19-3-2020:世界的孩子,不一樣的生活—-邱曉版

唔記得係舊年定前年既書展時買咗呢本「世界的孩子,不一樣的生活」繪本,但由呢本書嚟到我哋屋企到而家,睇過既次數肯定過百次,有可能有二百或者三百次,總之就成日都睇啦~

入面講七個分別來自日本、印度、意大利、秘魯、俄羅斯、烏干達同埋伊朗既小朋友,佢哋一日由朝到黑既生活,講佢哋既家庭由咩人組成啦,佢住係點樣既屋企啦,早餐食啲乜啦,返學著咩衫啦,點樣返學啦,學校學啲乜啦,用咩文字書寫啦,同朋友玩啲乜啦,做咩家務啦…等等~

我哋通常每次揀一個小朋友嚟睇,但可能會一日睇三次,早午晚之類,因為睇得太多,已經睇到滾瓜爛熟~有時爸爸即興搞個「世界的孩子,不一樣的生活」問答比賽,我都可以搭得出某個小朋友個妹妹叫咩名,或者某個小朋友晚餐飲啲咩之類~睇另一本圖書時見到街上既牛同埋篤篤車,曉甚至可以即刻講得出嗰度係印度~另外我哋有時會玩扮去旅行遊戲,如果我哋扮去非洲旅行,我哋就會去餐廳食「馬托給」(雖然唔知係咩味道),因為烏干達既小朋友早午晚三餐都食唔同口味既馬托給~

睇咗咁多次,之前都有一邊睇時一邊講邱曉就點點點,今次終於的起心肝,試下制作「邱曉版」~

我跟住書入面既敍述語調,去描寫邱曉既生活,本來想我親自操刀,畫啲靚靚插畫(本來冇乜藝術天份,但經過小朋友出世後既後天培養,我而家都有少少信心),但曉非常積極咁想自己畫~

又話唔識畫又爭住要畫﹗肯嘗試都係值得讚賞既~

上面個邱曉係膊頭度長出兩隻手,呢個就反映到我哋兩個一齊畫既唔協調,哈哈~

開頭我有少少覺得佢整到我幅畫四不像,但後來全盤交俾佢畫,效果反而更好,變得天真樸實又可愛~

Comments

comments

發表迴響

你的電子郵件位址並不會被公開。 必要欄位標記為 *