11-2-2020:停課不停學之「媽媽功課」

農曆新年+最少停課一個月,啱啱學寫字既K.2小朋友如果唔返學就唔執筆寫字既話,退化速度難以預測,要保持實力(最好梗係有進步啦)當然要keep住鍛練啦~所以停課呢段日子,我每日安排兩頁寫中文字既「媽媽功課」俾曉曉~

我真係冇正式學過幼兒教育或者語文教育甚麼,只能夠大概咁由淺至深,係佢已掌握既字之上再複雜少少,或者再加多少少,又用啲字嚟配下詞語,賦予文字更多意義,中間又加插少少溫習,內容方面就希望可以保持到佢有興趣啦,呢個就係「媽媽功課」既製作概念~

啲字係咪寫得好靚呢?因為係我寫既,哈哈﹗﹗呢本唔係「媽媽功課」,係曉曉出俾我做既「曉曉功課」,曉老師係度批改緊我寫既字,靚既會俾星星架~

呢啲先係佢既字,咁都合理啲~

因為學校寫過「日」,我之前俾佢寫「白」,可以組成佢喜愛既卡通人物「小白」,「白」之後就寫「百」啦,「合」都好容易啫,人、一、口之嘛,原來要裝組個字都唔容易,後尾我教佢遮住個格既下半嚟寫個「人」字,個「合」先好樣啲,但好明顯見到小朋友既學習能力真係好強,到後尾既「合」字就唔需要再遮格仔啦,有百、有合,加埋之前教咗佢既「花」,就可以寫「百合花」了,係佢哋上午低級1班既其中一組既名呀,不過曉曉自己係繡球花組,太難寫啦~

點解要寫「九」,佢本身學校有寫過「一」、「二」、「三」、「十」,我諗住教埋佢寫「四」、「五」、「六」,再寫埋「星期」,咁寫日子咪可以寫埋星期幾囉,但寫得到「六」,就唔爭在「七」、「八」、「九」啦~個「十」係佢自己話有位,要溫習喎,好啦好啦~

講起個「九」字,其實之前寫個「五」字時我專登download咗個app:

因為我唔太sure個「五」字個筆順係直完先彎定彎完先直,搵咗reference我係啱既,但原來個「九」字我一直都錯丫,原來係撇完先彎鈎丫,不過我都係改唔到啦,寫咗30年~

曉曉讀既幼稚園屬於happy school,教得比其他幼稚園慢,所以平時做功課冇乜壓力,媽媽功課反而比較有挑戰性(特別係我以為好容易,點知原來佢覺得好困難,oh sorry),所以佢一朝早起身,或者午睡醒來後寫,效果會比較好~但係嘛,只有「媽媽功課」先會按你既喜好去設計架,例如有得寫「公主」、「王子」、「花生」、「小丸子」、「小白」、「三文魚」、「日本」等等同你生活有密切關係既詞語~嚟緊我有好多計劃呀,「小仙女」、「洋娃娃」應該都就快出現lu~

話說曉曉有本繪本叫做「100個耶誕老公公」,係姨媽某次去台灣旅行時買俾佢既禮物,入面100個聖誕老人全部唔同名,故事結束後,書皮嗰兩頁有晒100個聖誕老人個嘜頭同埋名,次次睇完故事,曉都要我讀晒嗰100個聖誕老人個名俾佢聽,最近寫字寫得多,佢認得既字多咗好多,加上啲聖誕老人個外表有個別既特徵,而家我盡量俾佢自己讀啲聖誕老人個名,叻咗好多喎~

佢哋學校暫時教英文只教咗A-Z大寫,我本身都想教佢寫字母既小寫,但唔知點解真係唔識教,寫個「a」字總會變咗留咗一頭長髮既Elsa(嗰條尾巴出嚟既位置同方向唔係幾啱),所以我暫時hold住先,諗諗計再試下,可能真係要捉住佢隻手仔嚟寫先明我咩意思~

===============================

同場加映:

曉曉乖乖寫字,詩詩安靜砌圖,媽媽我真係老懷安慰~(其實呢個狀態應該只係維持咗10分鐘左右,哈哈~)

Comments

comments

發表迴響

你的電子郵件位址並不會被公開。 必要欄位標記為 *