24-12-2022:首爾江原道冬日滑雪行day 3(part 1).Cinderella兒童音樂劇、Teen Teen三層靚靚brunch

本來day 3早上嘅行程,有諗過去酒店附近嘅城郭公園行下,一來嚟到幾日發現,互外行程唔可以連續咁長時間,二來第二日去Legoland實在太攰,呢一朝我哋都係諗住輕輕鬆鬆咁就算啦~

好好享受酒店嘅轉轉櫈,都係悠閒旅程嘅一部份~

仲有欣賞下窗外嘅景色~

買早餐之前,我哋先去酒店嘅自助洗衣房洗咗啲衫先,食完嘢應該差唔多可以乾衣~雖然嚟得兩日唔算好多衫,但下一次有機會再洗衫,要去到平昌嘅滑雪場度假村,今次都係洗少少先啦~

今次嘗試去行酒店嘅另一邊,見到有好多細舖頭仔,不過搵唔到一間有得入去坐低又有嘢食又有嘢飲嘅,見到街上面有間兩個大嬸即席整多士嘅檔口仔,好似幾好味咁~我就負責買嘢食,爸爸就去睇吓邊度買嘢飲~

爸爸要bagel,我哋三個都要三文治~

全部即叫即整,熱辣辣,yummy~

開頭day入咗去一間連鎖cafe,點知個店員一見到佢係外國人,就即刻唔想睬佢,部自助點餐機又唔知點解read唔到張credit card,結果我哋就改去另一間買咗熱飲返酒店配麵包嚟食~

果然即整嘅熱辣辣三文治,真係好好味,一比較起先一晚嘅餃子,真係兩個世界~

食飽飽又睇緊電視,三父女完全唔想郁,咁唯有我落去搞啲衫啦~兩部乾衣機都被occupy咗,有另一個酒店住客好勞嘈咁,話啲人洗咗衫搞掂唔理拎返,好期待我係嗰堆衫嘅主人,見佢亞洲面孔,講英文又有啲口音,見到我有突然間轉channel講普通話,我問佢係咪星加坡人,佢有啲驚訝我即刻估中,不過我唔係佢期待嘅人~睇嚟我都乾唔到衣,為咗避免影響之後嘅行程,我索性拎成大袋濕衫返去房,喺房度晾衫~

爸同曉正係度感受緊邊個位啲熱風吹得最勁~好在間房夠大,啲暖氣夠乾燥,第二朝全部都乾晒~後來我哋喺平昌洗多兩次衫,都索性直接唔乾衣,喺房度晾又方便又慳錢~

好啦,晾好衫差唔多要出門口喇~

行到出街見到有間街邊檔賣啲頸巾手襪,我即刻睇下有冇啱曉詩嘅手襪,話說今個trip每個小朋友總共買咗四對手套~四對?每人?冇錯﹗講起都覺得誇張~第一對係出發前係淘寶買嘅滑雪防水手套,雖然跟年紀買,但都唔太啱size,大得滯,兩個戴住覺得手指郁唔到就唔願戴~係呢個檔口買咗第二對,係一般嘅冷手襪,size啱啱好,戴得舒服又保暖~點解會出現第三對同第四對呢?咁要繼續追看我啲blog啦~

我哋住嘅Hotel Skypark Kingstown Dongdaemun位於東大門站同埋東大門設計廣場站之間,我哋去嘅目的地要搭4號線惠化站,所以正好欣賞埋設計外型充滿未來風格嘅DDP (Dongdaemun Design Plaza)~感覺有唔少韓劇都有出現過呢個地方,好多年前睇過韓國版嘅top model好似有係度行過show添~

DDP嘅著名景點包括呢片LED玫瑰花海,係夜晚必睇,我哋先睇日間嘅玫瑰花海,下一篇就可以睇埋夜晚著咗燈嘅另一個面貌~

今日嘅其中一個重點項目,係去睇Cinderella兒童音樂劇~韓國人最常用嘅search engine喺Naver,我用Naver你search下我哋去韓國期間,有冇咩表演可以睇~詩詩好鍾意Cinderella,平時婆婆會同佢哋幾個自己演劇,對個故事滾瓜爛熟,又係音樂劇,即使唔識聽韓文都唔大問題~最大問題係,我冇韓國手機號碼,竟然買唔到門券,拜託左韓文老師幫我買,但係又唔係QR code入場,又唔係現場用咩憑證嚟換飛,老師唯有send咗佢訂飛嘅截圖,甚至影低埋佢張身份證send俾我,以確保我哋入到場~後來先知原來好求其,講得出訂飛人個名就入到去~

