23-12-2022:首爾江原道冬日滑雪行day 2(part 1).春風模式啟動出發春川Legoland

當我哋決定咗第二日會去春川嘅Legoland時,嗰陣有同大家商量過,究竟我哋要搭九點幾丫定係十點幾嗰班ITX去春川,諗住早啲去玩,可以早啲返,夜晚仲可以去睇下聖誕燈飾~本來打算搭早啲嗰班車,但而家得返我哋四個,先一晚仲要咁夜瞓,我哋當機立斷退咗原來嘅火車飛先,第二朝再決定搭幾多點嘅車去~

瞓醒覺,比起出發去Legoland,更緊要係搵嘢食同埋換錢,憑住喺屋企搵到以前去旅行用剩嘅won可以捱到一陣,我哋都有信心夠錢食早餐先至去換錢嘅~

酒店窗外嘅風景

每次離開暖氣,第一個感覺係「都ok丫,唔係好凍啫」,每次咁樣comment完之後,行多十步左右,就會大叫「好凍呀﹗」~我哋話「首爾、首爾」,唔係因為韓文係서울,而係因為「手」同「耳」都超凍呀﹗因為第一日由機場返酒店時有咗經驗,今日出門全副武裝,一定要包括頂帽,帽真係好有效,遮住對耳仔即刻好好多,手套我都仲有啲幫助,小朋友啲手套硬係唔fit,暖包對佢哋嚟講就係must have item喇﹗

爸爸戴咗帽,幾乎唔認得,遠遠要係人群之中搵佢出嚟要比平時花多咗時間~

我同小朋友們都得番對眼

酒店行出去對面就有間小食店有嘢食啦﹗最近一年都有喺Amazing Talker keep住每星期一次同韓文老師上網課練習會話,所以今次去旅行時,開聲講韓文都有信心好多,今次點餐可以完全用韓文,好自然呀~

終於可以暫時解除少少防寒裝備~

第一餐有乖乖影食物

叫咗兩份紫菜包飯、一份湯烏冬,四個人share,仲可以自己任斟湯同埋任添泡菜添~豎起隻耳仔聽,附近都好多客人係遊客,有啲係廣東話,有啲係普通話~

食飽咗我哋就search吓附近邊度有找換店,附近間找換店未開門,咁就決定直接過咗清涼里先,大車站應該換到錢嘅~點知好好彩,喺東大門地鐵站就見到有部找換機,仲方便過找換店,因為唔需要同人類接觸,入錢落去、scan passport就搞掂,rate仲同找換店差不多添~

唔好彩嘅係,啱啱遇着鐵路有故障,我哋上咗車好耐都唔開車,去Legoland嘅進度又慢咗~我哋話今次旅行係「春風模式」,咩叫做「春風模式」?最近我哋打機玩「星之卡比」,高難度版本叫做「狂野模式」,俾小朋友玩嘅容易版本叫做「春風模式」,咁悠閒咁去旅行,仲唔係「春風模式」?

去到清涼里ITX站,買好車飛,未夠鐘出發,但又開始坐到有啲凍…

見到有幾款熱飲幾,嘩,竟然有300 won一杯熱朱古力,雖然真係細細杯得兩三啖,但係純粹係想取暖就夠晒啦,又唔使攝取多餘嘅卡路里,正呀!不過四個人真係要買四杯先夠~註:咖啡要500 won,貴少少~

見仲有少少時間,我哋行過去商場,有個細細地嘅美食廣場,食多兩個美味嘅窩夫就更加滿足喇~

上咗ITX,最好就係小朋友瞓一瞓覺,稍稍叉一叉電先入Legoland玩啦~

落車嘅時間啱啱冇Legoland shuttle,我哋直接搭的士過去都好快到,未入去Legoland,只係去到Legoland Resort個lobby就夠晒開心啦~有Lego任砌之餘,仲有好多好靚嘅佈置,同埋成塊牆咁大嘅Lego人仔大晒冷﹗

好啦,要入場啦,唔好咁晏啦~

哇,但不得不被雪吸引,首爾冇春川咁多積雪,我哋真係今日先可以咁盡情咁踩雪呀﹗

略略玩咗一陣雪,終於入咗Legoland啦﹗Legoland係2022年韓國新景點,加上世界各地其他嘅Legoland我哋都未去過,今次嚟到韓國梗係要試玩下啦~

Merry Bricksmas!!!

前往其他韓國旅遊blog

Comments

comments

在《23-12-2022:首爾江原道冬日滑雪行day 2(part 1).春風模式啟動出發春川Legoland》中有 2 則留言

    • 我哋買嘅係冇劃位嘅飛,好彩搵到位坐咋~都係提早買定好,可以確保有位坐,始終路程長~

wuchihung 發表迴響 取消回覆

你的電子郵件位址並不會被公開。 必要欄位標記為 *