我哋入Legoland玩繼續100%春風模式，既冇睇住地圖去玩，亦完全唔知道入面有咩必玩景點，總之就係按自己心意四處探索~由酒店兜番過去正門入口其實已經凍僵咗，所以即刻衝入去紀念品店暖一暖先~我哋唔好花太多時間睇啲盒裝Lego呀，屯門市廣場都好多啦，雖然有啲可能真係Legoland限定啫，但都要爭取時間，暖咗就要出去睇下有咩得意嘢啦~

出咗去一陣，高興咗一陣，好快又覺得好凍，所以又衝咗入去另一楝建築物，似乎係有嘢玩，門口仲寫住唔駛排隊，唔知係乜都入咗去先算~行行下知道係坐住架車睇嘢嗰類遊樂設施，弊﹗曉最怕呢啲…好在最後佢都肯坐，但真係要半合住眼嚟坐~故事場景入面，我哋係盒裝Lego嘅組件，係工廠入面被製造出嚟~

排隊路上(其實唔駛排隊)有好多好勁嘅Lego成品，件件都好值得影~呢個時候我哋都未知入去做乜~

入到去坐咗落架車度睇呢啲…曉就開始驚驚了~

出嚟要砌下Lego定定驚~

係Lego Friends呀﹗屋企嘅Lego之中都有Friends系列，所以小朋友們見到都好興奮~

下一樣吸引佢哋嘅？

旋轉木馬﹗旋轉木馬﹗

「點解個旋轉木馬好似冇開咁嘅？有冇得玩架？」今次去Legoland天氣實在太凍，有唔少設施都唔開放，所以入園遊客真係少得可憐，俾著我係韓國人都等設施開放晒嘅日子先嚟玩啦，因為疫情，連外國遊客都唔多~好處係度度都唔駛排隊，壞處係有啲冷清囉~個旋轉木馬本身靜英英，我哋一埋到去，職員就走出嚟招呼我哋，音樂一開，即刻歡樂番晒~

Legoland嘅印象，一樣係人少，另一樣就真係超凍，去韓國十日，最凍就係春川Legoland呢日，而Legoland之中，其中一個最凍嘅位就係旋轉木馬啦﹗(仲有陣間會講嘅駕車遊戲﹗都好凍﹗)

玩完旋轉木馬要食午餐啦，遠遠見到餐廳行入去，原來係食自助餐，開頭都覺得太heavy有少少卻步，但又費事再去搵第二間了，何況小朋友們都興緻勃勃呢~

我哋食嘢時都算晏，所以人好少(或者成個樂園都得好少人)，所以超多位，感覺好free~原來都可以食得瘦少少嘅，除咗pizza、pasta之外，仲有沙律、韓式食物等等，即使同埋老人家嚟食都有啱食嘅嘢~最遺憾係只得凍嘢飲，汽水、果汁任飲，但熱飲就只有湯，所以我哋不停飲魚糕湯﹗

詩詩好似真係飲咗好多碗﹗每次見到呢啲咁可愛嘅魚蛋，都會提起細個時嘅曉~有次去家姐屋企打邊爐，當時只有曉曉出咗世，家姐為咗佢專登買咗啲好可愛嘅魚蛋，點知佢覺得太可愛唔肯食>_<~

開心~除咗有各式pizza之外，居然仲有甜品pizza﹗原來係餅乾底，然後上面嘅餡係棉花糖，都好好味喎~

食飽飽，個身暖晒，當然可以嚟一陣戶外活動啦~有個有頂嘅半戶外兒童遊樂場，人少啲，玩得自在啲~

我自己嘅童年回憶﹗而家得番好少地方有得玩啦，快啲推曉上去爬下，機會難得~

之後發現咗一個有趣嘅地方﹗可能係今次去Legoland我自己最鍾意嘅一部份，係每日一次嘅砌聖誕樹比賽呀﹗

只准用大會提供嘅Lego組件，每日下午四點前要交出作品，係眾人前展示出嚟，下午五點會宣佈結果~我哋都係砌Lego愛好者，當然都試下參賽啦~我要砌得靚啲、高啲、大啲、特別啲﹗﹗

曉作品：樹樹

詩作品：小小的聖誕樹

Rita作品：溫暖的家中的聖誕樹

總算係四點前成功交到完成品出嚟展示，但睇埋人哋啲作品之後，我哋發現五點鐘唔需要專登過嚟聽結果了~呢個世界真係好多高手，仲要天外有天、人外有人~

其中一個高手作品，仲有好幾個作品都好勁﹗

砌完Lego就去玩下其他嘢啦~

前往其他韓國旅遊blog

Comments

comments