睇完Cinderella音樂劇，又食完嗰個三層brunch，小朋友都好攰啦，最好搭車瞓一陣~我哋打算夜晚去睇下聖誕燈飾，其實我都有少少貪心，又想睇商場燈飾，又想去睇光化門廣場嘅燈會，其實大家根本冇咁多體力～點都好，我哋先去第一站，汝矣島新開嘅大shopping Mall 더현대 서울～之前有睇過啲報道，話商場入面嘅聖誕小鎮好有氣氛，所以決定去湊下熱鬧～我一直喺度諗，究竟「더현대」個「더」係咩意思，「더」用於比較句是有「更」嘅意思，「현대」係「現代」嘅意思，咁成個商場名係咪更現代更前更先進咁解呢？睇一睇個英文，原來只係「The」⋯oh~

由大學路過去The Hyundai Seoul地鐵只係轉一次車，然後再搭接近半個鐘，所以都有啲時間比小朋友喺車上面瞓一陣～

好快瞓咗…

曉如果瞓着咗，到嘅時候我哋點都會叫佢起身自己行路，詩詩都仲係細，抱到咪俾佢瞓多一陣囉～佢都係重㗎啦，不過之前嗰排又去做gym有舉鐵，我自問好力咗，抱佢都抱得耐咗，但係今個trip要鋪真係好難抱，唔係唔夠力，而係我又着得多衫，佢又着得多衫，大家都好臃腫，抱住佢唔係好睇到路，最怕係要搭扶手電梯睇唔準幾時踩過去～我都係投降，俾返爸爸抱啦～

出咗地鐵站，原來要經過一段漢江邊嘅住宅區先到The Hyundai Seoul～

個商場果然又大又靚，不過真係好多人，而且啲暖氣又勁得滯，即使之後除咗啲外套，都仲係覺得有啲焗～

不如直接去搵過聖誕小鎮啦~

曉，乜你個頭對個O對得咁正嘅？詩，你仲未瞓醒呀？

搭扶手電梯上咗好多層，男裝、女裝、童裝、休閒生活甚麼，一直都未見聖誕小鎮個影，香港啲商場聖誕佈置多數係中庭，或人流最多嘅樓層嘛，原來聖誕小鎮喺頂樓，一路轉上去，慢慢就出現聖誕佈置~

冇心機詩…

雖然話人好多，但係啲影相位，大家都好有秩序咁排隊，我哋都唔追求喺最靚嗰個位影，影到乜就乜啦～

唔知自拍咗啲乜…

見到啦﹗見到啦﹗係聖誕小鎮呀~

曉曉攝影師~

同最大嘅聖誕樹合照成功﹗

聖誕小鎮，有啲部份甚至要攞籌先入到去睇，又出現嗰個問題，我哋冇韓國手機號碼，又攞唔到籌喇，不過我哋個個都想盡快離開現場⋯

人人人人人~

冇咁多人呀，快啲行過去啦~

無論係香港定韓國，Lego專門店都係咁吸引~

睇唔睇得出呢？我哋後面係好高好高嘅水簾嚟架~

睇嚟喺個商場度都搵唔到食晚餐嘅地方，我哋都係影完相，盡快返返去酒店附近先食嘢啦～

傻爸與傻曉~

上次講嘅換錢機呀，第一次用時冇影到相，今次補番~

再次喺DDP個地鐵站到出嚟，嘩，同日頭完全唔同呀！DDP嘅外牆，變咗做投影嘅螢光幕，一邊播住聖誕歌一邊播住動畫，好有氣氛～

玫瑰花海熄晒燈，而我哋經過時，投影嗰邊嘅音樂啱啱結束，我叫兩個小朋友快啲去玫瑰花前面企定，應該就快會着燈…

真係呀，隔咗一陣，玫瑰花海就着返燈啦，我哋佔咗先機，可以趁未有人時影到個玫瑰花海~lucky～

冇力行過去個心心度啦，就呢度影啦~

雖然我興致勃勃咁樣影相，其實大家都有啲攰，係啦係啦，返酒店附近食飯丫嘛～

酒店附近，我哋話呢棵係「比卡超聖誕樹」，因為成棵樹都係閃電裝飾~

其實我哋酒店嘅同一棟building，就係現代百貨嘅outlet～結果去咗地庫嘅美食廣場，乾乾淨淨唔多人好多空位，可以舒舒服服咁食個晚餐～

我負責出去買嘢食，本來喺自助點餐機揀好晒食物，點知最後一個步驟又係因為嗰個原因失敗咗，又係要輸入韓國手機號碼，食物預備好就send message去手機叫你拎食物～我唯有去返counter度買，雖然我開聲係講韓文，但職員一見我係外國人，佢衝返過去自助點餐機度，睇吓我本身揀咗啲乜，咁就好快捷咁幫我落單～

炸豬扒好脆，好好味，仲超大塊，配菜又多～日式炸蝦烏冬就啱晒小朋友口味～咁我就可以叫個有辣醬嘅拌飯，食下韓式口味～食物樣樣都唔錯，係衰在美食廣場斟水嘅紙杯太細，飲兩啖就飲晒，下下帶返口罩出去斟又有啲麻煩～

最後都係去唔到光化門廣場嘅大型燈會，希望去完平昌返嚟嗰幾晚嘅首爾有機會可以去到睇啦～

前往其他韓國旅遊blog

Comments

comments