時，係我學咗韓文之後嘅第一次韓國旅行，所以開聲講韓文好怕醜(請參閱家姐個blog：九個人‧去旅行  首爾加平之旅 – DAY 1 – 冷麵名店平來屋‧韓文能力大爆發)，但我自疫情之後，開始咗一、兩年係網上平台Amazing Talker同韓國老師練習韓語會話，每星期一堂，其實係不停傾計，然後老師再指導我一下啲expression或者地道講法，教我一啲唔識嘅vocab之類，所以開口講韓文好有信心亦好自然~今次事隔三年半，day 1嚟到就已經好自在咁開聲講，唔需要太多心理準備或者係心入面諗定台詞之類，不過我發現，英文好嘅韓國人(多數係大間酒店嘅職員)，一見我係外國人，佢就會自動轉channel同我講英文，但英文唔好嘅韓國人(例如鋪頭嘅職員、的士司機)，聽到我講韓文就會非常開心，好似他鄉遇故知咁，吱吱喳喳不停講~下一個問題喇，究竟啲韓國人係由邊一刻發現我係韓國人呢？係發音唔準丫？講嘢唔夠流暢丫？口音奇怪丫？定係個口罩呢？話說之前同老師談論過口罩嘅問題，佢話韓國人多數戴淨色、素色KF94口罩，基本上冇人戴圖案口罩，係咪我啲聖誕主題口罩/柴犬口罩出賣咗我呢？下次上堂時要問下老師先~

好啦，講番Dabiang Spa，小朋友當然好興奮啦，有樓梯丫嘛~即刻話要上去睇下﹗其實個格局都有啲奇怪，入門口左邊係洗手間、淋浴間，行前少少係開放式廚房，左邊有上樓上嘅樓梯，前面有小梳化、電視，而小梳化後面就係大浴缸~

明白放係呢度嘅原因，咁就可以一邊浸浴一邊睇風景，又可以一邊睇電視~但，淋完浴先過去浸浴咪會滴到間屋濕囉？

另外就係閣樓係睡房，半夜去廁所就要落樓下了，我等同有x3機會要落樓下(自己、曉、詩急的話我都要落去^^”)~另外，閣樓嘅天花板係斜嘅，兩張雙人床嘅位置一邊樓底高，一邊樓底矮，原本爸爸話我哋三個瞓矮嗰邊，因為我哋矮丫嘛，點知準備瞓時有人倒瀉水，咁當然係三個人瞓乾嗰邊，一個人瞓濕嗰邊啦，佔少啲空間都得嘛~

稍稍休息一陣，又興奮一陣，我哋就出去啦，可哋決定喺鏡浦湖邊慢慢散步去鏡浦海邊，望望海，跟住去食蟹﹗

身後就係我哋住嘅Dabiang Spa啦~江陵比首爾暖好多，可以唔駛著咁多衫，起碼可以唔駛戴帽都夠暖~

行出路口有舊大石頭，爸爸話係景點要影相喎，哈哈，睇嚟係個路牌喎~

江陵好寧靜舒服，人唔多，黃昏湖邊散步好寫意~

我哋去旅行嘅時候，韓國喺戶外可以唔戴口罩都得，但大家見我哋都成日戴住口罩，係因為太凍了，呼吸入去嘅空氣又凍，個鼻尖又凍，結果除咗罩，呼吸自由空氣一陣之後，都係揀番呼吸暖少少嘅空氣~所以唔戴口罩影嘅相反而唔多﹗今次係江陵可以除口罩耐多一陣都得，一來周圍人少，二來冇咁凍嘛~

嗰間酒店應該可以望到無敵大海景了~

我哋酒店到鏡浦海邊一段路有好多租單車店，睇嚟天氣冇咁凍時，大家都鍾意租單車遊湖吧？而家呢啲天氣，即使家庭車附有透明膠罩，大家都唔願踩吧~呢度除咗有香港都見到嘅四人家庭單車之外，仲有款六人家庭單車，多啲人都可以一齊玩﹗

去到鏡浦海邊啦﹗下一篇再帶大家睇海同埋食蟹﹗

Dabiang Spa網站：

http://dabiang.co.kr/

前往其他韓國旅遊blog

Comments

comments