十幾年前仲未結婚嗰陣，有一次同我爸爸媽媽家姐又係聖誕假期時去韓國旅行，嗰次去咗明洞聖堂參與平安夜彌撒～今次見帶住小朋友，本來都唔打算參加平安夜彌撒，因為佢哋一到夜晚就會跌watt，平時主日返教會返聖堂，叫佢哋安靜一兩個鐘都唔容易，去到外地仲要係夜晚又要聽唔明，更加困難～適逢今年聖誕節係主日，本身打算25號朝早去惠化洞聖堂參加主日彌撒，但係呢幾日都咁攰，9點前去到真係有啲難度，11點彌撒又晏得滯，會趕唔切下晝嘅KTX列車班次～最後？又變成無敵春風模式，即係冇行程，執行李check out就去火車站啦～

先一晚喺美食廣場出面嘅麵包店，買咗麵包，又喺便利店買定飲品，所以食早餐連酒店房都唔使離開一步～奇怪地小朋友居然要冇餡嘅原味麵包棒，我同day就share咗一條粟米cream味一條花生cream味，兩款都幾好食～

雖然香港而家都有得賣，但去到韓國梗係要飲下特產香蕉牛奶﹗

執行李係我嘅專長，又係我嘅興趣，爸爸睇住兩隻，我又開始化零為整~聽唔明嘅韓國電視都幾好睇，唔一定要睇卡通片，冇中文字幕嘅Running Man、電視購物、甚至廣告都幾好睇~同埋今次見旅行長，帶埋部Switch過去，上次爸爸入竹篙灣，我要屋企一打二時專登買咗「星之卡比」，大家都未打爆機，小朋友望住爸爸打已經夠有趣了~

搞掂行李就check out啦，早少少去到首爾站，(理想地)寄行李喺locker，行下樂天outlet，食下嘢，跟住先坐KTX去江陵~

首爾站

人算不如天算，或者係我哋太天真，首爾站嘅locker全部full晒﹗﹗我哋拎住兩隻大喼+一個旅行袋，再拖住兩個細路，唔放低啲行李根本寸步難移~有考慮過搭早少少嘅KTX班次，但自助售票機只接受本地信用卡，用電話又買唔到，個browser support唔到korail個網頁(之前都係用電腦買)，如果排售票處又超長龍…咁，搵個位坐低慢慢食嘢hea下啦~

站入面嘅食肆全部都好full，而且要拖埋行李入去食都唔方便，結果上多兩層去樂天outlet嗰邊，好好多~

發現咗呢間坐得舒服啲嘅中式餐廳，可以放埋啲行李喺餐廳入面慢慢坐~「中式」係指韓國人心目中嘅中式，炸醬麵、海鮮麵、糖醋肉就係佢哋心目中嘅中式，對於我哋嚟講都唔太sure呢啲係中國邊度最出名嘅菜式~呢間餐廳(敗筆，冇我家姐史官係度，啲紀錄真係唔齊全，我居然唔知間餐廳叫咩名，我可以帶你去架~)係比較高級嘅中式餐廳，所以有得食啲「course料理」，呢個term應該係韓文，中文應該叫套餐，即係細細碟好多道菜一道一道上咁，算係中菜西吃吧﹗不過我哋一來唔太肚餓，二來又唔係咩特別日子要慶祝唔好食咁貴，都係輕輕鬆鬆叫幾個飯麵算啦~

韓式餐廳平時有大白菜泡菜、蘿蔔泡菜之類，今次中式餐廳嘅小菜，居然係炸菜，炸菜肉絲米嗰啲炸菜，我哋平時好少就咁空口食呢~另外一種少少辣嘅脆脆菜，我都唔知叫咩名~

韓式中菜當然要叫炸醬麵同海鮮麵啦，要揀多一樣唔辣嘅，就揚州炒飯啦﹗果然韓國廚師煮韓式中菜比較好味，炸醬麵同海鮮麵都唔錯，海鮮麵個湯又辣又要不停飲，但揚州炒飯係真中國菜，韓國廚師就煮得冇咁好食了，差少少味~

相機先食﹗我哋懷疑，為咗收客人貴啲，所以炸醬麵上面先加咗海參，但，感覺有少少唔太搭呢…

湯頭好味嘅海鮮麵

記起我哋其中一個行李箱係day 1時整爛咗個手柄，有諗過要唔要趁呢個時候去樂天outlet揀下，買到就換個新喼繼續旅程，最後都係唔夠時間，好在，最後隻爛喼都陪到我哋順利返到香港~

好啦，上火車啦~

首爾去江陵搭KTX要差不多兩個鐘車程，車上當然係瞓覺，補充體力啦，特別係小朋友呀~我抱一個攬一個都預咗瞓唔到，篤下電話、upload下相發下post、打下機時間好快過，望住窗外嘅景色，見到由城市，慢慢變成近郊，後來越來越多雪，就知道越來越進入內陸嘅地區，然後再越來越少雪，就知道就嚟到東邊海岸嘅江陵啦~

見到對於我哋南方人嚟講難得一見嘅雪景，就忍唔住影影影影影啦~

到啦﹗哇，江陵比起首爾暖和好多呀~好啦，我哋去入住我好期待嘅spa pension啦﹗

前往其他韓國旅遊blog

Comments

comments