喺砌聖誕樹嗰度入面仲有間房仔，入面有啲機，可以模擬砌Lego，你可以幫你自己嘅製成品揀顏色，之後就可以送佢去出面個大畫面度～

一人一部機，唔駛爭﹗

曉曉設計佢嘅燈籠魚~

搵到自己嘅作品啦﹗

暖咗一輪，又可以出去戶外啦一陣喇~

呢度有一對樂器幾得意，踢一踢下面個腳掣，就會有嗰種樂器嘅聲音播放出嚟，如果有好多個人一齊踢，可能就好似樂隊演奏咁啦～

點解又有旋轉木馬嘅？因為啲小朋友又想坐多次囉～即使好凍都要坐⋯

聽講每個Legoland都會有好似小人國嘅迷你景區，而展出嘅就係當地嘅風景名勝～雖然叫做去過韓國好多次，其實都唔係好認得啲地方～

---

我認得呀，係南山塔呀~

呢個宮殿係咪景福宮？

見到啲積雪咁厚就知有幾凍⋯

發現咗有個小朋友嘅駕駛學校，曉度高就合格可以玩，我一睇把尺就知道詩應該唔夠高，慘囉，冇得玩⋯點知職員指一指門口外面，原來對面有間junior駕駛學校，太好啦，詩詩都有得玩～我就跟住曉，爸爸就跟住詩～

雖然話我跟住曉，不過因為呢邊係大個小朋友玩㗎嘛，所以家長其實唔准入去，我偷偷地喺外面睇佢咋，當時實在太少人，原本係要睇咗段video先至正式入去揸車，但呢一刻間駕駛學校得佢一個學生，一個人睇住段講韓文嘅video，唔知曉會唔會好想走番出嚟呢？連我都覺得段video真係好長⋯

當睇完段video入去揸車時，又有一個小朋友加入，都係香港遊客嚟嘅，點解佢可以唔使睇video嘅？後來聽佢爸爸講，先知佢已經揸咗車幾轉，大概職員都認得佢啦卦？

睇小朋友揸車，家長都要出番去戶外，對手套雖然話拇指同食指可以篤到電話，不過都係時靈時唔靈，想幫曉錄video，結果都係要除手套，我幫佢錄左十幾秒，隻手就已經凍到僵晒～真係好誇張！

睇返爸爸幫詩詩影嘅相同video，先知道原來大小朋友同細小朋友駕駛學校嘅分別，係路線設計嘅分別，細嘅小朋友只係兜圈揸，而大小朋友嗰邊就好似一個小城市咁，又得自己揀唔同嘅路線之餘，仲有紅綠燈，所以之前段video教佢哋紅燈停綠燈走，原來就係咁樣用㗎喇～

揸完車見4D影院差唔多開場，最驚玩遊樂設施嘅曉，居然又肯入去玩～

故事講一隻小獨角獸冒險嘅旅程，灑水當然唔少得，好在張凳唔識郁，對於小朋友嚟講都唔算太驚～

雖然Legoland未關門，但係越夜越凍，我哋都係決定差唔多要走啦，行返去出口都有一段路，爸爸抱住詩詩，我拖住曉行快啲啦，去到近出口嘅Cafe飲番杯熱嘢暖一暖先～

話說韓國人call的士用KaoKao Taxi，但我哋外國人冇本地號碼同信用卡係用唔到嘅，之前聽韓文老師講話佢有學生喺韓國用Uber都call到的士，我哋都諗住試吓，但係其實一直都冇成功過⋯最後我哋都係坐返樂園shuttle出去春川站～之前話旋轉木馬係最凍嘅地方，我自己就覺得，等架shuttle嚟嗰陣，先至係全日最凍嘅時候～

出到去春川站，都要等一輪火車先到，期間我哋去便利店買多兩個新嘅暖包，又食下零食打發時間～

攰~話說韓國嘅小朋友要6歲先係法定年齡要買車票，詩詩未夠秤可以唔駛買，我哋都有諗過究竟長途車要唔要買個位俾佢坐，但另一方面佢瞓覺又要黐住我，其實都好難決擇~

返到首爾已經太攰，所以決定喺返清涼里火車站個商場搵嘢食，超級市場入面有兩間食店，是但啦，有餃子應該ok啩？

為咗避免啲嘢小朋友唔啱食，我盡量叫多啲唔同款式嘅嘢，有綜合餃子（即係乜嘢款嘅餃子都有）、兒童餃子、餃子年糕湯、同埋一碗刀削麵～

綜合餃子

兒童餃子 – 叫得做兒童餃子，應該係適合兒童食嘅意思啩？點止只係隻餃子嘅size細啲而已～除咗紅色餡料嗰隻餃子特別辣之外，其實其他全部餃子啲餡都係完全一樣味道嘅，大嘅細嘅圓嘅長嘅都係嗰款餡包出嚟嘅，包括兒童餃子～

餃子年糕湯

刀削麵

最弊嘅係嗰款餡有啲胡椒味，唔算好辣，不過兩個小朋友都唔係好想食，最後佢哋兩個淨係食刀削麵同埋年糕湯入面啲年糕，啲大餃細餃圓餃長餃就我同爸爸負責囉～

食嘢期間帶詩詩去廁所時，經過超級市場賣水果嘅部門，嘩，啲士多啤梨真係好靚呀～所以我哋決定，食完嘢之後幾攰都要買盒士多啤梨返酒店食！

果然冇辜負我哋嘅期待，真係又大又甜，呢個價錢喺香港一定買唔到，我仲決定要帶盒士多啤梨返香港俾我爸媽做手信添！

玩到咁攰又咁夜，睇嚟之後嗰日又要繼續春風模式啦～

前往其他韓國旅遊blog

Comments

comments