16-5-2020:期待已久的洗碗機

我真係超級討厭洗碗﹗﹗有幾討厭?鍾意做既家務係洗衫摺衫煮飯,冇乜所謂既家務係拖地執屋洗廁所,洗碗?榜尾~即是寧願洗廁所都唔寧願洗碗~其實結婚咁多年來,我洗過既碗都真係好少次,通常都係我煮day洗,但其實佢都唔多鍾意洗,洗啲碗居然要一邊睇youtube一邊洗(已經進化到淨係聽歌都未夠)~其實我已經留意咗洗碗機好多年,行電器行又會順便望下,睇下有冇啲我哋用得到既型號~

點解一直都用唔到洗碗機呢?一來大多數既洗碗機都要安裝,要好似洗衣機咁又入水位出水位,即是要放係廚房,但又唔可以放係洗衣機上面,要嵌入廚櫃中間或者座係枱上面,因為係租既屋,唔可能有大改動,所以我一直既心願就係買到層樓就要買洗碗機~

後來越來越多「免安裝式」既洗碗機推出市場,即是你可以使用時每次倒水入個機度,然後引導啲污水去洗手盤或適當既去水位就ok,我哋都係有困難,因為廚房真係冇位放…不過世上無難事,只怕有心人,如果夠討厭洗碗,夠想買部洗碗機,呢啲問題都解決到既~當我再一次search洗碗機,諗住睇下啲用家評價,開youtube嚟搵,有個channel「夫妻廢片」拍咗條洗碗機既片,佢哋想dem啲污水係點,就引咗啲污水落個盤度,知道洗一機碗每次用水量只係5L,我靈光一閃﹗佢係要dem先引落個盤度,但我哋實際操作時,每次都引落個水桶度都得呀﹗即是唔需要局限將部機放入廚房,只要係廳度搵到一個位放到部機又放到個桶就ok了~

買咗啦﹗夢想成真~

我哋專登去實惠買咗個架,上層放洗碗機,地下放個桶用洗碗粉,中層仲可以騰多個空間放部Bruno同配件添~

睇夫妻廢片段video時,都有少少憂慮,一樣係清潔力,佢段video用節能mode,洗其中個食物盒啲角落頭有少少唔乾淨~另一樣就係洗碗既數量問題,部機開宗明義話for 2-3人家庭,我哋分明4人,啲細路啲餐具又特別多,究竟放唔放得落呢?而家用咗接近一個月,發現部機原來可以「歡樂滿東華」咁放啲碗,只要角度好、碗碟與碗碟之間既距離足夠,其實都可以洗到好多碗又洗得好乾淨,甚至連鑊剷都可以放埋入去~之前我怕唔乾淨,一直用強洗mode,最兩日食粽啲碗碟好黏但數目唔多,用節能mode都洗得好乾淨~另外,平時最難洗既,好似整完蛋糕既兜兜又可以洗得好乾淨,似乎係因為洗碗時洗碗機會去到60-70度既高溫,再加上洗碗粉既潔力吧?開咗機我好多時都鍾意望一陣,尋日本身有粒粟米黏住係隻匙羮上面,啲水灑咗上去好多次都唔跌落嚟,我本來都好擔心,但冇理佢隔一輪再過去望,粒粟米跌得低咗,到洗完時,隻匙羮乾淨晒啦~果然唔需要擔心﹗

洗碗機係用多咗電,但應該真係用少咗水,係咪節省時間呢?其實未必既,因為要排啲碗,又要倒走桶啲污水,又要加啲乾淨水入去(連機送嗰個水壺1.8L,所以每次入水要行3-4轉),有啲鍾意洗碗既人會覺得,搞咁多嘢都洗完lu~但對於極度討厭洗碗既我嚟講,實在太高興了,我唔討厭操作洗碗機,可以咁輕易用番啲又乾淨又清爽既碗碟實在太幸福了~

另外,有冇人好似我咁,好鍾意睇大眼仔洗衣機洗衫既呢?如果你好此道,你都一定會鍾意睇洗碗機洗碗架,哈哈,好治愈~睇住啲水灑落啲污糟既碗碟度,慢慢變得乾淨,心情好暢快~

不過有一日如果我買咗間屋,個廚房又大啲既話,我一定要買一部再大啲既洗碗機,最好可以放埋啲煲入去就更好喇,呵呵~

Comments

comments

發表迴響

你的電子郵件位址並不會被公開。 必要欄位標記為 *