位於大學路嘅名作劇場周邊環境,周邊都係好多演出場地,睇嚟係韓國,從事藝術工作嘅機會真係比香港會多好多~

開頭話演出場地係名作劇場,去到先至話改咗用另一個表演場地,大學路嗰度有好多大大小小嘅場地,好在我哋都搵到呢個位於地庫,有少少隱蔽嘅新場地~見未夠鐘開場,我哋喺附近行一陣街先~

劇場嘅正對面有一間精品店,好多好靚嘅文具精品,喺我哋慫恿之下,曉曉叫做揀咗手信俾佢嘅好朋友仔~

後來又行咗一間時裝店,啲衫都算幾靚又幾抵,不過我哋之後仲有好多地方要去,費事拎住一袋二袋好唔方便,所以就唔考慮買啦~最搞笑嘅係本身諗住走喇,點知間舖頭突然間播Elsa歌,點都聽埋先走啦~

劇場係地庫,好有獨立劇團feel~

終於入場睇Cinderella,細細的劇場坐滿咗好多個家庭,果然鍾意Cinderella嘅小朋友,多數都係同詩詩差唔多大嘅女孩子,曉就顯得大個咗啲~同香港一樣韓國嘅小女孩,即使天氣咁凍都要着公主裙外加羽絨嚟捧場~

入咗場首先要同老師「報平安」,等我send個message話番俾佢聽我哋成功入到場先~

套劇只有六個演員,後母同仙女,婆婆係同一個演員飾演,而Cinderella嘅兩隻老鼠朋友點解要帶住太陽眼鏡?因為佢哋後來就係王子同埋隨從~套劇個flow都幾好,有啲笑位,又夾住好多歌舞唔會有悶場,係音響差啲,後母最夠聲,最聽得清楚佢講乜嘢,但主角Cinderella就好細聲~可能套劇都上演左幾個月,逢星期六都演一次,啲衫睇落去有少少殘,不過都唔影響大家嘅興緻嘅~

演出期間唔影得相,小朋友最期待嘅,大概就係演出完畢之後,可以上台同演員們拍照留念,上台影相原來要另外買飛㗎,小本經營要賺多少少錢都冇辦法啦,可能曉真係大個,佢竟然唔肯同詩詩一齊上台影相~

原來仲有紀念品,每個小朋友走嘅時候,都有一個玻璃鞋鎖匙扣送返比佢哋,好開心呀!

睇完show即使唔太肚餓,都要食個細細地嘅午餐喇,因為唔想影響晚餐時間~附近有間好靚嘅餐廳,入到去發現好多客人都係情侶,係喎,今日係平安夜喎,好在兩個小朋友開始大個,總算控制到聲量,唔會影響人哋浪漫嘅氣氛~

我叫咗個三層brunch set,餐牌係韓文,雖然唔係完全明得晒內容,但我感覺到應該係似港女鍾意嘅三層下午茶類似嘅嘢,我哋唔想食咁飽,就試吓啦~個店員一再確認我係咪真係想叫呢個set,因為入面係似啲點心咁多個係正式嘅餐點,冇錯,我就係想叫啲立雜嘢食~

送到嚟係好靚喎~

食完好多日之後,曉曉仲對嗰個煙肉包提子同埋凍番茄念念不忘,佢都算幾成功~

不過個餐最唔好嘅,兩杯餐飲竟然只可以揀梳打,咁凍嘅天氣,冇得飲熱飲,係咪有啲不近人情呢?

所以我哋食完嘢飲完嘢,竟然係凍到騰騰震,而唔飲有氣飲品嘅曉曉就只可以飲水,慘慘~

好啦我哋去下一站嘅路上,希望小朋友喺車上瞌一陣啦~

前往其他韓國旅遊blog

Comments

comments

在《24-12-2022:首爾江原道冬日滑雪行day 3(part 1).Cinderella兒童音樂劇、Teen Teen三層靚靚brunch》中有 2 則留言

發表迴響

你的電子郵件位址並不會被公開。 必要欄位標記為 *