22-12-2022:首爾江原道冬日滑雪行day 1.韓國我嚟啦

因為係下晝機,去到都夜晚,都冇乜特別行程了~上晝執埋最後嘅行李,出去採購最後嘅旅行用品,係屋企食埋個lunch就出門口啦~

我唔sure經屯赤去係咪真係快過經汀九同埋青嶼幹線去機場,但的士價錢就真係平一截﹗

搭的士開心出發

只係去到機場已經好開心lu~

上一次飛時詩詩仲未夠兩歲(請參閱:27-12-2019:熱鬧非凡福建探親觀光團day 1(part 1).鬧哄哄與食飽飽的開始),仲未有自己位坐,今次已經差不多五歲,對事物都有一定理解,又識得問,變成好似第一次搭飛機咁(你其實搭過好多次飛機啦,連韓國都第二次去了~)﹗

指定動作﹗

開心~

事先幫兩個小朋友訂咗兒童餐,我有考慮要唔要幫自己訂低卡餐,之前幾個月一直積極減肥丫嘛,考慮咗一陣都係放棄咗,去旅行唔好咁辛苦啦,後尾發現其實普通餐都夠低卡,per 食物volume嚟講應該唔算低卡,但份量實在太少,結果都係好易餓﹗兒童餐送到,小朋友居然覺得大人嘅普通餐更吸引,oh no,不過兒童餐就一樣絕對嘅優勢,就係以我兩個女食嘢咁慢嚟講,特別餐早啲送到,變相有多好多時間食,空姐冇咁快收番啲餐盤囉~

邊歎飛機餐邊歎電視~

果然七歲半同差不多五歲真係唔需要帶咁多機上娛樂俾佢哋,自己識得揀電視睇,係詩詩需要少少協助,曉基本上唔駛理佢都ok,我可以自己睇Running Man,yeah~兩個就乖乖,肯睇完電視,食完飛機餐就瞓覺,good﹗

小朋友出世咁耐去咁多次旅行,今次嘅飛行旅程算係最輕鬆嘅一次~睇嚟下次去遠啲都得啦﹗

到韓國啦﹗

落機過關、拎行李除咗排隊耐咗少少之外,總算順利~最唔順利嘅係,本身係香港經Klook買定KT嘅上網sim卡,點知兩張sim卡放入電話度都唔work,連職員都搞唔掂,佢哋叫我哋第二朝都唔得就打外國人專線喎~所以離開機場時比預定時間晏咗好多~

其實返酒店路線我都十五十六咗好耐,雖然酒店離機場巴士站、地鐵站都唔算遠,但又夜媽媽,天氣又凍,大家又攰,又拎住咁多行李,即使只係7-8分鐘路程都好辛苦~

我哋一離開室內,就即刻感受到寒意,仲要係雙手極速凍僵嘅程度,冇好快搵到機場巴士站,直接搭的士返首爾加上夜間extra收費貴到接受唔到嘅情況下,我哋決定搭鐵路到首爾站再轉的士返酒店~

等地鐵中

呢個時間已經冇晒Arex快車,剩低逐站停嘅慢車,要坐一個鐘,好在有位~令小朋友不停抱怨嘅唔係眼瞓,唔係攰,而係好肚餓呀﹗﹗我哋返到酒店一定要即刻搵間便利店買嘢食~

首爾站出去時有啲樓梯位冇電梯又冇扶手梯,但居然有俾行李搭嘅輸送帶喎~不過係呢條輸送帶上面,我哋用咗差不多十二年嘅喼個手柄陣亡了~

好不容易終於抵達東大門嘅Hotel Skypark Kingstown Dongdaemun(東大門金斯敦空中花園酒店),check in lobby嗰層就有間便利店啦,我負責check in,爸爸你帶住佢哋去買嘢食﹗上到房,食過杯麵、紫菜包飯、三角飯糰、香蕉牛奶,飽餐一頓,終於可以沖涼瞓覺休息lu~

前往其他韓國旅遊blog

Comments

comments

在《22-12-2022:首爾江原道冬日滑雪行day 1.韓國我嚟啦》中有 2 則留言

  1. 像我們退休人士,搭飛機還是早班後,到陌生地方旅遊,抵步後多點時間應變比較穩陣,尤其下雪的地方。

Rita 發表迴響 取消回覆

你的電子郵件位址並不會被公開。 必要欄位標記為 *