22-5-2020:皺皮甜饅頭

之前有次整蛋糕買唔到發粉,唯有買自發粉代替,後來係超級市場見到有番發粉,就唔理有冇咩計劃買咗先算,酵母,買埋啦,唔係下次想買又買唔到時咪仲麻煩~其實當年曉加固時買咗部麵包機,諗住屋企整麵包健康啲咁,但後來有咗詩詩都變成越嚟越懶,詩又唔太鍾意食麵包,根本冇乜動力,索性收埋咗部機~

最近見大家玩麵粉玩得多,屋企反正又有中筋麵粉,就試下整饅頭啦~網上隨便搵到個南瓜饅頭食譜,乜原來南瓜饅頭唔落南瓜而係落南瓜粉架?算啦,乜都唔落,就咁原味啦~

其實我一直比較少想整麵包,最主要係好怕會發唔起,人哋話,你屋企有水波爐好方便,但個爐用咁耐我都冇試過呢個功能~今次我都十五十六,用水波爐好丫,定係用新嗰個八寶鍋好,試下八寶鍋嚟發酵啦~

曉幫手量材料

因為麵包機收得太埋,所以用咗廚師機嚟整個麵糰,唔知係咪量太多,部機好似攪得好辛苦咁,我索性拎出嚟用手搓,太少整飽類,水又好似唔小心落得太多,麵糰既質感同餃子皮、曲奇餅等等都好唔同,總之黏黏咁唔太對路啦~瞓醒晏覺我同曉講話整饅頭,佢第一個反應係,咁唔好煮飯啦~哈哈,但如果失敗咗就要緊急煮飯或者麵啦~

食譜話要用40度發酵一個鐘,我放咗入去個八寶鍋度,每隔一陣入去望一望,哈,真係大咗呀,佢哋就嚟黐埋啦~

開頭一個個包包分開

大咗﹗

成品?

賣相嘛,我估因為搓麵糰搓得唔好所以表面唔滑,皺晒皮咁~味道就ok,幾鬆軟,因為比較甜,所以詩詩都鍾意食~

詩詩愛甜包包~

曉曉就乜包都鍾意食~

原本兩個餸加白飯,整咗饅頭就冇煲飯啦~

總共十個饅頭,詩食咗一個,我、day、曉各食咗三個,曉最近真係好大食﹗但居然食完咁多饅頭都唔多飽,結果煮多兩個麵,oh no no,睇嚟都係煮番白飯好啲~

Comments

comments

發表迴響

你的電子郵件位址並不會被公開。 必要欄位標記為 *