平日既早、午、晚餐，99.9%係我煮既，以前未有曉詩，病咗時都仲有機會食到day整既「病人肉餅」(手剁瘦肉餅，加蒜頭係入面，味道真係一絕)，但而家病咗，似乎去煮飯仲冇湊住兩隻咁攰，最近有咗Food Panda之類外賣平台，根本就會索性叫外賣唔煮了~近年既特別日子，day居然主動話整蛋糕，2019年母親節，佢應我order整咗個三層朱古力慕絲蛋糕，我本來只係request要慕絲蛋糕，但佢居然搵個咁複雜既食譜，嗰次因為啲cream唔夠油脂打唔起，仲專登出去買多一次，因為要三層分開整，仲由先一日既下晝，整到第二朝既上晝~
2019母親節—-搵唔到蛋糕原相，只搵到家姐呢張拼相，呢個朱古力慕絲蛋糕外表比較撲素，但味道好好啊~
今年姑仔Liza生日，佢又興緻勃勃咁要整蛋糕俾佢個妹，Liza order咗紅蘿蔔蛋糕，以前食過既紅蘿蔔蛋糕好甜，質感比較粗糙，但今次呢個又居然好好味喎，紅蘿蔔味唔濃，但混和topping+內餡既cream cheese就非常柔和，可以不停encore再食~
加咗我同曉詩合作整既生日牌，外表即刻cute咗好多~
下一位主角係曉詩既爺爺生日，爺爺話要芒果芝士蛋糕，又俾佢整到出嚟，又係唔複雜都唔揀既食譜，味道好豐富、調和，又香又濃~爺爺生日會既翌日就係2020年母親節，除咗芒果之外樣樣材料都有，我哋又買多幾個芒果，直接encore，多謝day用心整咗呢個蛋糕俾四個媽媽(我嫲、我媽、我姐、我)~
爺爺生日既芒果芝士蛋糕
切開係咁既，今次冇打果汁入芝士餡，所以望到一粒粒芒果，第二次整嗰個落咗芒果汁，切面睇落顏色靚啲~
2020母親節既芒果芝士蛋糕，day第二次排啲芒果，今次有經驗，切得更薄，賣相更好~
講起呢個芒果芝士蛋糕其實有個笑話，話說最近疫情令大家留係屋企做廚神，多種烘焙材料都不時斷貨，今次見材料種類多，諗住去栢麗廣場25/F既烘焙用品店度一次過買晒啲材料，但cream cheese只有1kg裝，咁我上次紅蘿蔔蛋糕時係市中心Taste度買cream cheese嘛，就決定直接過去，點知完全冇得賣﹗食譜話只需要用125g，1kg即是可以整8個芒果芝士蛋糕﹗﹗曉話，整一個俾嫲嫲，一個俾婆婆，一個俾姨媽，一個我哋自己食，咁仲可以整多4個丫﹗﹗我問起我朋友知唔知佢屋企樓下間超市會唔會有，有我就過開去時買，哈哈，佢話叫我買嗰1kg同佢share喎，都好既~不過到第二日去買，最細既cream cheese變成1.36kg裝，又大咗﹗﹗我哋分到680g，用咗兩次，仲有大約430g，睇下點樣用埋佢啦~變咗麥太要動動腦筋(話說某年聖誕節麥太買咗隻火雞慶祝，兩母子食咗隻火雞好耐，麥太用佢既廚藝整出千變萬化既菜式)~
仲有咁多cream cheese，可以再整好多次蛋糕﹗同埋好似無論request咩蛋糕，day都好似整得出又幾好味咁喎，我仲有半個月就生日，食咩蛋糕好呢？